لقاء السحاب


هو قائلاً بكل رومانسية: تشربي شاي..؟!
هي قائلة بكل رقة: لأ..ميرسي..بس ممكن اضرب بليلة..!!
هو يرفع حاجبيه بدهشة: حضرتك سبيشل في إختياراتك..
هي بإبتسامه وقد إعتدلت في جلستها: ميرسي خاااااالص..انت تري جانتيه يا مان..!!
هو وقد اتسعت إبتسامته حتي بلغت أذنيه: انا اللي لازم اقول للظروف ميرسي عشان اجلستك جنبي..!!
هو يسألها: ممكن نتعرف..!!
هي مستحية: هيلاري عسران خليفة...وحضرتك؟!!
هو بإنشكاح مفضوح: ساركوزي عبد المتجلي ساركوزي
ثم إستطرد قائلاً : نازلة فين حضرتك..؟!!
هي: والله بفكر انزل السيدة زينب..!!
هو بإبتسامه ودوده: بس جواز سفرك بيقول ان قاطعه تذكرة لبرشلونة...
هي ضاحكة: ايوة..ايوة..كنت عاوزة اشوف مصارعة التيران اللي هناك..بس الكرسي مش مريح خالص..عشان كده تلاقيني مش علي بعضي...
هو: مفهوم..بس نعمل ايه..معظم خطوط الطيران دلؤتي بقت زبالة...
هي: وحضرتك بقا نازل فين؟!
هو: لأ انا مش نازل..أصلي انا مع السواق...
هي: (تباع) يعني..؟!
هو: لأ للأسف مجموعي مكملش..بس انا صاحبه..يعني عشرت عمر..فتلاقيني معاه في كل دور بيعملوه...
هي: ياي..دي حاجه جميلة قوي...
فجأة صوت مذياع الطائرة يردد بعدة لغات : علي السادة الركاب إحكام كلبشات الأمان عشان إحنا داخلين علي كمين جوي.. واللي ما معهوش بطاقة ممكن ينزل قبل الكمين..!!
هي وقد إمتقع لونها: طب عن إذنك بقا انا هنزل هنا عشان نسيت بطاقتي في اليخت بتاعي أمام ساحل ميامي الجنوبي.
هو يوسع لها لتخرج قائلاً: طب مش هشوفك تاني؟!!
هي مانحة اياه إبتسامة علي الطاير: مادام بتيجي المطار كتير..يبقي أكيد هيحصل مباحثات ما بينا نخرج منها بتوصيات ملزمة...
هو: طب خلي بالك وانت بتقفزي...
ثم صاح بأعلي صوته: يمينك ياسطي..يا كابتن..كعب عالي نازل...قبل الكمين وحياة والدك...
لحظات..ثم نظر من الشباك المجاور..فرآها تحلق بالمظلة في الجو اسفل الطائرة بإنسيابية لا تناسب سنوات عمرها التي تخطت الستين عاماً بتسعة ايام وساعتين وعشرة دقائق وخمسة واربعين ثانية...
مسح دمعة لامست خيط المخاط المتدلي من أنفه...ثم أخرج جهاز لاسلكي مخفي في طيات ملابسه وعبث بأزراره ثم تحدث عبره بصوت خافت قائلاً: ألو... الوه ه ه ه...إبدأ الإشارة...ايوه ياباشا...في وحدة نازلة من الجو دلؤتي ومامعهاش بطاقة....حول..!!
"تمت"

24 عبرني:

اسكندراني اوي يقول...

باع القضيه بسرعه كده
يخونه طبق البليله ومحشي ورق العنب
ههههههههههههههههههههههههه

عصفور المدينة يقول...

عسل

بيتنا القديم يقول...

إسكندراني
.........
هههههه
ده حتي مستناش لما الولية تلمس الأرض..
(:
عالم تبيع ابوها والقضية عشان حفنة من ورق العنب..!!
تحياتي يا مان

بيتنا القديم يقول...

عصفور
.....
والله انت اللي عسل وسكر وجانتيه خالص
يا مان...
ما نفسكش في رحلة جوية...؟!
(:
(:
(:
كلنا لها...
دمت بخير وسعادة..وانا فخور بتشريفك ليا...ولمدونتي المتواضعة!!
تحياتي يا باشا

ammola يقول...

هى مزيج من الرومانسية والبوليسية والجاسوسية مع شوية شاى وبليلة
وهى قصة ذات مغزى انه مهما كان الالم والدموع والمخاط
فالواجب يحتم ان كل واحد يبلغ عن اللى جنبه

حوريه يقول...

رااااااااائع سمسم
الله يخليك يارب غيرت لى المود الهباب اللى كنت فيه
ههههههههههههههه
و الله سكر .. اثبت على كده و لا اقول لك التغيير حلو برضه
انا قريت الفاتحة و نطيت من الطيارة
باااااااااااى

sa'7so'7te يقول...

هاهاهاهاهاها
يا خبر على البيعة السودة و القلبة اللى قلبهالها
"كعب عالى نازل"
تعبير لذيذ اول مرة اعرفة

بما ان فيها ساركوزى و هيلارى يبقى اكيد فى مغزى سياسى
بس انا جاهلة سياسيا فهسيب المعنى فبطن الشاعر

truelove يقول...

الا قولي يا اسامة هي دي خطوط طيران السبتية امبابة ولا ايه بتهيلي ركبت في الخطوط دي قبل كده وانا مسافرة لدار السلام تحياتي يامان بس تفتكر بعمرها ده قلبها يستحمل القفز بالبرشوت

Jana يقول...

شرف المهنة روخر لا يكيل بالباذنجان
..
..
ولا بالبليلة

عرفت دلوقتى بس ليه مصمم تروح شغلك يوميا بالميكروباس

بيتنا القديم يقول...

أمولة
.....
(:

(:

(:

بجد تحليل في الجووووووووووووووووووون

مش عارف ليه تحليلك العميق بيفكرني

بالحاج "ارشيميدس" خرشم الله وجه..!!

تحياتي

بيتنا القديم يقول...

حورية
......
استني استني استني..!!

مش عارف افتح مدونتك

كل ما احاول الدخول الصفحة بتقع

هو انت آذيت حد او جبتي في سيرة الآسياد

من قريب..؟!
ـــــــــــ
متشكر علي التعليق التحفة..وخلي مودك سعادة وبلاش تشيلي الهم أحسن العمر مش بعزقة..!!
تحياتي
(:

بيتنا القديم يقول...

سخسوختي
......
(:
لا معني ولا حاجة..دي مجرد لخبطة سياسية ثقافية مهلبية....الخ
انت اخبار ايه؟!
وايه المجاميع والتقادير اللي تشرف دي المنشورة في عددكم الأخيرة من مجلة الضفدعة؟!!
(:
(:
(:
ربنا يوفقكم

بيتنا القديم يقول...

ترولاف
.....
ههههه
(:
(:
(:
ارجوك ما تحرجنيش خدوديني إحمرت..!!
محجوزلك علي طيران وكالة البلح اوعي تروح عليك نومة..!!
ماتنسيش الباراشوتش وتُرمس البليلة..
(:
دمت بخير

بيتنا القديم يقول...

جانا
....
هههه
(:
(:
(:
علي قولك..والله امبارح يا ام جني ولا ميكروباص عاوز يقف لي..ما اصلي انا لو كنت حاطط احمر وابيض ولابس بمبي كان
كل الميكروباصيين وقفولي..!!
(:
دمت بخير
وخلي مودك تفاؤل وسعادة ربنا يكرمك
يا فندم.
بالحق الآنسة جانا أخبارها ايه دلؤت
ربنا يكتر فيتامين د في سائر جسدها الملائكي..ويا بخت الشمس اللي بتشوف عصاعيص رجليها الصوغننين..!
(:
ربنا يحفظهالك ودمت بخير

حوريه يقول...

هو احنا ورانا غير سيرة الاسياد ؟ اقصد الاسود .. اسود الغابة ما تفهمنيش غلط
ورابط مدونتى اهه هو بس بيخاف من تحليلاتك الساركوزية الهيلارية لدواعى امنية

http://nadiataha.maktoobblog.com/

انا بلغت يفتحوا لك البوابة ياباشا من غير ما تقول كلمة السر

حورية

بيتنا القديم يقول...

حورية
.....
متشكرين يا فندم..!!
(:
ساركوزي بيمسي عليك
دمت بخير

Tamer Nabil يقول...

باعها عشان يستفيد

هيا الدنيا كدة وفى الحالة دى لاجديد

بوست مميز

تحياتى

بيتنا القديم يقول...

تامر
.....
سعيد بمرورك
وتعليقك البسيط المباشر..!!
ماتحرمناش من وجودك عندنا في بيتنا القديم اللي هو بيتك..!!
دمت بخير

شيمـــــاء يقول...

بعد الاكتئاب الحاد و الانقطاع
ارجع الاقى البلاوى دى كلها
:)

حلوة يا سمسم

بيتنا القديم يقول...

شيماء
.....
أنت الأحلي يا فندم....!!
(:
انت كنت مسافرة ولا ايه؟!!

ايه الغيييييييييييييييييبة دي..

يارب خير...!!

دمت بخير

MiraMar يقول...

تحفه
أنا هموت من الضحك
بس بجد ملعوبه وجوون وجون وجون
:))))))))))
هههههههههههه
ربنا يكرمك ويعلي مراكبك ويوفقلك ولاد الحلال "سواقين الميكروباظظظظظظظظظظظظظظ
:)"
بجد فانتازيا ملهاش حل
:))))))

بيتنا القديم يقول...

MiraMar
.......
وبجد وبجد وبجد

انا بضحك علي ضحكك الهيستيري

الحمد لله الذي من عليا وجعلني ارسم

الضحكة علي قلوب ووجوه اخوة لي في الله

(:

دمت بخير

بالحق ما قلتليش نازلة فين..؟!!

(:

يا مراكبي يقول...

ههههههه

حلوة بجد .. عجبتني قوي

بيتنا القديم يقول...

يا مراكبي
........
(:
طب الحمد لله..!!