كامل الأوصاف !!

كتير أوي بنسمع من بنات اليوم العازبات عبارة يشكون فيها من ندرة الشاب المحترم الجدير بخطفهن من بيت بابا وماما، وهي عبارة بتخبي وراها البنت قلقلها من استعجال قطار الزواج الذى يمر أمامها كل يوم ويخطف العديد من صديقاتها وهي واقفة بتتفرج.
مش بس كده ده احنا أكتر من كده بنسمع البنات تقول في مجالسهن الخاصة أوي أنه "خلاص بح" ، طب يعني ايه بح يا آنسة؟!..تقولك يعني خلاص الشباب الطيبين الممتازين خلصوا وبح خلاص اتجوزوا وراحت فرصتنا..!!
الأعجب من كده بقا هو ان البنات حديثي الزواج يشكون بالحاح شديد من "رذالة" أزواجهنّ ..اللي هما كانوا في الاساس طيبين وممتازين و"بح" خلصوا من سوق الرجالة وأصبحوا عملة نادرة بحسب تقدير البنات العازبات..!
وفي تقديري المتواضع انه بطبيعة الحال لا يوجد على الإطلاق رجل طيب وممتاز بالمطلق في هذا العالم..ولا توجد بالضرورة كذلك فتاة كاملة الأوصاف تثير في روحك الإنتعاش في غدوها ورواحها..وإنما يوجد فتاة وشاب يستطيعان الاتفاق على قدر كبير من السمات الطيبة المشتركة بينهما..ويتقاسمان القدر الآخر من شحنة الرذالة إن وجدت..!