يالا نضرب اللحمة..!

كل يوم أشوف خبر عن غلاء اللحمة والاضراب عن شرائها...

ماشاء الله سعرها في الطالع وبقا الجرام عند الجزار زيه عند الجواهرجي...

بس عند الجواهرجي ممكن تفاصل في الشغل و المصنعية...

أما اللحمة فممنوع الفصال وزي ما يقلك البيه الجزار حتدفع...

فكرت وقلت ليه مش نطرح اللحمة في البورصة ويتم تداول البوفتيك زي الأسهم...

وتأملت قليلاً في حال بلدنا وحسيت انه مدبر لها تعيش في كابوس فوضى ولخبطة...

بص كده حواليك حتلاقي كل حاجة ماشية عكس بعضها خلف خلاف...

الحالة دي ألهمتني شوية إبداع كده عالماشي قلت ادونهم ما هو ده اللي فالحين فيه...

نهايتو الابداع أهو:

يا حالم بحتة لحمة يابو هدمة مرئعة

فـاكـرهـا لسـه هايـصـة والمطرة مـدمعـة
يا مواطن مرة ركز وبعقلك قوم وعكز

وشـوف نـواب حكومتـك شافـطنها مولعة
اللـحمة شـغل ذوات ياكلوها في السهرات

عملوها سياخ وكفتة وقهرتـنا مصبعـة
كفاية كاني وماني وحقد وكندوز وضاني

تخيلها وانت قاعد تطفح فخد مسـئعـة
فطرها الصبح بانجو ترقصلك عالغدا تانجو

ودماغك من الهم تانجو وهي مطرئعة
خليك حمار تعيش وطنش تاكل عيش

يابلادنا وآخـرتها فيك مشينـا على أربعـة