أحمر على ابوه يا بطيخ..!


النهاردة قررت اغتسل غسل الجمعة ليس لأنه سُنة مستحبة فحسب...
بل لأنني لا ادري متى يغلق اخونا الأفارقة حنفية النيل العمومية...
الخلاصة أخدت بعضي ورحت مسجد قريب مننا جداً...
إمام الجمعة شن هجوم ساخن على باعة البطيخ المحاصرين للمسجد...
وصفهم بانهم مسلمين بالإسم بس وذلك لأنهم لا يحضرون صلاة الجمعة...
وطالبهم بفك حصارهم البطيخي ومنع حناجرهم من الانفجار عقب التسليمة الأخيرة...
تصورت ان البطخجية حيجروا بسرعة يتوضوا ويدخلوا الصف خوفا من الوعيد...
وتصورت إن الامام سوف يأمر المصلين بفك الحصار والاستيلاء على البطيخ اللذيذ...
وتصورت ان غنائم البطيخ بدات توزع علينا نحن المصلين أبطال المعركة..
ولكن أي من هذا لم يحدث بل على العكس تماماً لم يبرحوا اماكنهم...
وبعد الصلاة وكما هو متوقع إنفجرت حناجرهم تسبق الميكروفونات...
- بخمسة جنيه يا بطيخ..
- البطيخ بخمسة جنيه يا جدعااااان..
- خلي الغلابة تااااااكل..
- عالسكين يا دوَّاء..
- أحمر على ابوه يا بطيخ..
تأسفت في نفسي أن تهديدات الامام تبخرت في ثواني..
وأكد التفاف المصلين حول البطيخ أن النظرية تخالف التطبيق غالباً..
انتبهت إلى جاري في العمارة والذى كان يصلي معي بالصدفة وهو يصافحني..
وقبل أن أفاتحه في أزمة البطيخ بين الواقع والتطبيق..
تبسم وقال لي:
- يالا نشتري بطيخة دي حلوة وسعرها جميل..
احمر وجهي غضبا مثل البطيخ وقلت له مكشراً:
- اعمل حسابي في واحدة بس..!
....................
تحديث: هما ليه الناس بيطبلوا على البطيخة قبل ما يشتروها...؟!

5 عبرني:

كلمات من نور يقول...

الله عالبطيخ دلوقتي بحتة جبنة بيضا (:

الناس بقت مغيبه ولا بتفهم ولا بتحس ومش عارفه آيات سورة الجمعة عن ترك البيع والتجارة بتقع في ودانهم ازاي ....ربي يهدينا آجمعين .....نيجي بقى على التخبيط عالبطيخة داه حانتظر الرد والتعليقات ....تحياتي

بيتنا القديم يقول...

كلمات
.....
ربنا يخليك يا استاذة "كلمات" بس والله البطيخة طلعت سكر..!
(:
نورتي بيتك القديم

samy يقول...

حرام عليك بجد حرام عليك

ربنا مش هسيبك

على اللى عملتة فينا

اية الصورة الجامدة دى معقول بقى فى بطيخ بالصورة دى هههههه

انا بهرج متزعلش

على العموم انا مش هتكلم

من الناحية الدينية

انا هتكلم من الناحية الأخلاقية

ان الناس خلاص مبقاش عندها اى نوع من انوع الذوق ولا الأحترام لأى حاجة

ان انت تكون محترم من وجهة نظر الناس دة انسان ضعيف علشان كدة محترم يا حول اللة

نرجع للبطيخة عاشان نطرى على الكومنت قبل ما امشى

هما بيخبطو عليها علشان يشوفوها حمرا ولا قرعا

بس ازاى اسئلو اهل الخبرة

شكرا

بيتنا القديم يقول...

سامي
....
بعيداً عن المسألة الدينية كما تفضلت أؤكد أن تغيرات كثيرة انتابت اخلاق المصريين في مجملهم..تغيرات أضاعت معاني مثل الشهامة والنخوة وحماية الضعيف واحترام الكبير ونصرة المظلوم..!
(:
نورت بيتك القديم وخدلك حتة بطيخة..!

Noha Saleh يقول...

هو المسألة مش بياعين البطيخ بس
صلاة الجمعة بتكون شغالة عادى والمسلمين بتشوف مصالحها فى الشارع رغم انها فرض

انما ليه بيخبطوا على البطيخة فغالبا لما بيكون ليها صوت معين فى الخبطة بتكون البطيخة كويسة بس انا عن نفسى مش بعرف اشتريه

وفقك الله