عليك وعالوحدة الصحية


مش عارف ليه جه في بالي عبسلام وهو بينزل بضهره في الترعة والبلهارسيا بتدق الطبل ابتهاجا بقدومه..
الاعلان ده كان تقريبا في الثمانينات من القرن الماضي عندما كان عمرى حينها حوالي عشر سنين ..
اللي خلاني افتكر هو ان الاسابيع اللي فاتت أكتر من موقف يقابلني وكلهم عن ازواج لسانهم فالت بالطلاق..
آخرهم واحد قال لمراتو تكوني طالق لو رُحتي عند أمك بدون إذني..
وعنها وكل ما مرات السبعاوي تحب تروح لمامتها لازم تعدي على شؤن الخروجات عشان تختم التصريح من شنباتو..
الغريب بقا ان السبعاوي ارهقه كثيرا انها تستئذن في كل مرواح لمامتها ومل من اللعبة وحس انه خلاص شبع تحكمات..
وعاوز بقا يرجع في يمينه أصله فاكره يمين استرتش يتمدد بالغضب وينكمش بالرضا والأنس والفرفشة..
حظه العاثر انه جه ياخد مشورتي رحت انا بقا انجعصت كده على الدكة زي الفنان محمد رضا الله يرحمه..
وزغرت له زغرة من اللي كان بيزغرهم لعبسلام الله يرحمه ..
في الاعلان بتاع الحملة القومية للقضاء على مرضى البلهارسيا لما كان بيسأله:
والحل ايه يابا الحاااج..؟!
وشخطت كده زي ابا الحاج وقلت له:
الحل في انك تروح عالوحدة الصحيـ....آ..
آصدي دار الإفتا يا عنيا..
هناك حيعملولك كل التحاليل الفكرية..
ويعصروك وينصحوك ..
ومش بعيد يلطشوك بكل حنية..
والإجابة هناك ببلااااش..
يعني من غير ما تدفع نقدية..
الإجابة بقال الله وقال الرسول مش بالأشطة زي زمان والمهلبية..
ورحت باصص نحية الكاميرا وشوحت في وش السادة المستمعين زي ابا الحاج بالظبط وزغرت:
طول ما ندي ضهرنا للترعة عمر البلهارسيا في جتتنا ما ترعي...!

4 عبرني:

كلمات من نور يقول...

بجد بجد مش بحترم راجل يمين الطلاق لعبة في بقه .داه حتى عيب مش بس حرام عليه ...هي الست ليه ساعات بتكون حيطة مايله ؟؟؟ داه حت ربنا سبحانه وتعالى تحدث في شؤون الرجل والمرأة والطلاق كتير قوي...تحياتي

يا مراكبي يقول...

على فكرة .. فعلا الحلفان بيمين الطلاق ده حاجة منتشرة بشكل ملفت جدا .. لدرجة ان الشباب اللي لسة ما اتجوزوش تلاقيهم بيحلفوا بالطلاق من باب النكتة .. وبيتعودوا عليه بعد كده

ياخواننا .. الطلاق فعلا ممكن يقع بسبب تافه جدا زي كده .. زي حلفان بنكتة مثلا .. ولازم نتعود اننا ما نستعملش الكلمة دي كتير

بيتنا القديم يقول...

كلمات
.....
بصراحة الصنف ده من الرجال لما بيتلسع من الشوربة بينفخ في الزبادي..
وتعالي شوفي حالتهم وهم خايفين من عواقب تسرعهم في ايمان الطلاق وواقفين قدام احد العلماء زي الكتاكيت المبلولة ونفسهم يطلع الموضوع "فشنك"..
وبصراحة المفروض والد البنت يعمل قاعدة : "من ترضون دينه وخلقه"، لأن دين من غير خلق ما ينفعش وخلق من غير دين برضو ما ينفعش..!

بيتنا القديم يقول...

يا مراكبي
........
هو لما بيقع بتلاقيه يقولك : ده انا كنت والله بهزر يا عم الشيخ..!
ولا يعلم الجاهل ان الطلاق من جملة الثلاثة الذين جدهم جد وهزلهم جد..!