الخاينين لأ..الأندال لأ..!


عمنا مصطفي بكري شعاره في الحياة والصحافة هو: أحلى من الشرف مفيييييييييييش..يا آه يا آه..!
واما البقرة الحلوب وقعت في ثورة يناير كان اول واحد واخد ديله في سنانه وناطط من أم السفينة..
طب فاكرين أما مصطفي بكري أمن الدولة أنعم عليه بتوصية من صفوت "الشريييييف" وخد ترخيص جريدة الأسبوع...
وده بعد اداء دور المشاغب والعميل المزدوج في تفتيت حزب الأحرار بتاع الله يرحمه مصطفي كامل مراد ...
بيفكرني مصطفي بكري بالواد النصاب بتاع موقعة الجمل رجب هلال حميدة اللي عامل في أمها شيخ ...
بس فين يروح حميدة في مصطفي بكري اللي جه من الصعيد حافي وأعاد تمثيل دور الفنان فريد شوقي في فيلم "الفتوة" بس على الطبيعة وبجدارة واقتدار طبعاً...
وبجد يستحق جايزة نوفل لأنه استحمل كام قفا من هرم السلطة وانت نازل كده على كام شلوت وكام تفة وشتيمة في سبيل الغاية اللي واضحة في الصورة دي...

عارفين مصطفي كان نفسه في ايه ...؟!
مصطفي كان نفسه ياخد لقب وزير اعلام ...!!
عشان كده مطاطي للطفل العجيب جمال مبارك مفنجر ثورة الإبداع...
وده طبعاً بعد اذن صفوت بيه الشرييييف...!
وكان بيناطح عمو عماد اديب على الوصول لهذا المنصب..
رغم انه مكنش محتاج فلوس...
لأنه كان متبني الخط القومي العروبي الثوري أبو رز بلبن ...!
يعني كان عمنا بشار النعجة يغرف من سورية ويديله...
والقذافي أبو توك توك يغرف من ليبيا ويديله ...
وهنروح بعيد ليه فاكرين قناة الساعة بتاعة ليبيا ...؟!
أهو القذافي كان مسلمها لبكري متشطبة
على المفتاح...
ده غير نفحات وتشهيلات وتسليكيات الأخوة في امن الدولة...
وكفاية تشجيعهم ونظرة الرضا من عيون العادلي...
بكرى اللي كان بيقف في مجلس الشعب مدافعا عن البقرة الحلوب قبل الثورة ويقول بالحرف:" ياجماعة انتو كده بتأذوا الريس...."..!
وكأن يعني الريس أطرش ومابيسمعش..!
وكأن شوية الجرابيع بتوع الوطني على شوية المستقلين مش بيسلموا الكراريس نهاية كل جلسة عشان يصححها سرور ويعرضها على عزمي وعزمي يعرضها على البقرة اللي نايمة في معلفة القصر..!
بكري اللي كان ولا يزال ماشي بمبدا "نافق عشان توصل" كانت الهدايا اياها مغرقاه ...
حتى انه وجد حرج في قبول بعضها احيانا عشان كانت ملهاش مكان ..!
وكان بيقبل بأي حاجة حتى انه مرة طلعوله العمال بثلاجتين من النوع الفخم بتاع الفلل والقصور ونزلوا بيهم عشان ملئيوش مكان ...!
بعد ده كله جاي بكري النهاردة على الفضائيات وعامل شريف وبيخلص تاره من اللي سقطوه في انتخابات مجلس الشعب قدام وزير الانتاج الحربي سيكو بيه مشعل...
ومش بس كده ده طلع كمان ثورجي قديم وزيه زي غيره ضرب كرنيه 25 يناير وحاطه على صدره...
ودلؤتي وبما انه أخذ شكل الشرفاء ونبرتهم وانجعص جعصتهم عمل فيلم كده خايب وجاب شوية ناس اتهمهم انهم من فلول النظام وعاوزين يقتلوه...!
طب ليه...؟!
وعشان ايه...؟!
طب متئتلتش ليه يا عم الثورجي من يوم 25 يناير لغاية دلؤتي...!
المهم الحاج جيفارا الشهير بمصطفي بكري اتهم واحدة كده اسمها جيهان سليمان وشخص يدعي محمد كمال من مجموعة سماها أولاد مبارك..!
زي كده ولاد ابو اسماعيل اللي كانوا عاوزين يقتلوا بوحة الصباح..!!
وصبح صبح يا عم الحاج...!
المهم العيال اعترفوا قدام النيابة بأن المخطط استهدف اقتحام منزل "تيفة" وضربه بزجاجات المولوتوف زي ما كان بيحصل في التحرير..!
وعلى رأي المثل اللي فاتوه مسلسل الثورة يألف حلقه ويتمرمغ في ترابه..!
المهم المخطط فيه أموال وفيه بلطجية ولزوم حبكة "ميولدي دراما" حشر عدد من رؤساء التحرير والإعلاميين معاه...
زي مجدي الجلاد وعادل حمودة ووائل الأبراشي وناس تانية ...!
الغريبة ان الجزء الثاني من فيلم الفتوة -اللي متعملش- كان المفروض المعلم أبو زيد بعد ما يخرج من السجن اللي دبسه فيه المعلم هريدي عمران بمساعدة المعلمة حُسنة والغزولي...
يستخدم طريقة مصطفي بكري البايخة اللي هي شوية بلاغات عبيطة للشرطة والنيابة لاصطناع بطولات و تزوير حقائق لخلق صورة ذهنية جديدة و نفى شبهة العمالة للبقرة الحلوب وجمال وعلاء والحاجة سوزي...
وبكده يخلص الفيلم بنهاية سعيدة ويستهبل مصطفي بكري المشاهدين السذج ويغسل سمعته الوسخة بشوية بلاغات وهمية ويكيف الجمهور اللي حيخرج في نهاية العرض يهتف:"لو المولتوف قصف رقبة تيفة..فالشعب كله تيفة..الشعب كله تيفة"...!!
ــــــــــــــــــــــــــــــــــــــــــــــــــــــــــــــــــــــــــــ
تحديث 10/9/2011:
1- التحقيق مع بكرى مستمر و هو يحاول خداع الاعلام بان البلاغات ضده حفظت .
2- قصر مصطفى بكرى به 40 غرفة و 140 تكييف و ثمنه اكثر من 22 مليون جنيه.
3- مصطفى بكرى تلقى اموالا من جهات مشبوهة و دول متعددة و لا يستطيع اثبات مصادر ثروته.

1 عبرني:

يا مراكبي يقول...

أنا مش متفاجئ فيه على فكرة

هو واللي زيه

بياكلوا على كل الموائد في كل العصور والأوضاع

والعيب مش عليهم

العيب على اللي بيشغلوهم عندهم في كل الأزمان