عفاريت

صديقي: آلو اسامة انت فين الحقني...

أنا : في ايه يا بني متسربع ليه خضتني...

صديقي: تليفونك كان غير متاح..في مصيبة..في كارثة..في عفاريت يا اسامة..!

أنا: عفاريت..؟!

صديقي: أيون عفاريت..وفين..في شقة اختي تصور..؟!

أنا: (!!)

أنا: طب ازاي..وايه خلاك متأكد؟!

صديقي: مش مهم دلؤتي ازاي..المهم نعرف طريق حد معالج ضروري عشان الموضوع خطير..

أنا: طب حتى لو لائينا معالج حنقوله ايه...؟!

صديقي: حنقوله إن اختي بتحلم باتنين ستات لابسين اسود في اسود بيحوموا حواليها وهي نايمة..

أنا: هي بتحلم ولا ده حقيقي يعني بتشوفهم...

صديقي: ما هي المصيبة انها في البداية كانت بتحلم..انما في المرات الأخيرة كانت بتصحا تلاقيهم واقفين جنب السرير..

أنا: بسم الله الرحمن الرحيم..وبعدين..؟!

صديقي: ولا آبلين..هم بيهمهموا بتعاويذ وحاجات هي مش فاهمة منها حاجه..بس بيكون لسانها تقيل وجسمها مخدر ومش قادرة تحرك شعرة واحدة من جسمها..بس شايفاهم وسمعاهم ومفتحة عنيها..لحد ما بيمشوا بتقوم تصرخ وتجري على صالة الشقة..

أنا: طب وفين جوزها...؟!

صديقي: ظروف شغله بتخليه 15 يوم في البيت و15 يوم في مواقع العمل...

أنا: طب ما تشغل قرآن قبل ما تنام وتسيبه شغال في الشقة لحد الصبح...

صديقي: يا سيدي ما هي كانت بتعمل كده..انما دلؤتي بتقوم من النوم مفزوعة تلاقيهم مغيرين قناة القران المجد او العفاسي على قناة تانية خالص..!

أنا: لا حول ولا قوة الا بالله..طب والحل..؟!

صديقي: ما هو انا بكلمك عشان نشوف حل...

أنا: طب اهدي كده وهدي اختك وان شاء الله نلائيلها حل..

أنا: بالمناسبة اختك متجوزة من كام سنة...؟َ

صديقي: من 3 شهور بس يا أسامة..دي الصغيرة ما انت عارفها..

أنا: طيب طيب..أكيد حنلائي حل باذن الله..شغل قرآن في الشقة وخد اختك تبات عندك النهاردة وحتصل بيك..