حكايات السابقين

بصراحة كده وبدون مقدمات .. الجواز حلو .. على الأقل لغاية دلوقتي ..
بدأت القصة أني تعرفت بزوجتي في إحدى المناسبات الأسرية أثناء ما كنت في الغربة .. باعتبار أن زوجتي كانت مقيمه هناك برضو ..
تعارفنا وحصل ارتياح وفاتحتها في مسألة الزواج .. وكان ردها أنها مرتاحة للموضوع برضو لكن طلبت أننا نتمهل في اتخاذ القرار ونستخير ربنا الأول قبل ما ناخد أي خطوة
وفعلا ..
استخرنا ربنا سبحانه وتعالى وحسينا بارتياح اكتر وطلبتها من أهلها .. صدقوني لو قلت إني عمري ما شفت ناس بالأخلاق دي أبدا .. مش علشان أهل مراتي .. لكنها شهادة حق .. حمايا راجل طيب ومحترم جدا .. من وقت مادخلت بيتهم حسيت كأني في بيتي وبين أهلي ودي نقطة مهمة يا جماعه لأي واحد يدخل بيت ناس بغرض الزواج ..
المهم .. اتكلمنا في التفاصيل واللي كنت عامل حسابها .. الشبكة يا عمي ؟ رد وقال هديتك لعروستك وأنت حر تجيب اللي أنت عاوزه .. قلت له طيب الشقة في المكان الفلاني وبالنسبة للفرش ..... قال براحتك أنت وهي تفرشوا زى ما انتم عاو زين ... الخ ...... وكان الراجل متعاون والحمد لله في باقي الاتفاق من قايمه ومهر وخلافه
بصراحة حسيت كأنه أبويا وبيجوزني .. كان خايف عليا ومقدرني وبيعاملني زى ابنه بالضبط .. رجل محترم مش كده ؟!!
أما حماتي .. ست طيبه بمعنى الكلمة .. وبدون تفاصيل هقول إنها زى أمي بالضبط
زوجتي .. حبيبتي .. والله العظيم بحمد ربنا وبشكر فضله انه رزقني بيها ... أخلاق وتربيه وبنت أصل بجد .. وإحنا بنشتري أثاث البيت كانت عاملة زى البخيل لما بيصرف فلوس .. مع أن أنا اللي بصرف لكنها كانت عاوزه توفر عليا لدرجة إني كنت بتحايل عليها ساعات علشان أجيب حاجه قيمة .. تخيلوا إنها كانت عاوزة إني أجيب أثاث مستعمل ونجدده علشان مصرفش كنير !! وحتى في الشبكة حاولت إنها تقنعني إني أجيب حاجه بسيطة ...
أخر حاجه فاجأتني بيها إنها طلبت وأصرت إننا منعملش فرح .. وبدل الفلوس ما تنصرف على حفلة فارغة وناس تتنطط عالفاضي ( على حسب تعبيرها ) رحنا اشترينا 3 خرفان .. واحد عملنا عليه عزومة عشا للأقارب في البيت ولبست فستان الفرح وكانت ( قعده ) عائلية جميلة والله والخروفين التانيين اندبحوا واتوزعوا لوجه الله .. لما سألتها ليه كان ردها : ( ابتغاء مرضاة الله وعشان ربنا تبارك وتعالى يبارك لنا ) بصراحة معزتها وقيمتها كبرت أوي في قلبي
عجبني فيها إننا وإحنا بنوضب بيتنا كانت مهتمة إنها تعمل ركن في البيت علشان نصلي فيه .. الركن ده مجهز بسجادتين صلاة ومصحفين وكتب للتفسير والأدعية
كل اللي فات كان قبل الزواج .. أما الآن وبعد مرور أسبوع من الزواج .. مش عارف أوصف إيه !! بصراحة أنا فرحان ومبسوط بجد .. معاملتها راقيه .. طيبه جدا .. هادية .. باختصار ( رائعة )
واحده مقتنعة إن الرجال قوامون عن النساء .. بتحاول ترضيني بكل الطرق .. لو كحيت بس يبقى طوارئ في البيت .. تجبلي عسل على لمون علشان صدر سيادتنا ( مع إني مبحبش العسل ولا الليمون ) بس هي مقتنعة إن العسل بالليمون شفاء من كل داء !! وطبعا بعد الدوا ده تدعيلي وتديني شوية نصايح ولو الكحة أتكررت ممكن ألاقيها بتعيط والله ..
باختصار .. ربنا كرمني بزوجه صالحه .. كنت زمان بقول لها نفسي ربنا يكرمني وأسعدك بس دلوقتي لما بقول كده بكون فعلا عاوز أسعدها
كنت بسمع زمان حديث الرسول عليه الصلاة والسلام : اظفر بذات الدين تربت يداك .. دلوقتي فهمت وعرفت واستوعبت معنى الحديث بجد .. النبي الكريم قال : ( اظفر ) ولم يقل مثلا انكح أو تزوج ذات الدين .... ( أظفر ) بمعنى ( فوز بيها ) لأن فعلا لما الواحد يتزوج ذات الدين بيكون فاز بحاجه كبيرة أوي .. صدقت يا رسول الله
يا شباب .. اختاروا ذات الدين .. صدقوني هي اللي هتعاملكم كويس وتحافظ عليكم وتخاف عليكم .. هي اللي هتقدر تربي أولادكم تربية صالحه .. هي اللي تعرف يعني إيه حب ويعني إيه زواج وبيت ومسئولية
ويا بنات .. لما ربنا يكرمكم وتتجوزا حافظوا على رجالتكم وعاملوهم بما يرضي الله هتلاقوا إنهم هيسعدوكم على قد ما يقدروا
الحمد لله رب العالمين انك رزقتني بالزوجة اللي كنت بتمناها .. ويارب بارك لنا وارحمنا واغفر لنا وتقبل منا وديم علينا السعادة ومتحرمناش من بعض وارزقنا بالذرية الصالحة .. اللهم آمين
عقبالكم !!

......................

القصة فضفضة حقيقية بصحبة مج شاي ..!