الشخصية الانتهازية


اليوم الثلاثاء
الوقت حار جداً بعد الظهر
المكان مترو الانفاق
الحدث زي الزفت
ممسكاً بالجرنال بكلتا يديه
جلس بين الركاب في العربة الخامسة بجوار الشباك
الصهد قاتل والهواء دراي جداً
العرق الي الكعبين بل ربما وصل الي الركبتين
مجموعة مندفعة للنزول قبل تمكن الاخري من الركوب
تساوت القوتين وتلاشي امل الفريقين
هيلا هوب هيلا هوب
يالاهوي هموت يا ولاد الكلب
يا خونا واحده حامل
نزلنا يا بني عندي اللوز
انت قليل الادب
انا جيت جانبك هتتلكككي
فاصل من
يا بن
يا بنت
يا بن
يا بنت
عيب يا استاذ
مش كده يا آنسة
.................
فجأة الباب ينغلق مع صفارة إنذار ببدء تحرك القطار
فجأة تانية غير فجأة الاولنية نفس بشرية إنتهازية تشق الجمع خارج المترو
وتنقض علي قارئ الجرنال الممسك به بكلتا يديه الجالس جنب الشباك
ويختطف منه الموبايل اللي كان ماسكو هو كمان بكف اديه الشمال مع الجرنال
هرب السارق صرخ المسروق اندهش الرهط
راح الموبايل

20 عبرني:

ammola يقول...

حلوة اندهش الرهط دى
لو كل اللى بيقولوا علم نفس زيك كنت حبيته من زماااااااااااان

Anima يقول...

هيلا هوب

ابقى خد بالك من الموبايل
هههههههههههههه

islamist bloke يقول...

مين اللى اتسرق محموله؟

اوعى يكون انت؟


ازعل اوى ان محمولك يتنتش منك كدة ومتعرفش تعمل حاجة



ربنا يرجعهولك بالسلامة وعلى فكرة يا سمسم الفلوس الحلال بترجع تانى على طول اسأل مجرب




انا عايز اتكلم معاك شوية على فكرة


انا تعبان اوى واتبهدلت فى الامتحان اخر بهدلة

حاسس انى عايز اعيط من اللى عملته

ااااااااااااااااااااااااه يا امة

ادعى لى يا سمسم عشان انا خربتها اوى اوى

سلام

حوريه يقول...

بوست معبر و جميل حسسنى بالخنقة كانى معاهم .. بس الحرامى ده وقح جدا

اشكرك سمسم على زيارتك لمدونتى و بعتذر لانى مش عارفة اكتب فيها لا ردود و لا موضوعات جديدة مش عارفة ايه اللى حصل و ادينى بحاول
دعواتك
حوريه

غير معرف يقول...

نفس بشرية "انتهازية" تشق الجمع خارج المترو وتنقض على قارئ الجرنال الممسك به بكلتا يديه الجالس جنب الشباك ويختطف منه الموبايل اللى كان ماسكو هو كمان بكف اديه الشمال مع الجرنال هرب السارق صرخ المسروق اندهش الرهط راح الموبايل وجول وجول وجووووووووووووووووووووووول الله الله الله الله عليك اعتذر طبعا على الاسلوب لكن ايه يا أخ سمسم احنا فى ماتش لكرة القدم اسلوبك يشجع الجميع على الهزار اسلوب معلق لكرة القدم مش صحفى
بيناقش مشكلة تهم المجتمع ككل انت تعرف ان معظم شباب بلدنا يتميزون بهذه الشخصية الانتهازية بدل من الهزار نناقش المشكلة ايه السبب اللى خلى الحرامى يسرق هل هو انتهازى طب انتهز ايه الموقف طيب واللى بينتهز الفرص للوقيعة بزميله فى العمل علشان ياخد مكانه مش انتهازى مش انتهازية واللىبينتهز الفرصة علشان يسرق الناس كلها تهرب من ضرائب سرقة كهرباء واللى ينتهز فرصة افتراض حسن النية من الاخرين ويغدر بيهم ويعمل زى ما قلت انت فى موضوع سورى مقدرش اتجوزك واللى واللى واللى الانتهازية سبب لحاجات تانية كتير نناقش ونعرف ايه سبب الشخص انتهازى هل هو بطبعه كده ولا فيه اسباب يعنى على الاقل نناقش ليه الحرامى انتهز الفرصة اللى اتيحت له وسرق الدولة موفرة ليه سبل معيشة شريفة تخليه مينتهزش اى فرصة ويسرق؟ يعنى نناقش ونوجد الحل وبعدين نهزر زى ما احنا عازين اعتذر لو كنت حاد فى كلامى

سمسم يقول...

أمووولة
.......
هههههههه

طب احنا لسه فيها

يالا بينا علي العباسية قوام

قبل ما تغيري رأيك

تحياتي يا فندم

ودمت بصحة جيدة

تحياتي

سمسم يقول...

انيما
.....
حمدالله بالسلامة

كنت فين يا شابة

عموماً مش انا اللي اتسرقت

وبعدين موبايلي يعلم السارقين الامانة

تحياتي

سمسم يقول...

أحمدوف
.....
مش انا يا حاج والله

ربنا يرحم والدتك

ربنا معاك يا مان

تحياتي

سمسم يقول...

حورية
.....
حصل ايه لمدونتك كافانه الشر

شد حيلك

كلنا لها

ولا شكر بين الاخوة

تحياتي

سمسم يقول...

مجهول
....
لم اقصد سوي العرض باسلوب بسيط

المداعبة جزء منه..ليست مقصودة بذاتها

اشكر لك حرصك الاكاديمي ولسانك اللاسع

اما بخصوص الشخصية فهي قيد التمحيص

تحياتي

غير معرف يقول...

الاخ سمسم اشكر لك شكرك ولم اقصد بالطبع الاساءة لكن التعليقات تدل على انها كانت دعابة وسبيل للهزار مما يؤكد اسلوبك وما فهمته انا ولكن من الواضح انك لا تقبل النقد اعتذر مرة أخرى

سمسم يقول...

مجهول
.....
والله العظيم يا فندم مش قصدي ان ازعلك وده واضح من تعليقي علي تعليقك..ثم انا شكرتك علي حرصك الاكاديمي ودي منش تريقة دي بجد
وبعدين انا لو مش عاجبني تعليقك مكنتش نشرته..ثم وده الاهم مش كل اللي بيعلق طريقته زي التاني ومن واجب صاحب المدونة من وجهة نظري علي الاقل ان يتعامل ويتواصل مع الجميع الذين عبروه ودخلوا وقرؤا ما كتب ومدحوا او نقدوا وكنت انت من جملتهم
اما بخصوص الجملة بتاعة ده اسلوبك وده اللي انت فهمتوا فارجوا توضيح ذلك لازالة اللبس ان اردت صفاء ما عكره شيطان نزغ بيننا
ملحوظة
انا ختمت ردي عليك بجملة ان الشخصية الانتهازية قيد الاعداد للنشر وان ما نشر كان من باب الترويح عن القراء حتي لا يصاب احد بالسآمة وهذه طريقتي ولا اجبر احد عليها
لك وافر احترامي لشخصك
ودمت بخير
وتحياتي

Mohamed A. Ghaffar يقول...

الموبيل بس؟

غير معرف يقول...

الاخ سمسم انا لم اقل ده اسلوبك وده الى انا فهمته انا قلت التعليقات تؤكد اسلوبك وما فهمته انا وما اقصده هو ما اشرت اليه من قبل فى اسلوب الهزار. والتعليقات تؤكد انك بتهزر واللى انا فهمته انك بتهزر وكنت اقصد فى الموضوع ده بشكل خاص ولم اكن اقصد حسب ما فهمته انت اسلوبك بشكل عام. لانى ببساطة لا اعرفك حتى احكم على اسلوبك.على فكرة احنا بصدد تحليل للنفس البشرية وتحديد طبيعة كل شخصية انت عندك افتراض سوء النية اجعله فى حساباتك عند تحليل الشخصيات القادمة.

سمسم يقول...

عبده
....
افصح عن مكنوناتك

انت قلقتني

هو انت كنت في المترو ؟!!

تحياتي

المرتابة !!!

سمسم يقول...

مجهول
....
بالعكس لم افترض فيك سوء النية بدليل انك طلعت عند حسن ظني
ولو رجعت لتعليقي الاخير تجد انني قلت لك ان توضح جملة معينة لازالة ما قد يوجوده الشيطان بين الاحباب من لبس او سوء فهم
ولنا في يوسف عليه السلام اسوة حسنة حينما قال "بعد ان نزغ الشيطان بيني وبين اخوتي"...تمام
واهلاً بيك وبتعلقاتك ولك موفور الحرية في الرد والنقد والتعليق علي ما اكتبه
واعتقد ان النقد البناء هو من صفات خير امة..الا تتفق معي في ذلك؟!!
تحياتي

أيامنا الحلوة يقول...

ياحسرة قلب الراجل صاحب الموبيل .. معلش بقى ربنا يعوضوا.. صحبتي كان هيتسرق منها الموبيل بس باسلوب شيك خالص .. واحد جه في المحطة وقالهاانو بيستاذنها انو يعمل مكالمة ضروري من على تليفونها .. البت انحرجت راحت مديالو الموبيل راح خدو وطلع جري .. بس على مين اتقفش اتشنكل وقع.. اينعم الموبيل نزل حتت على الارض بس الفلوس الحلال مش بتروح برضوا

أميرة البلطجية يقول...

انا جيت
يا ريت كمان تختار نموذج مكلكع عن كده..يعني انتهازيته بتبان في مواقف مش زي السرقة..لا زييييي..التعاملات جوه البيوت او اماكن العمل ..وخليها برضه بالطريقة الكميلة دي (مش الاكاديمية) وطبعا هاتلي معاها شوكلاته

سمسم يقول...

ايامنا الحلوة
............
انتي فين يا عسل؟!!

طب الحمد لله ان الانتهازي اتقفش

بس اتريه عمل حسابو وجدد في

استراتيجيته هذه المرة

تحياتي

سمسم يقول...

مولاتي
.....
انت فين يا مولاتي..محسوبك اتبعزأ

أكاديمياً

مش تيجي تحوشي عني

يكون في معلومك انهيار الممالك بيبدأ من

البطانة او الحاشية او الطبلاتية او

من الحزب الوطـ.....طبعاً مش محتاجه كلام

تحياتي