طفلتي الفقيهة..!!


بعد صلاة العصر وفي طريق العودة إلى المنزل..
كنت أسير ممسكاً كف طفلتي باحدي يدي..
وفي اليد الأخرى أكياس التمر والعرقسوس والسوبيا..
أما هى فكانت تقبض على كيس شيبسي في كفها الآخر..
وبين الحين والحين..
كانت تفلت يدها من يدي ملتقطة شيئاً من الكيس..
ثم تدسه في جحر فمها المتناهي في الصغر..
وتمنحني إبتسامة قبل أن تعاود دس كفها "المزيتة" في يدي..
غير عابئة بالمرة بالجدل الدائر في العالم حول الميكروبات..
بادلتها الإبتسامة وباغتها بسؤال: هو إنت يا سهيلة مش صايمة..؟!
التفتت نحوى: آآآه ..أنا صامية..!
اتسعت ابتسامتى وتصنعت الدهشة: ازاي بقا وانت بتاكلي شيبسي..؟!
أجابت بكل جدية: لأ..ما انا صامية وباكول شيبسي..!!
ضحكت مستفسراً فقيهتي الغنونة: يعني الشيبسي يا سوسو مش بيفطر...؟!
ربما فهمت سؤالي أو لا..ولكنها ردت باقتضاب عالم فقيه: لأ...!!
استقرت فوق رأسي علامة تعجب كبيرة من فقه طفلتي..
قطعنا في صمت ما تبقى من سيرنا إلي البيت..
بينما إندمجت طفلتي الفقيهة في عزف سيمفونية "قرمشة"..
للموسيقار "شيبساوي"..!!

7 عبرني:

Jana يقول...

صامية وباكل شيبسى!!
:-)))))))
بتجادلها ليه يا اسامة ..يعنى لازم نصدر لك فتوى تبيح أكل الشيبسى فى نهار رمضان عشان تصدقها !؟
عجيب امرك يا اسامة
الطريف ان كل البنات ادها مقتنعين انهم "صاميين" برده :-))
ربنا يخليهالك هى ومرمر ويفلسوك من الشيبسى :)
كل سنة وانتم كلكم طيبيبن وبخير وبسعادة يارب ..وعيدكم مبارك
لو مرمر عملت كحك ...قوللها تدوقنا يعنى ..الجيران لبعضيها .ده على اساس انى جارتكم من اسكندرية مثلا :-))))

قلب ينبض بالحب يقول...

عيني عليك يا سمسم عيني عليك مرمر من ورائك وسوسو من أمامك انت يدوب تشتغل علشان تكفي مصاريف الشيبسي الخاص بمرمر وسوسو لك الله يابني من قبل ومن بعد وهابي عيد عليكم يارب والسنة الجاية يكون انضاف لقائمة الشيبسوية شيبساوي جديد وحشتوووووووووووووني

أيامنا الحلوة يقول...

ايه حكاية الشيبسي مع العيلة دي متهيالي عندك طفلتك التانية "المودام مرمر" عندها هستريا الشيبسي بردوا

ياسيدي افتح لهم مصنع مقرمشات وخلاص بدل فتوى سوسو اللي هتضيع الجيل بتاعها يعني بكره الاقي اخويا محمود ذات الخمسة اعوام يطلع فتوى هو كمان ويقولي الشيكولاته حلال في نهار رمضان

تحياتي وكل سنة وانت واسرتك بخير

بيتنا القديم يقول...

Jana
....
جدلية الصيام في عالم الأطفال ظاهرة محيرة لنا نحن الكبار "الحمقى"..
واسمحي لي أن أصف نفسي ومن يجد ما اجده من شعور هكذا..
فتلك الكائنات البريئة التى تسمى الأطفال بعيد عن عقولها ذلك التلوث الكمي والنوعي من لعنة المعلومات وضجيج السفسطائية..
كل شئ عندهم له رائحة وطعمغاية في البساطة والشفافية..
الماء
والهواء
والشمس
ورمضان
ويوم العيد..
أما نحن فاطباق عقولنا دلئماً موجهة إلى اللا قيمة..
تحوى ملايين القنوات المعلوماتية التى لا قيمة لها سوى أنها تشعرنا اننا كبار في "الحمق"..!
في صبيحة يوم العيد تأنقت طفلتي وامسكت بكفي أنا وأمها "مرمر"..ونحن في طريق مصلي العيد..كانت تتقافز وتكاد ترتفع قدميها من على الأرض لتطير من فرط البهجة والسعادة..لولا أنني متشبث بها..منحتني انا وأمها الكثير من الضحك والابتسامات..منحتنا الشعور بالعيد..ثم قالت لنا فجأة من دون مقدمات:" إحنا رايحيين نصلي عند كحك العيد..!!
(:
...........
ثقى أن نصيبك من الكحك مصان في قرار هضيم..!

بيتنا القديم يقول...

قلب ينبض بالحب
..............
ساعتها نعمل موقع مرمري سمسمي و نطلق عليه "شيبساوي دوت كوم"..!!
(:
عقباااااااااااااالك..!
عين بتغمز في مكر..!

بيتنا القديم يقول...

أيامنا الحلوة
.............
المودام مرمر الدكتورة منعتها والله..بس تقلي ايه..يفرح الزمار وشفايفه بتلعب..!!
(:
أقترح قناة فضائية طفولية تجدد الفتاوي بالشيكولاتة والشيبساوي..!!
(:
كل سنة وانت وعائلتك وجيرانك ومحطة مترو حلوان بخير..والسنة اللي جاية الكل يروح صلاة العيد عوائيلي..!

كلمات من نور يقول...

الشيبسي والعصير والبسكوت الصغير والشوكولاته مش بتفطر الصغار ههههههههههههههه

أولادي نفس الشيء كان يقولي صايم بس باكل بسكوته او دي شوكولاته كيت كات يا ماما

داه جدتي زمان كانت بتسميه صيام الحاجه اللي لما تجوه تتغدى

تقبل الله صيامنا و قيامنا وثبتنا بعد رمضان