صراع الاوغاد علي طشت الغسيل

رئيس الكوبانية في الثمانين من عمره يجيد كل انواع القتال والشلاليط..نمس ومخضرم..يجيد استخدام جميع انواع الاسلحة التي خلقها ربنا بداية من المطوة الي سفن الفضاء الليزرية..كما يجيد سواقة جميع شئ له عجلات بداية من التوك توك حتي الحصان ابو جناحات..كما وهو الاهم يجيد فنون التفاوض لكل شئ وعلي أي شئ..بداية من السروال حتي صيغة الولية وجهازها اللي دخلت بيه..الا ان نقطة ضعفه الوحيدة الخيار الاستراتيجي
ـــــــــــــــــــــــــــــــــــــــــــــــــــــــــ
استيقظ رئيس الكوبانية علي صوت رنين الكوز الجوال..جذب اليه حبل الكوز ووضعه علي اذنه السليمة..قائلاً نصف ناعس:

ايه ياولاد الجزمة مش هعرف انام زي مخاليق ربنا ولا ايه
صمت قليلاً ثم بغضب مكبوت قال:

طب ومصحيتونيش ليه يا شوية غجر
بعنف القي الكوز من يده فدشه علي الحصيرة

وصرخت زوجته بغضب وهي تطبطب علي العيال:

ياراجل يا مدهول صحيت العيال ولسه منيماهم منك لله يا بعيد
لم يعر سيدة الكوبانية الأولي إنتباهاً لأنه يعتبرها خنيئة..ودلف الي الكبانيه واغلق الستارة خلفه بعنف
ظبط نفسه وارتدي البيجامه السكري في لموني الشمواه التي حصل عليها في برنامج الجائزة الكبري
سرح شعره امام المرأة الوحيدة في القصر ووضع السبغة السودا بعناية
ونظر الي الامام بعزم وحزم
وحزم
وحزم
وحزم
ـــــــــــــــــــــــــــــــــــــــــــــــــــــ
جلس رئيس الكوبانية حول طشت الغسيل وامامه اعضاء مجلس قيادة المترو..ومر كثير من الوقت وهو يتفرس في الوجوه مما ذاد الجو كهربة وشعللة..ثم قال فجأة محتداً:

مين خد ساندويتش الفينو اللي عملتهولي مراتي من علي التسريحة

حملق الجميع وقالوا بصوت واحد:

مش احنا..عشان احنا ما بنحبش الفينو ابو سمسم..ده اكيد فرج فرج فرج عميل الموساد..اللي جه وسهر معانا اول امبارح علي سطوح القصر الجمهوري

صرخ رئيس الكوبانية في اعضاء مجلس قيادة المترو قائلا:

يعني ايه يا استاذة ازاي عميل الموساد يدخل البلد وانتو نايمين..
لم يتلق اجابة لأن الجميع كانوا ما بين مشغول بلعبة علي الكوز الجوال..او واضع سماعة الام بي ثري علي اذنه ويدندن
صرخ فيهم بعنف فطار طقم اسنانه في الهواء واستقر في حلق احدهم..مما استدعي هبوط افراد مكافحة الحلوق من سقف الخُص بتاع عشة الاجتماعات..وبمهارة شديدة وبدون أي ألم قطعوا للرجل رقبته وفصلوا رأسه عن جسده واخرجوا طقم السنان سليم ومية مية
وضع رئيس الكوبانية الطقم بين درديره وتبسم ابتسامة ذات مغزي..وقال للجميع:

مين ياشطرين اللي هديلوا حاجة حلوة ويقبض علي عميل الموساد الرهيب
إستعبط الحاضرين وحاولوا التسلل واحداً تلو الآخر بحجة الذهاب الي الكبانيه..أمرهم رئيس الكوبانية بالجلوس..ثم قال بزفرة قرف خنيئة:

إستدعولي رأفت الهجان
قال الجميع في صوت واحد:

بيقضي شهر العسل في تل ابيب مع إستر بولونيسكي
قال رئيس الكوبانية مندهشاً:

ايه ده هو لحق باعنا
قال الجميع بصوت واحد:

من يوم ما استلم شوغلنتو الجديدة في منظمة جواسيس بلاحدود
رد رئيس الكوبانية بإشمئزاز:

طب اندهولي جمعة الشوان
رد الجميع بصوت واحد:

بيقضي سنة سجن في تل ابيب
رد الرئيس مصدوماً:

ليه ماهو ملفه اتقفل من بعد ماجاب الجهاز
رد الجميع بصوت واحد:

عض صوباع رئيس الموساد الاسرائيلي وهو بيهرب منه
هتف الرئيس بنفاد صبر:

طب حد يشوفلي ادهم صبري
رد الجميع بصوت واحد:

مع مني في المستشفي
صعق رئيس الكوبانية قائلاً:

ليه كفانالله الشر البت صحتها حديد في عشرة الخمسين وماشيه علي رجليها
رد الجميع بصوت واحد:

إتقلبت بسبت الغسيل من فوق سطوح مبني المخابرات عشان كانت بتنشر الطقم بتاع سي ادهم اللي هيلبسوه في عمليته الجديدة

صاح الرئيس متوتراً:

طب وفين قدري

قال الجميع بصوت واحد:

عليه قسطين متأخرين من اقساط التلاجة وهربان من بتوع شارع عبد العزيز و مش عايز يدفع
صرخ الرئيس منفعلاً:

طب فين نور ورمزي ومحمود
رد الجميع بصوت واحد:

نور في مستشفي الجلاء مع سلوي عشان بتولد..ورمزي خدوه بتوع الفضاء عشان يصلحلهم الدش..ومحمود تعيش انت..

صاح رئيس الكوبانية منفعلاً:

لأااااااااااااا..أوغااااااااد.. الا محمود ده لا بيهش ولا بينش..وعليه فلوس جمعية..وبيكون نفسه..ايه اللي حصله

رد الجميع بصوت واحد:

رجلو اتكسرت لما حاول يمنع وحوش القمر من اختطاف سندويتش الشاورمة بتاع نشوي بنت نور اللي عضت لسانها هي كمان ونقلوها عنبر الكسور اللي في كلية الزراعة بعد ميدان السيدة عيشة
انتصب رئيس الكوبانية قائلاً بحزم:

اذن لم يعد لي ولا خيارة واحدة..جهزوا لي الموتوسيكل النفاث بتاعي اللي اخترعوه علمائنا في عيد شم النسيم اللي فات..انا هقوم بالعملية دي لوحدي
ثم اردف متسائلاً وهو يداعب المطوة في يده:

قولتولي بقا عميل الموساد ده لابس ايه
رد الجميع بصوت واحد:

اسمه فرج..ولا بس تي شيرت مقلم عليها بادش مكتوب فيه "لو سمحت ماتسلمش عليا انا في عمليه سرية"..وساكن في عمارة خمستاشر علي اول فيصل الدور الرابع الشقة اللي علي ايدك اللي بتاكل بيها وهتلاقي جنب بابها صفيحة زبالة
والباب مكتوب عليه"فرج فرج فرج..عميل موساد ممنوع الازعاج"
شخص رئيس الكوبانية ببصره قائلاً بشرود:

انا اللي هدور عليه بنفسي..

ثم قال وقد اغرورقت عيناه بالدموع متأثراً:

حد معاه ساعة يا جماعة يشوفلنا الماتش النهائي هيتذاع الساعة كام قبل العملية
ثم قال وهو يدير الموتوسيكل:

ادعولي يا شباب اعرف الاقيه من بين 75 مليون مصري كلهم شبه بعض
دار الموتوسيكل عندما هتف الرئيس بقوة:

ياعدوووووووووووووووووووووي
صاح والموتوسيكل يمخر به عنان الفضاء مخلفاً وراؤه خيطاً ابيض إتنسل من رجل البنطلون:

ادعولي يا غجررررررررررررررررررررررررررررررررر
وانطلق رئيس الكوبانية الهمام الي اعماق المجهول
دون شمعة
دون ولاعة
دون كبريت
ودون ان يأخذ الورقة اللي فيها العنوان
ــــــــــــــــــــــــــــــــــــــــــــــــــــــــــ
انتظروا الجزء الثاني في العدد القادم:"الرئيس مسكوه في المترو"