مبارك..عايش شحاته منافع


اهلاً يا شباب
سمسم عاد اليكم من جديد
لا ..كلاكيع
لا..عقد نفسية
لا..مطبات اجتماعية
فقط أمل..ولا شئ غيره
علي فكرة هواء ما بعد صلاة الفجر ما فيش زيه
انا سمعت ان الاوزون بعد الفجر مباشرة بيكون قريب من سطح الارض
فبيجدد خلايا المخ وعلي رأي المثل رطلين مخ خيرمن قنطار كبدة
بس مش ده موضوعنا...كنت هدخل بيكم صلاح سالم بدل اوتوستراد
المهم
انا اقدم شكري للسيد الرئيس علي الغدوة بتاعة امبارح..الرنجة
يا سلااااااااااااام..اكثر من رائعة..وانا كنت بحسب ان ام جمال مالهاش في الطبيخ
اصلها بصراحة مقضياها حقوق نسوان..من المركز ده..للمعهد ده..وعماله تقوم الستتات علي جوزهم
جهل بقا بعيد عنكم
والاولاد علاء وجمال بيلعبو حوالينا واديهم مزفرة..ياسلااااااااااااااااام..هي دي الحياة
والشاي اللي خدناه في جنينة قصر التين اللي في بولاق..حقيقي يا ريس انت ذوق ذوق
وبحييك علي النقاش الجرئ اللي عملتو معايا..بجد كنت بحسب النقاشات دي حكر بس علي يديعوت احرنوت وجيروزاليم بوست
اليهوديتين..لاقيتك ياريس كريم شانتيه خالص..لأ وبحبحت بقا وشلحت طرف العباية والكلسون باااااااااان..واديتها كمان حرية
لأ وصوتك صوت اسد
الشااااااااااااااااي يام علااااااااااااااااااااء
ياسلام..والله يا شيخ اكيد ده هو هو حسك قدام تسيني ليفني ورايس وبوش وبقية الوغش دول
لأ..ولما ام علاء وشوشتك في ودنك ان السكر خلص..رحت انت شخطت فيها شخطة سيبت ركبي..وقلتلها بنخوة شقت جدار مناخيرك..هاتي يا وليه من الفلوس اللي في الدولاب تحت السراويل فلوس المعونة يا وليه..وتاني مرة توشوشك الولية الرخمة دي وانا حاسس انك محرج مني..فبادرت بقولي لك..ولا يهمك يا ريس كلنا عارفين ان اوغاد الكونجرس قطعوا 100 مليون دولار ..رقبتنا ليك ياريس..بس انا مش عارف بجد..ليه مش بتثق فينا..يعني احنا اغني بجد من كوريا الشمالية..مواردنا احسن من موارد اليابان..بترول في كل حته..ارض زراعية جراد يوسف والي مقدرش يخلص عليها..منافذ مرور بتشع عملة صعبة قناة السويس مثلاً..نهر شاقق بلدنا ومضلل عليها..بحرين يا مفتري شمال ويمين واحد احمر والتاني ابيض..يعني هنا مية لون وهنا مية لون والكل سيربح المليون
معجبنيش كلامك ان احنا دولة نايمة يعني نايمة ماهو النايم لازم يصحا..وبردو معجبنيش كلامك بتاع ان الشعب رمه ووغش وحثالة وعربجي ومش واخد علي الديمقراطية وتخشي عليه ان تفتح عليه الدنيا فيعيث في الادغال فساداً..طب ماهو ياريس الشعب ده انت منه وهو منك..استني بس بربك ياشيخ مش لو انت مسك مكروه من اسرائيل ولا امريكا مين اللي هيقف جنبك..مين اللي هيحميك بجسمه..ياريس انت صحيح منوفي بس والله بنحبك..خلاص بقا صالحنا عشان نصالحك..وبعدين تعالي هنا انت مجاوبتنيش عن المهزلة بتاعة الواد ساركوزي وعشيقته..يارجل ده العالم موزع صورة مصر مركبة قرنين
لأ لأ لأ..يا ريس..تؤ تؤ تؤ ..عيييييب خالص ومالص..مش احنا ياريس..انا عارف ان معظم السياح كده..بس معلش دي زيارة رسمية..يعني احنا موافقين ضمناً علي المسخرة دي..ياريس لا يقرب الجنة ديوث ولا يشم ريحها..عاوز اشرحلك يعني ايه ديوث..بس عيالك بيلعبو حواليا علاء وجمال..ومش عوزهم يسمعو الفاظ زي دي..اجري يا حبيبي اللعبو جوة في البلكونة عمو ساركوزي جايبلكو موز مع الحتة بتاعتو
وبعدين ياريس ايه اللي محببك قوي في الخيار الاستراتيجي..ما انت عندك خيار بسيماتي..وخيار مكس..وخيار بلدنا..ياريس خيار السلام الاستراتيجي هيجبلك سرطان..ده كله كمويات ومواد مسرطنة..وادينا اهو اليابان طلعت القمر والصين وروسيا وكيان الاحتلال الصهيوني وكمان اميتبتشان بتاع ناهي ناهي
ياريس وحياة النعمة الطاهرة دي..ولا اوعي اطفحها معاك تاني..محدش هيحبلك الخير غير شعبك..انت منه وهو منك..نسيت ياريس ايام الترعة ايام الخير وانت بتجري بلبوص وترتمي في احضان ترعة كفر مصيلحة..نسيت عيدان القصب..كنت مكنة يا خلبوص..هاتك يا حشت حشت وبعدين سنيف سنيف..فاكر..فاكر العيال اللي كنت بتلعب وياهم شيكا علي العالي وعلي الواطي
خد بالك انت ركزت علي الواطي وتنحت للعالي..ياريس العيال طفشت وغرقت في سواحل اوربا..مفكرتش ايه اللي سفرهم وغرقهم وغربهم..طب بلاش دول البنت الغلبانة اللي الظابط كان بيقلعها هدومها وبيسكعها بالإقلام علي وشها..طب دي لو كانت بنتك..بلاش يا عم بنتك..دي لو كانت خديجة الجمال مرات جمال..كنت ترضي حد يقلعها ويضربها ويصورها كده..
متقليش بقا ماشفتش الواد اللي انتهكوه والراجل اللي شبخوه والست اللي داسوها بالعربية..ياريس الشعب مكبوت..بالظبط زي وابور الجاز بتاع امك زمان فاكره..قبل ماتدخل الغاز في قصرك..وممكن ينفجر بس الانفجار هيكون في وشك..ووش كل اللي يتشددلك..وللأسف ياريس ساعتها مش ممكن هتلاقي حد من الحوش اللي حوليك يتشدللك..عشان هما بيحنو فلوسك اللي هيا فلوسنا..دول حته ما بيدفعوش اجارات الشقق اللي ساكنين فيها بقالهم كذا شهر
معتمدين ياريس علي طيبتك وانك بتسمع بودن واحدة والتانية ما بتسمعش بيها..ياريس شعبك فاهم كل حاجة نووي واتفاقيات وغزة وسرقة وبترول واعتقالات وطيارة انفجرت في السما عشان ماكنتش معلقة خرزة زرقا في كابينة الطيار والبطوطي..علي فكرة بقترح ندهن طيارتنا بزيت من قنديل ام هاشم..ونكتب علي ديولها "ماتقصفنيش ياعبيط ده جايبها بالتقسيط..زي التوتوك...و...و....و....بس مطنشين..والودن ام الطين والتانيه ام العجين هيجيها يوم تشقق وتدقق وساعتها...وساعتها...وساعتها....
الحلوياااااااااااااااااااااااااااااااااااااااااات يا ام علاااااااااء الكلام أخدنا والريس نعس مني

8 عبرني:

lonely يقول...

اولا عودا حميدا يا سمسم
ثانيا: واضح انك راجع حامى اوى
ثالثا :بالنسبه للولاد الوحشين اللى بيسافروا ويغرقوا دول مشايخ الدوله الاعزاء اعتبروهم مذنبين
عارف ليه عشان هما بيلقوا بانفسهم فى التهلكه
بجد دول شباب وحشين
يبقوا عايشين فى النعيم دا وكل واحد ليه وظيفه بيقبض منها بالدولار
وشقه عالنيل
ويروحوا يعملوا فى نفسهم كدا
لا لا دا افترا بجد وهما اللى يستاهلوا
اما بقا بالنسبه لساركوزى وعشيقته
فالقرون متركبه من زمان اوى عاللى فى الداخل
هنشيلها عشان السياح يعنى
ولف الفنادق وانت تفهم
عام سعيد

حوريه يقول...

بسم الله ماشاء الله لا قوة الا بالله
حمدا لله على السلامه ابو السماسم العجيب
واحشنا كتيييير خصوصا بساطك الاحمدى
رااائع و الله رجوعك الحلو ده احلى هدية منك لنا كلنا ..
بص .. انا هخطف رجلى للمطبخ اعمل كباية شاى حلوة و ارجع اقرى الموضوعين الحلوين دول على مهلى .. اتفضل شاى معايا .. رااااجعة تانى
و يجعلوااااا عاااامر دايما يارب
حوريه

حوريه يقول...

جرأة .. أحييك عليها .. و رؤية عبرت عما فى نفوس و عقول شعب بأكمله بكل واقعية ..
شعب ..
فقد القدرة على التعبير لانه أجبر على ان يكون معاقا فى زمن الديمقراطية ..

تحدثت فأبدعت لتكتشف ان من تحدثه .. نائم ..
و لكن .. لابد من يوم يستيقظ فيه من كان نائما ..
ندعو الله الا يكون استيقاظه .. بعد فوات الاوان ..
سلمت يداك أخى .. وفقك الله و رعاك
حوريه

islamist bloke يقول...

يجعلو بالمعارضة عاااااااااااااااامر

بحبك


والسلام

بيتنا القديم يقول...

lonely
........
اولاً جزاك الله خيراص وربنا يكرمك
ثانياً شكلك كده عارفه كل حاجة وناوية علي عيش وحلاوة!
لأ
يا ستي مالناش في السياسة..عندنا عيال عايزين نربيها..!!
سلام

بيتنا القديم يقول...

"رجوعك الحلو ده احلى هدية منك لنا كلنا..."
.
.
.
ربناااااااااااااااااااااااا يخليك

والله انتم ناس بجد محترمين..!!

(:

دمت بخير

بيتنا القديم يقول...

حورية
.....
"لانه أجبر على ان يكون معاقا فى زمن الديمقراطية "
.
.
.
نعم هو كذلك

دمت بخير

بيتنا القديم يقول...

احمدوف
.....
وانا يا صديقي ويا اخي الحبيب بموت فيك
.
.
.
(:
دمت بخير