عليك وعالوحدة الصحية

مش عارف ليه جه في بالي عبسلام وهو بينزل بضهره في الترعة والبلهارسيا بتدق الطبل ابتهاجا بقدومه..

الاعلان ده كان تقريبا في الثمانينات من القرن الماضي عندما كان عمرى حينها حوالي عشر سنين ..

اللي خلاني افتكر هو ان الاسابيع اللي فاتت أكتر من موقف يقابلني وكلهم عن ازواج لسانهم فالت بالطلاق..

آخرهم واحد قال لمراتو تكوني طالق لو رُحتي عند أمك بدون إذني..

وعنها وكل ما مرات السبعاوي تحب تروح لمامتها لازم تعدي على شؤن الخروجات عشان تختم التصريح من شنباتو..

الغريب بقا ان السبعاوي ارهقه كثيرا انها تستئذن في كل مرواح لمامتها ومل من اللعبة وحس انه خلاص شبع تحكمات..

وعاوز بقا يرجع في يمينه أصله فاكره يمين استرتش يتمدد بالغضب وينكمش بالرضا والأنس والفرفشة..

حظه العاثر انه جه ياخد مشورتي رحت انا بقا انجعصت كده على الدكة زي الفنان محمد رضا الله يرحمه..

وزغرت له زغرة من اللي كان بيزغرهم لعبسلام الله يرحمه ..

في الاعلان بتاع الحملة القومية للقضاء على مرضى البلهارسيا لما كان بيسأله:

والحل ايه يابا الحاااج..؟!

وشخطت كده زي ابا الحاج وقلت له:

الحل في انك تروح عالوحدة الصحيـ....آ..

آصدي دار الإفتا يا عنيا..

هناك حيعملولك كل التحاليل الفكرية..

ويعصروك وينصحوك ..

ومش بعيد يلطشوك بكل حنية..

والإجابة هناك ببلااااش..

يعني من غير ما تدفع نقدية..

الإجابة بقال الله وقال الرسول مش بالأشطة زي زمان والمهلبية..

ورحت باصص نحية الكاميرا وشوحت في وش السادة المستمعين زي ابا الحاج بالظبط وزغرت:

طول ما ندي ضهرنا للترعة عمر البلهارسيا في جتتنا ما ترعي...!