ياه على ده ماتش


خلَّصت وجبة الغدا التى حلت مكان العشا عشان كنت نايم...
السمك كان تحفة والرز بطريقة ستة اتنين تلاتة ستة يهبل خالص...
نهايتو اخذت موقعي أمام شاشة دريم عشان ماتش الأهلي والزمالك...
الماتش من اول دقيقة إلى أن نفخ الحكم في البوق كان ساخن جداً...
الجميل في الأهلي إنه مش فقد اعصابه رغم ضغط أولاد الزمالك...
والأجمل في الزمالك انه نازل وفي عقل مدربه هدف الفوز على خصمه التاريخي...
بصراحة الزمالكوية لعبوا بحرفية عالية ويمكن ده بسبب جهود حسام حسن رغم أخلاقه الصعبة...
والأهلوية أثبتوا ان الخبرة خبرة وإن بوابة الأهلي عالية بقامة لاعبيه ...
بركات ده حد تحفة بجد تركيزه جامد وسرعة بديهة جابت هدف التعادل وتنفس الجمهور الصعداء...
اللذاذة بقا إن سهيلة بنتي جابت مخدتها وتقاسمت معي اللب والشاي الأخضر...
ومع كل صريخ من المعلق أو أي هجمة تقوم تتنطط وهاتك يا جوووووووووووووووون...
حاولت أفهمها إنها تختار الأبيض او الأحمر المهم يكون لها مبدأ في الحياة تشجعه وتتحمل نتيجة اختيارها...
لكنها لم تعبأ بما أطلت في شرحه وشجعت الفريقين حتى الإعلانات بين الشوطين كانت بتشجعها...!

1 عبرني:

أميرة يقول...

بصراحة رغم اني انهمكت في أعمال المنزل وما فضيتش اتفرج معاكوا الا ان صوتكم اللي جاب اخر الشارع كان دليل قوي على ان الماتش كان عظيم..
واهم حاجة فرحتني..
ان السمك عجبك
الف هنا وشفا يا حبيبي