واحد فول بالإشطة

المكان ...ميدان التحرير
الزمان ...الساعة السابعة صباحاً
الطقس...بارد جداً
*********************
احمد شعبان بصحبة إنشراح
سمسم بصحبة احمد شعبان
الحدث...مظاهرة حولين عربية الفول اللي في موقف الميكروباص
تلاحم قوي الشعب...الفلاحين مع العمال...المثقفين مع الصعاليك
العوطلية مع الموظفين ...القطاع اللي كان عام مع القطاع الخاص
الجميع في معجنة واحدة...جبهة واحدة...فكر واحد...شوية فول
********************
في الجوار قريباً من الرصيف...إمرأة محنية...تحاكي إنحناءة الوطن
تجمع الزبالة...والتراب...وبقايا السبارس...وما يلقي من شرعات السيارات المارة
جلبابها فضفاض...طرحة سودا...حزينة...حزن اهل مصر...وكاب فوق راسها زي بتاع السماكين
بقايا من شبورة ضباب تودع الأسفلت بقبلات حارة...محاولة الإفلات من حضنه قبل ان تفضحها الشمس
أخذنا أماكننا بجوار جمهرة الواقفين...بالصدفة جه نصبنا جنب ركنة الحمار بتاع صاحب عربية الفول
لم يكترث الحمار لوجودنا...وماذا يعنيه...هو لا يهتم بمن وقف ومن إنصرف...25 سنة وهو لا يهتم
تأملنا الحمار لحظة خاطفة بطرف عينيه...ثم تنهد...وهمهم بكلمة لم أتبين معناها...غير انه خُيل إلي ان شبح إبتسامة لاح من طرف فمه...قائلاً بسخرية: تباً لكم..شوية حمير
عرفت فيما بعد أن هذا الحمار بالذات يتمتع بعادات مختلفة عن بقية الحمير حيث يطرب لأغاني الفنانة نانسي عجرم ويحب موسيقى الراي وتحديدا صوت الشاب خالد ويدخن النرجيلة وينام علي السرير
********************
أضف لمعلوماتك
سمو الحمار يشبه بشكله العام الحصان لكنه أصغر حجما وأقرب إلى الـ بغل في حالته الحمورية القياسية، له رأس كبير وذيل قصير ينتهي بخصلة شعر دائماً ما يصبغه ليبدو اقل من سنه 25 سنة تقريباً، حوافره صغيرة وأذناه طويلتان، و تسمى المدام بتاعة سمو الحمار(أتاناً) وهي إجتماعية جداً وبتحب الحمير الصوغننين، وولده البكر جحشاً.
يعتبر لفظ حمار من الشتائم السوقية الشائعة في المنطقة العربية قبل وبعد الإحتلال الأمريكي، ويستعمله البعض لوصف شخص بالغباء خصوصاً في إجتماعات القمم العربية علي مستوي رؤساء وملوك الدول، والحمار هو شعار الحزب الديمقراطي...الأمريكي...لأنه كناية عن الصبر، وهو شعار المرحلة أيضاً عند المصريين.
********************
إشرأبت أعناقنا نحو عم الفوللجي...وإمتدت إيدينا بالسحاتيت...نحو مصدر الغذاء الوحيد
الجميع يعلم ان القانون علي العربية...هو السحاتيت مقابل الغذاء...لا يحتاج الأمر مجلس أمن ولا ديولو
العربة...الفوللجي...المرأة الكناسة...الحمار...الطقس...الأسفلت...الجماهير...أحمد...إنشراح...مصر...أنا
ونبتدي الحكاية
******************
صوت:شفت التعديلات الدستورية الجديدة
عم الفوللجي:إدهس بيضتين هنا
صوت يعقب:انا مش عارف معناها إيه
عم الفوللجي:حط علو برسيم للحمار
صوت متثائب:يعني ايه دستور أصلاً
عم الفوللجي: شوية طرشي علي شوية طحينة
صوت أجش:ضاستور...إيه يا فنديه...بلا أفيه...هو النفر فينا فاضي يحك راسوه
صوت :يا جماعة ماهي المسألة محسومة معروف المسألة بتتقشر لمين
قهقه الحمار بنهيق متواصل لدقيقة...ثم كتم نهيقه حتي لا يبدوا انه معارض
نظرت الي الحمار...فتعمد ان ينهمك في مضغ البرسيم
صوت:هي ناقصة حمير...مش كفايه اللي معانا
صوت ضاحكاً:قصدك مين
صوت:لأ يا عم...مئصديش حد...ده انا حتي بغني أهو...بحبك ياحمار
خيل لي ان الحمار منشكح ويبتسم بدهاء
صوت:ياخونا البلد دي بايظة
عم الفوللجي:إكسر بضتين كمان هنا
صوت بينقط حكمة:يا خونا اللي نعرفو احسن من اللي ما نعرفهوش
عم الفوللجي لصبيه: يابن الشرمـ(..............)
صوت:ياعم دي عزبة وبتتورث...مش كفاية...يبقا الواد وابوه
صوت أجش مرة اخري: بس لوكان مجدع زي الولا بتاع كنزويلا...الجدع ده اللي اسمو شاكيز
صوت:أصدك شافيز
الصوت الأجش:ايوه يا خويا هو الجدع ده...بصح راضع من(......) أمه...وقف قدام الـ(...)بوش وألوه
لأ...لحد هنا والتزم حدودك...جرا إيه يامعـ(........)...واد شهم بصحيح
إنتبهت فوجدت الحمار يصغي للحوار بتمعن...وهم بقول شيء ما...لكنه عاد وتراجع ولزم الصمت
وأخذ يتسلي بأعواد البرسيم الصابح الخالي من الكلسترول
صوت:ده لوحط إيدوه...في إيد المرحوم صدام ماكنش ده بقا حالنا
صوت:ياعم ماهو كان صدام رايح رايح
صوت:ءألو كنا روحنا رجاله بشرفنا...مش عمالين زي الشـ(......) اللي ديره تسلم رجالة الحارة
أخيرأ نطق أحمد شعبان وهو يحاول بلع لقمة تسد حلقه : ياجماعة أكيد إنشراح لها رأي تاني
سقط قلبي في الكوتشي بتاعي عندما همت إنشراح لتعبر عن رأيها بالصوت المعتاد من منخيرها
ولكن إطلالة جديدة من النهيق الحميري غطت علي الموقف...نظرت الي الحمار ممتناً له بإبتسامه
فبادلني ذات الشعور الممتن...هدأ الحمار فعاد الحوار
صوت: ياعم شوف الناس الطيبة بتوع ربنا يدخلوا السجن وتتاخد فلوسهم...طب ماإتعملش كده ليه مع لكح
واللي قبلو...واللي قبلو...حاجه تخلي
عم الفوللجي:إكسر بضتين هنا كمان
لم انتبه للمرأة الكناسة الا هذه اللحظة....منهكة ومنهمكة في جمع فتات الفضلات من الشارع بهمة شديدة...حقاً شوارع لها حظ...تذكرت العشوائيات...تلك المناطق التي لا تعتبرها الحكومة داخل نطاق مصر الجغرافي تذكرت اكوام الزبالة والأطفال يلعبون فوق قممها العالية...يتخيلونها ماجك لاند...او كوكي بارك
فجأة طارت ورقة جرنال من يد أحدهم وحطت عند أقدام المرأة الكناسة...نظرت المرأة لها في لا مبالاه
ولكلكتها وأخذت تجمع بها الزبالة...يا خبر الصفحة الرئيسية في الجرنال...مانشيت تعديل الدستور
عثرت المرأة علي نصف شاندويتش جنب الرصيف...فوضعت ورقة الجرنال بتاعة الدستور تحت فردة شبشبها أحسن تطير...ثم مسحت عرق تصبب علي جبينها المعروق بهم السنين...وجلست تقضم الشاندويتش...أعجبني موقف المرأة الكناسة من الدستور...وأعتقد انه لخص مداخلتي علي ما قيل...أدرت رأسي فوجدت الحمار يتابعني...تبسم وغمز بعينيه...ثم تناول بفمه حفنة برسيم وأخذ يلوكها علي مهل
هنا إنتبهت لصوت عم الفوللجي: طلبك إيه يا فندي
قلت بعدم تركيز: واحد فول بالإشطة

35 عبرني:

أحمد شعبان يقول...

خالتي انشراح بتمسي عليك

ابأه عدي

:-)

غير معرف يقول...

السهل الممتنع الله ينور ما اقدرش اقول غير كده
حوريه

غير معرف يقول...

نسيت اقول لك انى سرت وحدى اليوم نحو بيتى القديم اقصد عملى المحكمة الحقانية مشاركة للزملاء و الوطن فدمعت عيناى حزنا و قهرا فلمحنى واحد امن مركزى فوجدته يمسح دموعه مثلى قلت الحمد لله كلنا فى حب الوطن سواء
حوريه

غير معرف يقول...

إدراج متميز لكاتب أكثر تميزا شكرا على إفاداتك

غير معرف يقول...

ما شاء الله عليك يا سمسم بجد جامد جدا جدا جدا

من أقوى ما قرأت فى حياتي وخاصة الحمار حسيت انه بنجامين فى
Animal Farm بتاعة جورج أورويل

ما شاء الله عليك عبقرى بجد والتعليقات العابرة من الفوللجي جامدة جدا وفى محلها وخاصة موضوع البيضة ده جامد جدا
(:

ماشى يا سمسم يا جامد

وبالنسبة للدستور اياه

ربنا يرحمنا يا سمسم

الله اعلم الفترة الجاية هيتعمل فينا كلنا اية

غير معرف يقول...

الحمار هو الوحيد الذي يستطيع ان يقول كلمة الحق دون الحوف من الضرب

koukawy يقول...

انا كنت مستنيه الحمار في الأخر يتكلم او يقول اي حاجه انما فضل ساكت طول الوقت موقف سلبي من الحمار الحقيقه

بيتنا القديم يقول...

أحمد شعبان
*********
إنشراح تمر فيها الفول

هي خرجت من الحبس ولا لسه

علي العموم سلم عليها

ويجعلو عامر

بيتنا القديم يقول...

حورية كلاكيت اول مرة
*******************
يا ستي ان شالله ميرسي يا رب

بس إيه مدونتك الشيك دي

ده هجيب صحابي في التخشيبه ونيجي

نضايف عندك

ويجعلو عامر

بيتنا القديم يقول...

حورية كلاكيت تاني مرة
********************
طب الحمد لله جت سليمه

العسكري اللي كانت عنيه بتدمع

ده مش تعاطف قوي الشعب يا ماما

هتفضلي طول عمرك طيبة وعلي نياتك

ده إيدو من مطرح قنابل الغاز المسيل

للدموع...تلائيه ممسحهاش كويس ودعك

بيها عينيه...المرة اللي جايه وحياة

ربنا العظيم متبئيش تؤفي تتأمليهم

كتير عشان الغدر عندهم مالهوش مواعيد

إحنا عاوزينك يا حورية يا ختي

ويجعلو عامر

بيتنا القديم يقول...

صلاح
***
يا عم بلاش الكلام بتاع الجرايد ده

وبعدين انا مبحبش الإطراء الكتير

يكفي انك تؤلي...أنا مشفتش حد زيك

انت معجزة

انت محصلتش

يارب اموت لو بكدب

يارب تتدهسني عربية ليمزين 2007 انت

رائع....فقط ذلك يكفي

ويجعلو عامر

بيتنا القديم يقول...

ماشاء الله يا ابو حميد

تعليقك جامد جدا جدا جدا جدا جدا جدا

هو انت علقت قولت إيه؟!!

ماعلينا

ممتاز انك تشبه حماري بمزرعة الخنازير

ولا مزرعة الحيوانات...بس إحنا سبقنا

العالم دي بكليلة ودمنة والف ليلة

وليلة...وام أطاطا وشجرة البطاطا

المهم

سيبك من الدستور واعمل بنصحتي

إستمتع بيومك اقصي ما تستطيع فإن

الغد اسود مما تتصور

طبعاً عليهم مش علينا

ويجعلو عامر

بيتنا القديم يقول...

المجهول
******
علي فكرة بشوف عربجية كتير بيضربوا

حميرهم لما بيؤلوا الحق

إظاهر شوطة يابن ولدي ودايرة في

الكفر كولاتو

ويجعلو عامر

بيتنا القديم يقول...

الكوكو الكميل
*************
هذا ما قاله الحمار

هفضل حمار .. وما تكلمش ..
حمار .. حمار ..ما بتفرقش ..
أنا حمار .. وانت حمار ..
وناس بهايم ما بتفهمش ..
سنين وعايش ..
أو مش عايش ..
ما بسألش ..
من غير وظيفة ..
جيوبي نظيفة ..
ما فيهاش تعريفة ..
وما بفكرش ..

هفضل حمار .. وما تكلمش ..
حمار .. حمار ..ما بتفرقش ..
من غير كرامة ..
وأفكار هدامة ..
كفاياني ملامة ..
لو فكرت ..
حبس وتعذيب ..
إصلاح وتهذيب ..
لازم أندم ..
إزاي ماأندمش ..
على إني يوم ..
صحيت من النوم ..
أجرمت وفكرت ..

هفضل حمار .. وما تكلمش ..
حمار .. حمار ..ما بتفرقش ..
سنين ساكتين ..
آكلين عايشين ..
جعانين عايشين ..
ما بتفرقش ..
تحت الأرض ..
جوا الطين ..
ما بنمتش ..
جوانا حنين ..
جوانا أنين ..
صامدين صامتين ..
وما بنقولش ..

هفضل حمار .. وما تكلمش ..
حمار .. حمار ..ما بتفرقش ..
فضفضة .. فصفصة ..
سرقة وقصقصة ..
بيقولوا خصخصة ..
شركات كتير ..
والكرش كبير ..
تحميه مَريَسَة ..
أصله مدير ..
أو أمير ..
جايز وزير ..
ويا نظيف ..
من غير تكليف ..
البيه خفيف ..
فلوس كتير ..
ملك الغير ..
ما يهموش ..
ما هو صاحبنا ..
باعهالهم مفروش ..

هفضل حمار .. وما تكلمش ..
حمار .. حمار ..ما تفرقش ..
جوا المحروسة ..
انتخابات كوسة ..
كوسة في كوسة ..
ما تدورش ..
تزويرات مفقوسة ..
وبلطجة مدروسة ..
وبنت الزيني ..
مابتكدبش ..

هفضل حمار .. وما تكلمش ..
حمار .. حمار ..ما بتفرقش ..
قضاة ينضربوا ..
صحفيين يتحبسوا ..
ما بسألش ..
ما هوش غلطان ..
أصله كبير ..
وما بيغلطش ..
وكلنا حمير ما بنفهمش ..
هفضل حمار .. وما تكلمش ..
حمار .. حمار ..ما بتفرقش ..

غير معرف يقول...

أيه يا عم سمسم ده ربنا يكرمك حضرتك معلقلى على نص الحاحات إللى فى المدونة هو حضرتك بتحلل شخصيتى عن طريق المدونة طب أيه رأى حضرتك فى المعلومات إللى أنا كتباها عن الصهيونية و الماسونية جزاكم الله خيراو ما علينا علشان ما أرغيش كتير ، أزى طنط أنشراح يا رب تكون بخيييير و أيه الحمار العبقرى ده بيفهم كل حاجة بس هو سلبى علشان واقف موقف المتفرج و ما بيتفاعلش مع الأحداث و يرد و عجبنى جدا الراجل الرخم بتاع الفول هو كل شوية لما يلاقى حد بيلبخ ( ده من وجهة نظره مش نظرى أنا طبعا ) يروح متكلم و كاسر بضتين و يا ريت لو الفول بالقشطة طعمه حلو تبقى تجبهولى و حضرتك بتزورنى فى المعتقل مع إنى ما مش باكل الفول إلا نادرا فياريت تبقى طعمية سورى و أكتر حاجة أثرت فيا حال المرآة عاملة النظافة ربنا إن شاء اله راح ينتقملها و ينتقملنا من إللى نلهب البلد كلها و بيبعها بالتقسيط و كل تعديلات و حضرتك طيب و بخير ونقابلك فى التعديلات الدستورية لعهد الرئيس مروان جمال مبارك إن شاء الله و برضه الشعب حيفضل ساكت و متخدر و مش بيتكلم ولا بيطالب بأقل حقوقه المنهوبة سلامى كتييير لسهيلة و مامة سهيلة و لتانى مرة يا ريت حضرتك تبلغها إن الشكولاته أنا جبتهالها و مستنياها لما أشوفها علشان أديهالها و حزب الأحرار بيسلم على حضرتك و أخفض رأسك أيها المواطن الأرهابى فقد أتى عهد الأستعباد و السلام عليكم و رحمة الله و بركاته

عين ضيقة يقول...

سمسم باشا

صبح صبح ياعم الحاج

غير معرف يقول...

أنا خايفة عليك يا عم سمسم من الحمير
إبقى خوذ بالك و إنت ماشي في الشارع لا يدهسك شي حمار كبير

أميرة البلطجية يقول...

هههههههههههه
كان نفسي اعلق يا اخويا..بس معلش بقي
النتيجة طلعت
وممكن لا مؤاخذة يجيبونا
وانت عارف
عندي شعب عايزة اربيه
ههههههههه

بيتنا القديم يقول...

تسنيم
*****
لأن مواضيعك شيقة لذك يجب علينا

التعليق

مواضيعك عن اتلماسونية والصهيونية هامة جداً يا ريت كل مدة تكتبي في المجال ده...أخبارهم مخططاتهم مؤامرتهم

شكلك مصرة علي المعتقل يا تسنيم
جبيها لبر يا ماما وعيشي وقولي نعم للتعديلات

الحاجة سهيلة بتسلم عليك وبتشكرك مقدماً علي الشيكولاته اللي هي مكلتهاش

تحياتي
ويجعلو عامر

بيتنا القديم يقول...

عين ضيقة
*******
مئة مرة قلتلك ما تشربيش حاجه

متعرفهاش

أهلاً بيك في الغرزة قصدي في المدونة

وسلمي لي علي اللنبي ...وصبح صبح

ياباشا

بيتنا القديم يقول...

أنيما
*****
ثقي ان الحمير لا ترفس إلا من يقترب

وتحترم كثيراً من يعطيها علي دماغها

تحياتي

ويجعلوا عامر

بيتنا القديم يقول...

مولاتي
*****
أخص عليك

طلعت خوافه

يعوض ربنا علي المملكة عوض الصابرين

هه تحياتي ويجعلو عامر

علي فكرة الحمير سرقت الفراخ !!!!

كلبوزة لكن سمباتيك يقول...

إمرأة محنية...تحاكي إنحناءة الوطن

هو الوطن محني؟
حرام عليك
الوطن زي الفل و عقبال عندك حامل
و حيولد ان شاء الله قريب
ادعوله
ربنا ينتعه بالسلامة

--
ممكن فول محوج و بلاش قشطة؟

بيتنا القديم يقول...

كلابيزو
*******
وكمان حامل

يادي الفضيحة

يعني فضيحة "الفتة" الإستفتاء

وفضيحة الحمل

انا قلت محدش يحط رجله في واشنطن محدش

سمع لي كلمه

ويجعلو عامر

شغف يقول...

يا خونا اللي نعرفو احسن من اللي ما نعرفهوش


أحب أقولك بس إن حنفيات الحكمة منسابة و مغرقة كتيييير من الشعب

ياريت لو تشوفلنا سمكري جدع كده و شاطر يصلح الحنفيات دي

غير معرف يقول...

سمسم التعليق ده انا كنت كاتبه لأميرة على اساس انها تحلل شخصيتى -ال شخصيتى ال- وتعمل لى روشتة كدة وتديهانى ...بس اولا اتكسفت من اميرة ثانيا انت ما شاء الله عليك محلل رهيب ثالثا احنا رجالة فى وسط بعضينا وبلاش ندخل أميرتنا فى المشاكل المكلكعة دي

المشكلة اهى



انتى امبارح دعيتي لى وقلتى ربنا يفرحك

يبدو - والله اعلم- انك كنتي مش متوضية وانتى بتدعى يا اميرة لان الدعوة جت عكس خالص وانا اتنكدت اخر نكد امبارح

وانا نايم حاسس باحساس غريب....حلمت بكابوس وحش اوى متعلق بالحب القديم...وسبحان الله مش عارف هل لسة فيه حاجة واللا لا لكن اللى اعرفه انها برضة هى هى لسة غالية عندي ومش عارف لية

سنة ونص يا اميرة ما رفعتش عليا سماعة تليفون وانا كرامتي ما تسمحليش مع ان كتير قلنا مفيش كرامة فى الحب وكدة لكن هى بايعة وقالتها بالحرف انا خلاص مش عايزة اكمل وكدة
مش عارف اية اللى جه على بالى
كلمت صاحبتها اول ما صحيت وقلت لها انا حلمت بكابوس بشع متعلق ب غادة و عايز اسألك
هى غادة ارتبطت؟

قالت لى ...ايوة انت عرفت منين؟

صدقيني يا اميرة مع انى مش متوقع انها تنتظرنى لكن الكلمة كانت صاعقة
قلت لها طيب ازاى؟ حب يعني واللا اية؟
قالت لى لا ...رسمي
من امتى؟
من قريب
وانتى ما قلتيليش لية؟
خفت هى تزعل
وهى عاملة اية
هى تعبانة اوى من يوم ما سابتك وكل قراراتها خاطئة وغلط وهى مخنوقة بس مش بتحكي لى حاجة

عارفة يا أميرة...انا مش هانفع معاها..انا عارف نفسي وعارف ان احلامي وطموحاتي فى الفترة اللى تلت انفصالنا اتغيرت تماما...ما عدتش احمد التافه اللى كنته-اكيد لسة ادامي الحياة طويلة وكل يوم الواحد بيتعلم جديد وكل يوم الواحد بيكتشف جديد -لكن انا دلوئتى اتغيرت عن زمان
دلوئتى بحلم بحاجات مختلفة تماما ومواصفات مختلفة مفيهاش مجرد خفيفة الدم او العاقلة او ذات المستوى العالى حتى

دلوئتى اتجاهاتى تتجه لمتدينة بما يكفى انها تربى الاولاد صح ومش هعارض لو تعليمها منخفض و اهم حاجة المطبخ تمام والبيت نظيف وياريت متكونش سفسطائية اوى فى الكلام وتناقش فى كل حاجة وتعترض فى كل شىء و رأيي كذا و انا اعترض على كذا وانت مبتعرفش وانت مبتفهمش وانت وانت وكدة

فيه شخصية معينة فى دماغى اعتقد ان هيكون فيها اغلب الصفات دي-بنت الشيخ بتاعي- هو راجل عالم وما شاء الله عليه فى اخلاقه و اسلوبه واكيد ربي بيته تربية صحيحة

المشكلة عندي دلوئتى فى كام نقطة كدة عايز اقولهم لك-لو الفضفضة دي هتخنقك دلوئتى وانت محتاجة حد تفضفضى له اساسا اركني الموضوع ده تماما من دماغك وجاوبيني بعدين وعادي مفيش مشكلة عندي

اول نقطة انى الفترة دي بعيد عن ربنا...مش زى الاول...مش حاسس بالروحانيات العالية اللى حسيتها فى الاول...عارف المشكلة ....وعارف العلاج...و زي ما تقولى مكسل اعالج نفسي او انشط فى الاسلام شوية وكل اللى على بالى ان الله يهدي من يشاء وانا دلوئتى مغضوب عليا وربنا مش عايزني لطريقه بس انا بحاول اصلح نفسي

اكتئاب داخلي بحاول اغطيه بمرح ظاهرى مصطنع والاكتئاب ده لما فكرت فى اسبابه لقيت اولها حالى مع الله ثانيها حال مصر ثالثها حالتى فى المذاكرة رابعها قرب ميعاد تخرجي لسوق العمل واحساسي ان مفيش شغل رغم ان كذا مكان مفتوح فيهم شغل ادامي دلوئتى بس برضة قلقان

منظر الشقة عندي زبااااااااااااااالة وعايز اتجوز عشان تعبت بجد من العيشة دي
احنا عايشين فى بيت عيلة وواخدين اخر دور...والدتي متوفية من 5 سنين وعايش فى شقة لوحدي ووالدي فى شقة لوحده وانا اصغر اخواتي واللى اكبر منى مباشرة يكبرني ب 16 سنة وكلهم متجوزين وعايشين برة فى بيوتهم وانا هنا لوحدي وطبعا انتى تسمعى عن عيشة العزاب...انا اللى بحط الغسيل فى الاوتوماتيك واشيله وانشره والمه واطبقه فى الدولاب وبعدين اكويه وانا اللى اغسل الصحون وابشر البصلة واطبخ الاكل وبعدين آكل و اغسل المواعين تانى والعيشة القرف دي

بجد محتاج اتجوز بأى شكل واى ثمن
مش لمجرد انى اجيب خدامة فى البيت...ولا عشان الحاجات اياها...بس لانى تقريبا على شفا الجنون...محتاج حد اتكلم معاه وافتح له قلبى...محتاج زوجة تستقبلنى على باب البيت وتقولى حمد الله على السلامة والكلام ده....محتاج حد اجرى والعب واهزر معاه حتى لو كان رجل-بس لو راجل يبقى كل واحد فى اوضته يعني- بس اى مخلوق اتكلم معاه بدل ما اتجنن

انا عارف انه غلط اقول الكلام ده لبنت بس انا ...

مش عارف

انا عارف اكيد والمفروض ولازم وحتما ولابد انك مخنوقة منى دلوئتى عشان انا متقل عليكي اوى بس انا حاسس انك اختى الكبيرة والعقل اللى ممكن اسأله واقوله لو سمحت...شور عليا

يا أميرة..انا اتخنقت اوى لما سمعت خبر انها اتخطبت لانى - ولو بعد الفترة دي كلها- لسة عندي حتة فى قلبي فاكراها...فاكر خفة الدم والضحك والهزار وكدة...انا عارف ان انا وهى كزوجين مش هننفع لان ببساطة مفيش اتنين هيرجعوا زي ما كانوا ولان هى مش عايزاني ولالف سبب وسبب بس انا عايز احدد...اللى عندي ده...هل ليها هى وحدها واللا لاى حد؟ يعني انا لو ارتبطت بأى واحدة هنساها؟ تقريبا اعتقد كدة بس مش ضامن هل هفتكرها بعد الجواز؟ واللا الوضع اية؟

شورى عليا

شكرا


بص يا سمسم


انا لحقت نفسي على اخر لحظة قبل ما ادوس publish ur comment
ورجعت فى كلامي و جيت عندك هنا وخدت الكلام كت وبست وحتى مغيرتش فى الصيغة ولا ضمير المخاطبة وسايب كل شىء زي ما هو

شور عليا يا سمسم انا تعبان اوى و اللى فاقعني اكتر احساسي بانى تافه لان البلد بتولع والدستور بيتغير والمفروض اكون دلوئتى مولع عشان مصر...وحاسس باكتئاب مسبب لى لا مبالاة بس من جوايا خايف على مصر...لكن للاسف مصر مش محتلة مساحة 10 % من تفكيرى...والاهم الدين...برضة مش فى افعالى اوى...فى اهتماماتي اه وهم كبير كمان شايله بس مش بعمل فعل

ربنا يهدينا ويبارك فينا
امين

smraa alnil يقول...

ايه التدوينة المغرضة دي
شكلك ناوي علي خرابها يا سمسم
تشبيهاتك مش مريحاني
انت ناقم علي الحمار ولا ايه
لا انا كدة ازعل
انت قصدك مين بالحمار ها قولي ها
ما تقول بقي ها
المهم سيبك من كوووول الكلام دة
الراجل جابلك في الاخر واحد فول بالشطة ولا كسر البيضتين علي الفول

بيتنا القديم يقول...

شغف
****
خطوة عزيزة يا شابه

ياتري عاوزه تئري الفنجان ولا تضربي الودع ولا افتحلك المندل ولا تعملي لإحدهم عمل يشقلب كيانو
عندنا اعمال سفلية واعمال علوية...واعمال علي السلم لا مؤخذة

شكلك طيبة ومالكيش في المواضيع دي يبقي تشربي اهوتك وندردش شوية
لحد ما البوليس يجي

بصي يا شغف يا بنتي هالله هالله علي الجد والجد هالله هالله عليه...بخصوص الحكمة اللي ضربة فالشعب اليومين دول
فالشعب ده اصله فقري وبوزوا ناشف
حبتين...من يوم ما رمسيس حكم مصر والهكسوس فتحوا سفارتهم جنب الجامعة
والشعب يؤول اللي نعرفو احسن من اللي ما نعرفهوش
جاتنا نيله في أمثالنا اللي تجيب وراا

فنجانك خلص يا شابة

تحياتي

ويجعلو عامر

koukawy يقول...

ياه و الله الحمار طلع شاعر امال هو حمار ليه يا تري ؟؟؟؟؟؟؟؟؟؟
هههههههههههههههههه

بيتنا القديم يقول...

عم احمد
******
يا أيها الذين آمنوا إستعينوا بالصبر والصلاة

تحياتي

ويجعلو عامر

بيتنا القديم يقول...

سمراء النيل
**********
بردو مش هتكلم وقول مين الحمار

أحسن يرفسني يا ماما

طبعاً ديمقراطياً لازم يجيب فول بالإشطة

تحياتي

ويجعلو عامر

بيتنا القديم يقول...

الكوكو الكميل
************
مممممممممممممممممم

قصدك مين يا شابة

تحياتي

ويجعلو عامر

غير معرف يقول...

حاضر يا سمسم

أوجزت فأحسنت

جزاك الله خيرا

محمد عبد الغفار يقول...

لم تعجبنه الصورة ولا الألفاظ المبتوره


اعلم انه واقع ، انما واجب علينا تنقيته وتطهيره وتهذيبه والرقى به

بيتنا القديم يقول...

محمد عبد الغفار
***************
حق النقض مكفول

شفت زي دي ديمقراطية