سر طاقيه الاخفاء..!

منورين يا شباب...
بعد نجاح سر البلالم...اليكم سر الإبريق..!!

الإبريق ده من البلور الصخري يبلغ عمره 1000 عام، مصري مائة في المائة وهو واحد من سبع قطع نادرة من هذا النوع، وصل سعره إلى ستة ونص مليون دولار في مزاد صالة كريستي للمزادات يوم التلات اللي فات.
***
فاصل إعلاني...موسيقى أكشن من بتوع الشيماء في فيلم "حاسب خزاعة بيستعبط"..!
الأول: من سرق إبريقنا...؟!!
الثاني: خزاااااااااااعة...!
الأول بحزق شديد: من شنبر توابيتنا ؟!!
الثاني بزهق: ما قللتك خزاعة..خزاعة..خزاعة..وحياة أمي وأمك خزاعة..ده دي..!!
***
عدنا ...
والقطع الست المماثلة الباقية خرجت من مصر بكل هدوء ودون شوشرة، واحدة اشتراها متحف فيكتوريا وألبرت في لندن، واثنتان اشترتها كنيسة سان ماركو بمدينة البندقية، وواحدة اشترتها كاتدرائية فيرمو بايطاليا، وأخرى اشتراها متحف اللوفر بباريس، والأخيرة اشتراها متحف ليموجيه بفرنسا في عام1980، يعني بحسبة بسيطة حنلاقي ثمن السبع أباريق يا شباب حوالي 45 مليون دولار ونص..لكن الحق يقال أن النص مليون دولار الفكه ده بيتصرف على الشاي بتاع الرجالة والناس اللي اتعرقت..امال يعني يقعدوا بعرقهم معفنيين كده..!!
وسؤال حلقتنا يا حلوين:
مين المسئول..اللي بردو مسئول عن خروج الآثار من مصر بكل سهولة..ومين اللي قبض الفلوس دي..ومين اللي بيفتش عن مقابر الفراعنة بمزاج وبدون خوف من بابا..طب ومين اللي معه نسخة من مفاتيح متاحف المحروسة..طب ومين ومين ومين اللي في اديه مفاتيح الجمارك وإخراس السلطات وإرهاب اللي يحاول يتكلم..!!
والأن مع هذه الأغنية الوطنية..
مصر..ترلم ترلم ترلم ..
مصر..ترلم ترلم ترلم ..
مصر هى مامتي ..
ضاعت فيها كرامتي ..
شعارها الإهانة ..
على الناس الغلبانة ..
وده كله فى مصر..
الخ..الخ..الخ..