بث مباشر من سفن الحرية

Watch live streaming video from insaniyardim at livestream.com

وقفة مصرية..!

مبارك يتصل بالسفير الصهيوني ويوبخه بشدة: اللي حصل ده تهريج يا يتسحاق يا ليفانون..

انتو عاوزين شعبي يقول علي ايه؟!

متواطئ معاكوه؟!

غزه وحاصرناها ومستحملين الشتايم من اللي يسوا واللي ما يسواش..

الشعب وبيعناه هدومه وشحتناه على الارصفة وماشي بيكلم نفسه..

معارضة وسحلناها وسففناها تراب طره وابو زعبل..

ايه تاني عاوزني اعملهولكم..

اخلع بلبوص وادور في الحواري زي المهابيل اطبل على صفيحة فاضية..

بلغ نتنياهو احتجاجي الرسمي على قتل المدنيين الغلابة بتوع الاسطول..

وقوله ان الله يحب اذا عمل احدكم عملا ان يتقنه..

واني بعتب عليه عتاب شديد اوي انه مفجرش الاسطول باللي فيه..

وده عشان يكونوا عبره لبتوع حقوق الانسان وياكولهم السمك..

وبلغه كمان انه لو كان خايف من غضبة الشعب العربي فيحط في كرشه بطيخه صيفي..

انا مظبط شعبي امتى يصحا وامتى ينام وامتى يغضب وامتى يمشى تحت الحيط..

دول 30 سنة حكم يا عم الحاج مش ديمقراطية خايبة ولعب عيال..

المهم..

قوله متزعلش من الفضائيات انا حكرشهم عشانك من على النايل سات..

وللأسف انا سرحت الولاد بتوع الضفادع البشرية اللي غرقوا المدمرة ايلات..

وطلعت كل الضفادع معاش مبكر ومنعت عيالهم وعيال عيالهم من دخول الجهادية..

ماهو لو كان عندنا ضفدعين تلاتة كنا ودناهم مع عزت العلايلي ومادلين يساعدوكم..

ده لأن هذا الأسطول الغرض منه انا عارفه كويس وهو احراجي أنا بصفة شخصية..

لأن انا موقفي ثابت ومتمسمر مع مبادئ اتفاقيات السلام الشامل والعادل وناصع البياض..

ثم وهو مال اردوغان بتاع تركية بغزة واللي بيحصل فيها هو مش جحا اولي بلحم اخواته..

اللي غايظني وفاقع مرارتي يا يتسحاق يا خويا ان اردوغان ده ما يعرفش ينطق عربي صح..

الخلاصة احنا عاوزين نعمل فيلم يظهر براعة ابطالنا الصهاينة اللي خرجوا في الفجرية يغرقوا اسطول الحرية..

فيلم كده أكشن كله تضحيات زي بتاع المدمرة ايلات ونخلي عزت يطلع المره دي ظابط صهيوني حليوه..

وياريت نغير كلمة السر بتاعة غنوة العزبي "بين شطين وميا " ونخليها بتاعة اعلان فيري "عازراعية يارب اقابل اسطولي"..

نهايتو بقا الرصيد قرب يخلص ولسه مستلف 6 جنيه وكمان مستعجل على الحمام ..

بوسلي نتنياهو من بقه وقوله يا كخة اتصل بعمو عشان وحشتني يا واطي يا زبالة يا ابن الكلب...!

يعني أيه مصر زيرو !!!!

يعنى يقولك ان من اهم انجازات عصر ما بعد الثورة هى مجانية التعليم.....و اى اسرة فى مصر بتبيع اللى وراها و اللى قدامها علشان الدروس الخصوصية!!!!
يعنى ابويا يسافر و يتغرب و يوفر شقة لولاده من فلوسه محدش دفع له فيها حاجة.......
و ييجى بطرس غالى يفرض عليها ضريبة عقارية.!!!!!!!!
يعنى حسنى مبارك يعمل سور لقتل اطفال غزه ..... ويطلع واحد يقولك البرادعى عميل لاسرائيل !!!
يعنى وزير مالية عمل قانون الضرائب العقارية وقال هيدفع عن القصور بتاعته .......
وبعدين يطلع يتعالج على نفقة الدولة
يعنى وزير صحة شريك فى كبرى مستشفيات البلد )دار الفؤاد) و مراته تتعالج على نفقة الدولة
يعنى ناس غلابة و مش لاقيين الزلط حتى ... وعضو مجلس الشعب يطلب منهم ثلث قيمة قرار العلاج على نفقة الدولة رشوة عشان يتعالجوا على نفقة الدولة
يعني نزود و نمد الغاز لإسرائيل مدعم لعشرين سنه جايه و المصريين مش لاقيين أنبوبه بوتاجاز
يعني وزير الإسكان يبقي سمسار اراضي!
ووزير التعليم يبقي بلطجي قديم !
ووزير الصحه بيتعالج علي نفقة الدوله !
يعنى جمال مبارك يسرق فلوسنا وارضنا ويوزعها على اصحابه ...... و ييجى واحد يقولك اللى تعرفو احسن من اللى ما تعرفوش
يعنى تبقى واثق أيام اختيار الدولة المضيفة لكأس العالم 2010 ان مصر هاتخدها هاتخدها لإنعدام الامن فى جنوب أفريقيا و عدم و جود بنية تحتية فى المغرب و فجاة تاخد صفر كبييير من لجنة الفيفا
يعنى يطلع واحد فى التلفزيون يقولك آه البرادعى ...عارفه عارفه دا حمدى غيث بتاع انا البرادعى يا رشدى.........
و يبقى تامر حسنى و شعر صدره من علامات الرجولة و لا حول و لا قوة الإ بالله
يعنى يبقى عندك ثلث آثار العالم فى مدينة واحدة بالأقصر و تلاقى دولة زى تونس عدد السائحين فيها اكتر من عندك
يعني تترشح في الانتخابات عن فئة (العمال) وتنجح فتعيش عيشة (الملوك(
يعني الحكومة تمنع التدخين جوه القطار علشان تحافظ علي أرواح الناس ....
ويروح القطار بكل اللي فيه مخيش في قطار تاني.
يعنى تبقى الدول العربيه اللى مكانش حد يسمع عنها زى دبى وقطر والبحرين كلها نظام ونضافه------ وحنا اللى كنا بنعلمهم من 30 سنه الزبالة وعدم النظام في كل مكان ورئيس الوزراء بيقول ان وجود الزبالة بالكثرة دي بيدل على الغنى الي عايش فيه الشعب المصري
يعني تبقي نسبة التحرش الجنسي بالفتيات في الشارع المصري والمواصلات العامة اكتر من 80% .....
والحكومة تطالب بخلع النقاب !!!!
يعني لما الشعب ما يلاقيش سكن ويروح يسكن في الجبل ويقع عليه يقولوا عشوائيات
يعني لما الناس تتغرب ولما تيجي ترجع تركب عبارة تعدي بيها البحر والعبارة تغرق وحوالي 1500 واحد يموتوا .... يطلع التحقيق انهم ماتوا بنزلة برد عشان لما غرقوا ماكانوش عاملين حسابهم وماتقلوش هدومهم
يعنى قناة ال BBC فيها مذيعات محجبات... و تلفزيون بلد الأزهر بيمنع ظهور المذيعات المحجبات!!!!!!!!!!!
يعني مصانع الحديد كانت بتبيع الطن ب2000 جنية وييجي بقدرة قادر احمد عز
محتكر الحديد يبيعه ب8000 جنية ........ تيجي الحكومة تعمل له قانون تفصيل مخصوص ليه عشان تحميه من بطش الناس
يعني يبقي اليهود نهبوا فلوس العالم عشان الهولوكوست الوهمي ...ويتباهو بقتل اسرانا في تليفزيونهم ومحدش يقولهم حاجه !
يعني يعملوا قانون ضرائب جديد على العقارات .......
والشعب الي مش ناوي يدفع يموت نفسه عشان يجيب الاقرار ويتباع في السوق السودا كمان
لما وزير التربية والتعليم المسئول عن تخريب الثانوية العامة وتعديلها اكتر من مرة خلال 4 سنوات والغاء سنة 6 من الابتدائي ..... يكون رئيس مجلس الشعب وممكن رئيس جمهورية كمان في حالة وفاة الرئيس
يعني قطارين بيخيشوا في بعض .... واللي يتحاسب الكومسري وفي مقولة اخرى البقرة الي كانت واقفة على القضبان
يعنى تروح مستشفى حكومى وتجيب كل حاجة على حسابك(قطن وشاش وأدوية ) ناقص كمان دكاترة وممرضين ووزير المالية وزوجة وزير الصحة بيتعالجوا بالملايين على نفقة الدولة
يعني تبقي عندك بحرين و نيل قناة السويس و11 بحيره وبتستورد السمك من بره !
يعني يتحرق مجلس الشورى
.... والشعب يدعي ربنا ان النواب يكونوا جواه
لما الاعلام الحكومي والخاص مش همه الشعب الي مش لاقي ياكل ولا يلبس ولا يسكن وطبعا بدون عمل ...... وهمه كله يعرف مين قتل سوزان تميم والمحكمة هتحكم بايه في قضية مرتضى منصور وشوبير !!!
لما الدايرة الي فيها 2500 صوت .....
مرشح الحزب الوطني ياخد لواحده 13000 صوت
يعنى لما يكون المزارع مش عارف يزرع ارضه بالقمح علشان نحتاج امريكا ------------ ولما يزرعه ياخدوه ارخص من المستورد 3 مرات
لما يمنعونا من زراعة القطن الي بنتميز بيه وبعد كده يروحوا يبيعوا مصانع الغزل والنسيج لمستثمرين يهود يسرحوا العمالة ويقطعوا الشركات ويبيعوها اراضي على النيل
"يعني
كلنا خايفين علي مستقبل مصر واللي ماسكينها خايفين علي مستقبلهم هما"
لما يكون الملاك فى الرحاب بتدفع 12 جنيه على المتر مسطح بدل فرق الصيانه ---------- يقوم الباشا هشام طلعت يدى سوزان 50 مليون من جيب امه
يعنى لما تكون اقصى سرعه للسيارة 20 كيلو فى الساعه علشان الطرق متنيله بستين نيله والبلاعات طالعه فى وسط الشوارع واحيانا مفتوحه -------- يطلعوا لنا بقانون حزام الامان وصندوق الطبى علشان ابو مراة الننوس يبيع ويغتنى من دمنا
لما الموظف فى الحكومة بياخد اد مرتبه 500 مرتب رشاوي و يقولك مش عارف يعيش علشان الزيادة السكانية!!!!
لما يكون عندنا مجلس قومى للمرأة و اعلى معدلات طلاق فى الوطن العربى!!!!
لما يكون عندنا مجلس قومى لحقوق الانسان و اعلى معدلات اعتقالات و تعذيب فى اقسام الشرطة.....
لما وزير الاسكان الحرامى يبيع ملايين الامتار ببلاش للمستثمرين مخالفة لقوانين الدوله ------------ ويبيعوا لنا المتر ب 3000 جنيه فى القاهره الجديده
و لما وزير الاسكان يقول لو مخصصتش الآراضى للعائلة أمال هخصص لمين ,,,يبقى اللى اختشوا ماتوا!!!!
و لما بيصرفوا ملايين الجنيهات على المهرجانات و المؤتمرات كل سنة و اول ما يحصل كارثة - كالزلزال او السيول – يقول للشعب اتبرع للضحايا!!!!!
لما طلعت السادات قال بقين على الهوا تترفع عنه الحصانة و يتسجن فى اقل من شهر...
و ممدوح اسماعيل صاحب العبارة يسافر من صالة كبار الزوار!!!!!
يعنى تيجى تشترى شقه فى اسكان مبارك لمحدودى الدخل تحسبها تلاقيها واقفه عليك بسعر السوبر لوكس
لما الرئيس يحتفل بليلة القدر و يوزع جوائز على حفظة القرآن الكريم.... و لما الاخوان ييجوا يعملوا حاجة ايجابية - زى مشاريع خيرية او حتى يوزعوا شنط رمضان - يعتقلوهم و يقولوا لا للدولة الدينية
!!!!!!
و لما تتهد على اهلها يطلعوا يقولوا هم اللى غلط دول عشوائيات.... و كنتى فين يا حكومة على رأى معتز الدمرداش؟؟؟؟!!!!!!
و لما يعملوا قانون مرور جديد..... و ضحايا حوادث الطرق سنويا اعلى من نسبة اللى ماتوا فى حرب اكتوبر!!!!
يعنى بلد زيرو
و غاز زيرو
و مرتبات زيرو
و ضمير زيرو
تنمية زيرو
و انتخابات زيرو
و صحة زيرو

................

بالايميل

وصية مودع..!

تخبيط 2

....وأغرب ما في قصة هذه الصفقة "المشئومة" هي الصيغة التى تمت بها وهي "الرواتب مقابل السراويل"، حيث أوقف فقهاء السبوبة هجومهم على مرشح الحكومة في انتخابات نقابة الصحفيين، بل وستروا بسراويلهم تاريخه الصهيوني الذى في الحقيقة لا يأسف له ولا ينكره الرجل، وحينما تمت الصفقة وربح الطرفين على حساب قضية لا تخص فقهاء السبوبة وحدهم، بل تخص آخرين أولهم الرجل الذى لا زال رهن الاعتقال بسبب مروره عبر أحد الأنفاق لمؤازرة المحاصرين في غزة....!

.............

خبط معايا..!

أنت بتحب مصر..؟!

"أنت بتحب مصر..؟!"
سؤال نصه عبيط والنص التاني تنويم للضحية...
حيث طرحه ضابط العمليات السرية
في بلاط الفرعون "كركديه ايزيس"
على مسامع الجندي الصعيدي "زنجبيل رع"
قبل ما يغرقه جاز ويشعل في ملابسه النيران
ويطلقه المنجانيق في الهواء وهو يصرخ رعباً
قبل أن يسقط وتمزقه رماح جيش الهكسوس
وذات السؤال طرحه والي مصر محمد على باشا
على مسامع جندي الأمن المركزي المخلص في القلعة
والذى كان مكلفاً باغلاق بابها على المعارضة وعلماء الأزهر
وذبحهم عن بكرة أبيهم ثم ذبح الجندي ذاته بعد ذلك
وهو ذات السؤال السخيف الذى سمعه علي يا ويكا
من الضباط حسن قبل أن تندلع شرارة الثورة وتحرير انجي
وهو نفسه الذى سمعه جمعة الشوان ورأفت الهجان وسامية فهمي
وهو بعينه الذى سمعه أحمد عز من نور الشريف في مسجون ترانزيت
حب مصر للاسف
مش منطقى لكثير من الناس
لأن محدش شايف حاجة كويسة
حاجة تخليك تحبها
على الاقل بطريقة علانية قدام الناس
متكسفش من الحب ده
لكن حتعمل ايه
ادينا بنعمل الى علينا

نونية Ection..!

أيـــــا ذا القـلب لا تحـــــزن فــــــذاك الحـب Infection
فـلـن تجــــــدي عقــــــاقير ولن تشفـــــيك Injection
فـكم من عـاقـــــل فطـــن مضى بالحــب Direction
سـتـنـــــكره وتـنـســــــــاه
ولن يبـــــقى له Mention
فـلا تنــــــــظم له شعــــراً ولا تكـتــــــب له Section
ولا يحــــــــزنك من باعك فقد أخطــــأت Selection
ولا تبـــــدي له أســـــــفـاً ولا تبــــــــــدي له action
فـــــــــــــإن الحب منـزلةٌ لبعض الناس exception
فبعض الناس إن هجـروا
فلا حـــــزنٌ ولا tension
وبعض الناس إن هجروا يظل ويبـقى connection
فوصــــــل الروح إقبـــالٌ وما أحـــــــــلاه reaction
بدعـوات ومن قــلــــــب لها أثــــــــــر و affection
فـــإن لم يبـــــق لي شيء فلا حــــــــب ولا Passion
فــلا أسـف عـلى دنـيــــــا لـك وعليــك conversion
..............

اميلات..!

أحمر على ابوه يا بطيخ..!

النهاردة قررت اغتسل غسل الجمعة ليس لأنه سُنة مستحبة فحسب...
بل لأنني لا ادري متى يغلق اخونا الأفارقة حنفية النيل العمومية...
الخلاصة أخدت بعضي ورحت مسجد قريب مننا جداً...
إمام الجمعة شن هجوم ساخن على باعة البطيخ المحاصرين للمسجد...
وصفهم بانهم مسلمين بالإسم بس وذلك لأنهم لا يحضرون صلاة الجمعة...
وطالبهم بفك حصارهم البطيخي ومنع حناجرهم من الانفجار عقب التسليمة الأخيرة...
تصورت ان البطخجية حيجروا بسرعة يتوضوا ويدخلوا الصف خوفا من الوعيد...
وتصورت إن الامام سوف يأمر المصلين بفك الحصار والاستيلاء على البطيخ اللذيذ...
وتصورت ان غنائم البطيخ بدات توزع علينا نحن المصلين أبطال المعركة..
ولكن أي من هذا لم يحدث بل على العكس تماماً لم يبرحوا اماكنهم...
وبعد الصلاة وكما هو متوقع إنفجرت حناجرهم تسبق الميكروفونات...
- بخمسة جنيه يا بطيخ..
- البطيخ بخمسة جنيه يا جدعااااان..
- خلي الغلابة تااااااكل..
- عالسكين يا دوَّاء..
- أحمر على ابوه يا بطيخ..
تأسفت في نفسي أن تهديدات الامام تبخرت في ثواني..
وأكد التفاف المصلين حول البطيخ أن النظرية تخالف التطبيق غالباً..
انتبهت إلى جاري في العمارة والذى كان يصلي معي بالصدفة وهو يصافحني..
وقبل أن أفاتحه في أزمة البطيخ بين الواقع والتطبيق..
تبسم وقال لي:
- يالا نشتري بطيخة دي حلوة وسعرها جميل..
احمر وجهي غضبا مثل البطيخ وقلت له مكشراً:
- اعمل حسابي في واحدة بس..!
....................
تحديث: هما ليه الناس بيطبلوا على البطيخة قبل ما يشتروها...؟!

تخبيط..!

...إنه مثقف الموجة الإسلامية الذي يجيد التلون واللعب على أكثر من حبل في آن واحد كما يجيد قولبة متون الفضيلة وشرحها على منهاج ألفية "ابن بزنس" في فقه السبوبة أو ما يصطلح عليه بـ"مرتزقة الورقة والقلم"...

................

خبط معايا..!

حبة تهييس..!

واحد بيقول لصاحبه عيب مراتك تحدفك بالشبشب واحنا قاعدين
قاله بس بذمتك جت فيا..!
~~~~~~
واحد بيقول لصاحبه احنا فى الجنه هيجبولنا ستات اشطه
قاله والستات بتوعنا
قاله هيعذبوا بيهم الكفار..!
~~~~~~
واحد بيقول لخطيبته لما ازمرلك انزلى
قالته ليه يا حبيبى انت جبت عربيه
قالها لا
جبت زمارة..!
~~~~~~
ظابط مسك عيل بيشم قاله : هو الشمام الصغير بنسميه إيه ؟
قاله : كنتالوب ياباشا..!
~~~~~~
واحد بيسال شيخ لو شوفت اسد وانت بتصلى تكمل ؟
قالة لو فضلت على وضوئى اكمل..!
~~~~~~
واحد عصبى جدا بيقول لمراتة احكيلك قصة مش هتصدقيها وهتقولى عنى كداب بس انا مش كداب
انتى اللى كدابة انتى وعيلتك كدابين يا ولاد الكلب يلعن ابوكى على ابو عيلتك روحى انتى طالق..!
~~~~~~
عصبى كتب فى كروت فرحة : الزفت اللى جاى مايتاخرش واللى مش جاى فى ستين داهية
والكلاب الصغيرة تترزع فى البيت والحق على الواطى اللى عزمكو..!

.............

عبر الايميل..!

أصحاب العقول في راحة

بيقولك ربنا لما وزع الارزاق قليل اللي عجبه رزقه..
ولكن لما وزع العقول كل واحد عجبه عقله..!

ياحاسدين الناس..!

المؤتمرات عادة ما تنتهى فقط بالكلام اللى مالوش لازمه مع اقترحات وتوصيات لا اول لها ولا اخر ..

مع دعوة للغداء تنحشر فيها أجساد الصحفيين مع المدعويين أمام أصناف الطعام التى تتكرر في كل مرة..

بعد الجزء النظري من اللت والعجن يأتي الجزء العملي فقد حان وقت فتح البوفيه ..

ويساق الحضور إلى أرض الحشر وقد تدافعت الاجساد وهجم الرجال والنساء بعد جوع كافر..

........................

تحديث: كم اثلج صدرى هذا المنظر البديع في فندق (سونستا) أمس..!

خيبة خليجي..!

الواد المذيع يا عيني خايف أحسن البنت تطلع هويتها مضروبة ومش تكون امريكية وكأن الأمريكان يعني ملائكة ومش محتلين الخليج..شوفتوا ازاي متحمس وهو بيطلع بسبورها وعمال يقول أهو عشان محدش يقول انها ضحكت علينا...!
والبت في الآخر طلعت إسرائيلية معها جنسية أمريكية مثل معظم اليهود..وطبعا غنت للحبايب في قصورهم وفيلاتهم والنقطة بالتأكيد كانت نازلة ترف والواد الوليد بن طلال أنتج لها ألبوم تبع روتانا وقناة دبي احتفت باللي خلفوها...!
الواد المذيع الإسرائيلي فطسان على روحه من الضحك على عبط المذيع الإماراتي وامجاد يا عرب أمجاد...!

تنشيف الدماغ..!

...وانسياقا خلف فكرة المؤامرة تصورت أن الحكومة اطلعت بالفعل على أبحاث الدكتور بي التى خلص فيها إلى أن الدماغ هو العضو المفكر والمستجيب لمطالب التغيير؛ لذلك هو الأكثر حاجة إلى المياه في جسم المواطن المعارض، وحيث أن الدماغ يستهلك كميات كبيرة من الماء بشكل متواصل، لذا أنقصت الحكومة كميات المياه خصوصاً في المناطق التى يشتبه انها تضم معارضة كبيرة، وهي مناطق العشوائيات التى تضم العمال والطلاب والمهمشين وبؤر البطالة وكل من ليس له "ظهر" يحميه..!
..............
مصرنا العطشانة

احتراق

ساءت حالته كثيراً بعدما أخبره الشيخ المُعالج أنه مقبل على شر كبير ، وأنه إن لم يعد أدراجه سيفلت زمام الأمر من يده..وسيحترق..!

- يا بني أنت مريض بها ومصاب بمس من الأنس بسبب عشقك لها..

وعلاجك باتباع نفس طريقة علاج المس عند الإنس..!

تأمله الشيخ المعالج ثم استطرد قائلاً:

- ولكن قد يكون سبب مرضك الحقيقي أنه لا يوجد رجل من الجن تزوج من بنات آدم ..

إلا أن يكون خادماً لساحر مقابل أن ينفذ إلى جسد المسحورة..

وبعد فترة من الزمن يتدرج به الحال إلى أن يتعلق قلبه بهذه المرأة المسكينة فيكون عاشقا وظالماً في نفس الوقت ويقع في حبها من طرف واحد..

فهل هذا ما حدث لك؟!.

انتفض غاضباً وقطب جبينه قائلاً:

- أنت تتهمني بأنني "شيطان رجيم"..؟!

رفع الشيخ المعالج حاجبيه الكثيفين وقال مندهشاً:

- استغفر الله العظيم..

حاشا لله إني أعيذك أن تكون شيطان رجيم..

ولكن أحببت أن أحذرك يا بني بأن زواجك من الإنس محرم وعاقبته الحرق في الدينا والعذاب في الآخرة..

أسند رأسه بين كفيه وبدى على صوته الإرهاق وهو يسأل:

- أليس من حل سيدي الشيخ؟!

ربت الشيخ المعالج على كتفه قائلاً :

- يا بني إن الشهوة والهوى والعشق بين أبناء آدم وبيننا من الفواحش التي حرمها الله تعالى..

كما حرم ذلك على الإنس وإن كان برضى الآخر..

فكيف إذا كانت المرأة المسكينة لا تعلم بك فأنه في هذه الحالة فاحشة وظلم!

سكت قليلاً ثم قال:

- إن أهلك من الجن يعرفون أن هذا النوع من الحب محرم..

وقامت الحجة علينا في كتاب الله تعالى بذلك..

وإن صحابة رسول الله صلي الله عليه وسلم من قومك الجن علموا أنه يحكم بحكم الله تعالى الذي أرسل به إلى جميع الثقلين الإنس والجن..

التفت وسأله بغتة:

- هل حدث أن تشكلت لها في صورة إنسان؟!

تلعثم قائلاً:

- مرات قليلة..!

احمر وجه الشيخ المعالج غضباً:

- وهل تحدثت معها ..؟!

اعتدل في جلسته وبدى الصدق في كلامه واضحاً:

- بالطبع لا..ولكن كنت اتعمد مقابلتها حينما كانت تتمشى على شاطئ البحر..

حيث أنها تسكن قريباً منه..

وكنت ألقى عليها التحية فحسب..!

حدق الشيخ في عينيه وسأله مباشرة:

- هل حدث وأن جئتها في منامها..

ثم صمت قليلاً وقال:

- وهل حدث بينكما معاشرة..!

احمر وجهه خجلاً وهو يرد:

- لالا لم يحدث شئ من هذا..

والله يشهد على ذلك..

ولكنني رغم ذلك زرتها في نومها مرات قليلة..!

صاح الشيخ المعالج غاضباً:

- ألا تعلم أن هذا حرام..؟!

أطرق خجلاً:

- ولكني أحبها..

أحبها..

أقسم لك على ذلك..

ولست أريد إيذائها..

ولو كنت أريد لفعلت ولما وجدتني عندك الأن..

ضرب الشيخ المعالج كفيه محتداً:

- يا بني يقول الله تعالي في سورة الروم : ( وَمِنْ آيَاتِهِ أَنْ خَلَقَ لَكُم مّنْ أَنفُسِكُمْ أَزْوَاجاً لّتَسْكُنُوَاْ إِلَيْهَا وَجَعَلَ بَيْنَكُم مّوَدّةً وَرَحْمَةً إِنّ فِي ذَلِكَ لاَيَاتٍ لّقَوْمٍ يَتَفَكّرُون ) ..

وأنت لست من نفسها وهي ليست من نفسك..

وهناك من بنات الجن من هي في جمالها وعفتها وطهارتها وأنسب لك..

فلماذا تصر على إيذاء هذه الإنسية المسكينة..؟!

غالب دمعه وهو يرد:

- وما ذنبي أنا في حبي لها...؟!

أجابه الشيخ بنبرة بين الحزم والنصح:

- يا بني تبين لك الأن أن طلبك الزواج من هذه الإنسية مرفوض..

لأنك تريد خطفها من عالمها إلى عالمك وحرمانها من الزواج من عالمها..

وحتى لو افترضنا جدلاً أنك استطعت إقناعها ووافقت فلن يكون زواجا شرعيا لأن الراجح في شريعتنا أن زواجك من الإنسية حرام ..

سكت قليلاً ثم قال بهدوء ضاغطا كلماته:

- أنت تعشق جسدها فقط..

وبينما أنت تأكل وتشرب وتستمتع به..

لا تبالي بهذه المسكينة إذا ما كانت سعيدة أو حزينة..

وهذا إن كنت لا تعلم عذاب لها وظلم منك يجلب اللعنات المتتالية إلى يوم القيامة..

قال ذلك ثم استدار مستطرداً:

- ثم ألست ترغب بما أعده الله للجان المؤمنين يوم القيامة من الحور العين في الجنة..

وألست تعلم أن من ترك شيئا لله عوضه الله خيراً منه..؟!

خيم صمت ثقيل على الغرفة وانتظر الشيخ المعالج رده الأخير..

رفع عينيه التى تراكم فيها الدمع وقطع الصمت قائلاً:

- بماذا تأمرني يا سيدي..؟!

ابتسم الشيخ المعالج بكل ثقة وهو يضع كفه على كتفه قائلاً:

- سافر بعيدا وابتعد عنها..

وعليك بالصلاة ومداومة قراءة سورة يوسف وان تكثر من قول لا اله الا الله وحده لا شريك له يحي ويميت وهو حي لا يموت بيده الخير وهو على كل شئ قدير..

ثم نظر في عينيه مشجعاً:

- والأهم يا بني أن تتقوى بالصبر والإيمان طوال فترة العلاج وعدم اليأس..

أسأل الله لي ولك ولجميع المسلمين الهداية والشفاء العاجل ..

jasmine

لم يعرف تحديداً متى خفق قلبه لزهرة الياسمين...!

...............

تعطر..!

راجل و3 ستات..!

وأخيراً زست..!

لأ وأخيراً جوووووووووووووووومانة..

طب وليه جومانة..لأنها على وزن مُرجانة -وكمان على وزن جبنة ملكانا اللي بالخير مليانة- بصراحة اسم مرجانة كان عجبني اوي خصوصا ان الناس نسيت على بابا وخدماته الجليلة اللي قدمها لمصر لما اكتشف الزلعة اللي استخبي فيها الاربعين حرامي مع اموال الشعب..وساعتها اتحاكم على بابا بموجب قانون الطوارئ وبتهمة البلاغ الكاذب وازعاج السلطات وتعريض الامن الاجتماعي للخطر وترويج اشاعات مغرضة بهدف النيل من شخصيات عامة والتخابر مع هونج كونج، وكل ذلك لأن الاربعين حرامي طلعوا من بخته الاسود رجال اعمال مهمين أوي واعضاء في لجنة السياسات فضلاً عن اشتراكهم في منتخب مركز شباب الحبانية القومي..!

والتاريخ لن ينسي الست مرجانة زوجة على بابا الرابعة بعد ما طلق التلاتة الاولنيين..حينما نظمت قصيدة مطولة يوم الجلسة على باب المحكمة في رثاء على بابا والتى ذيلتها بحكمتها الخالدة "ان جالك الطوفان ماتلحسهوش كله"..

المهم مش ده موضوعنا..

الموضوع من طأطأ لسلامو عليكو هو ان يوم 24 /4 /2010 رزقني الله بإبنتي (جومانة) بعد معاناة كبيرة عايشتها مامتها اللي هي مراتي..وبصراحة كان الله في عون المامهات يا ولاد واحضنوا اديكوا وبوسوها وش وضهر ان احنا رجالة بشنبات..بجد والله ما نستحمل واحد على مليون من المعاناة دي..بجد اهون تشتغل اعمال شاقة وتنزح البحر الأحمر بمعلقة الشوربة وتنقل جبل عتاقة على ضهر توك توك أو تخلع برج ايفيل بفتاحة الكازوزة عن انك تكون ماما وتدخل غرفة الولادة..!

سهيلة بنتي الاولي فرحانة جداً وحالفة حلفان عيالي ان اللي شيطانه يوزه ويلعب في عداد عمره ويهوب من سرير جومانة هتخرب بيته وحيضطر انه يركب صوابع صناعية بعد ما تاكل صوابع أطرافه الأربعة..!

نوبات الحراسة المشددة حوالين ناموسية جومانة أخذتها سهيلة كلها..وسمحت فقط لمامتها بفترات رضاعة لظروف انسانية بحتة..ولكن بعد التحقيق من الهوية الماموية وكلمة السر الكوبانية وبالطبع رشوة بسكويت غير مثبتة في الاوراق الرسمية..!

جومانة جميلة بجد..مش لأن أنا ابوها ولا لأن مراتي مامتها..لأ لأ..ده لأنها فعلا جميلة..بس فيها عيب صوغنون أوي...

مقاس رجليها 44 ..وعشان كده اتولدت بالعافية قيصري....!!

وده طبعا مع المشي والاصرار والعزيمة وكمان الرضاعة الطبيعية وحماسها وهمتها في مطاردة وسائل النقل العامة سيتلاشى تدريجياً ..المهم الصبر الجميييييييييييييييييل.. والأمل في ربنا كبير..!

احنا النهاردة لابسناها الحلق الذهبي في ودنها ..وده اللي مامتها اشترته من عند الجواهرجي بيه..

شكلها بالحلق تحفة..يجنن..

سهيلة كانت بتابع عملية تلبيس الحلق بدهشة كبيرة وشاركت الجواهرجي في مسك ايد جومانة..ولسان حالها يقول :"يختي عليها ويختي عليها..ماجت رجليها ماجت رجليها"..!

في طريق عودتنا إلى البيت سألت سهيلة وانا أحمل جومانة في شنطة البيبي: تيجي نبدل جومانة بباكو بسكويت يا سوسو..

تلقيت وابل ضربات محترفة من سهيلة تعبيرا عن الامتعاض قبل الرفض المطلق ..فرفعت سقف المساومة الى كيمو كونو فارتفع سقف التلطيش من جانبها واغلقت الموضوع بـ"لأااااااااااااااااااااااااااااااااااااااااا"..!

.......................................................

تحديث: دلؤتي وانا بكتب التدوينة دي الـ3 ستات في سابع نومة..وقد الحت على ذهني بسمة طفلتي الراحلة سلمي..

تراها تمرح في الجنة الأن ..ام تراها تراقبني وتمنحني بسمة اشعرها ولا أراها..وهي تهمس : أبي احضن جومانة بكل ما تملكه من حب فسوف تراني في عينيها وهي تبتسم لك وتحتويك براءتها في حضنك.