فقه الكشري...!


عم الشيخ محمود لطفي عامر كان شاب مصري عادي جداً وزيه زي أي شاب تجرع من بلاليع التعليم المجاني بتاع مبارك فأصابه الفشل مبكراً في التفكير و الدراسة معاً..

ولكنه تدارك الأمر فعمل بنصيحة صندوق دعم التنمية والصناعات الصغيرة التابع لرئاسة الوزراء الحرامية بتوع مبارك..وفعلا وكما يقول الاعلان لحق القطار ومستناش الدولة تجمع له شغل..

وتفتق ذهنه عن مشروع عربية كشري..وبالفعل ضربت معاه حلاوة ..وأصبح من جماعة الكشرية المرموقين في دمنهور..ولكنه اراد أن يتخصص..ليس في الدقة ولا الصلصة..

بل أراد أن يشار اليه كما يشار للصفوة في المجتمع..جمع هدومه وطيران على السعودية وهناك انتسب للجامعة المنورة وحصل على ليسانس شريعة..

وبعدها خد دبلوم معهد اعداد الدعاة وبرضو في المدينة المنورة..طب جميل وزي الفل..وبعدين إظاهر الكشري مالهوش سوق في السعودية ..رجع عم الشيخ حودة دمنهور وفتح اول محل كشري بعد رحلته الحجازية..

ولأن الرجل بيحب التخصص ومش بيحب حد يضاربه في الصنف وعاوز يتميز..طلع بيان صريح وواضح يدعو فيه جمال مبارك (قبل الثورة طبعاً) لتولي الحكم بعد والده وإلا يكون آثما شرعا…!!

يعني جمال اللي هو في بورتو طره دلؤتي لو مسمعش فتوى الشيخ حودا حيكون آثم وعليه لعنة الله والملائكة واهل العلم من عينة الشيخ حودا…!

واحنا اللي ظلمنا الواد يا عيني وقلنا إنه "عبده مشتاق" ولسانه طالع على كرسي أبوه…!

ومش بس كده لأ ده الشيخ حوده طينها واعتبر المظاهرات اللي سبقت الثورة خروج على ولي الأمر وكل من شارك فيها من الخوارج ورايحين النار راكبين توك توك…!

وطبعا ولأن الكشري دائما يتبعه طبق "كمالة" فقد خرج الشيخ حودا في برنامج العاشرة مساءا مع الحاجة منى الشاذلي وتوعد الثورة بالعذاب الأليم وأكد إن احنا حنغرق في بحر دم بعد انقلاب الشعب ناكر الجميل على المخلوع مبارك ..!

ومثل الكشري عالي الجودة تهافتت الفضائيات الممولة من رجال الأعمال اللي كانوا مع مبارك زي دريم والحياة واون تي في واخواتها وبسرعة هاتك يا لقاءات مع الشيخ حودا ورأيك ايه في كذا وكمان في كذا وكيف ترى الملف الفلاني وكيف تقرأ الحدث العلاني..

والشيخ حودا راح موسعها على الآخر ومادد رجليه وهاتك يا جخ ونخع ولوك لوك في منافسة محمومة مع نظيره القاهرى بتاع عين شمس الشيخ "سوما" القوصي…!

ولأن الكشري لا يحلو بدون شطة..

راح الشيخ حودا مطرئع بيان كده عالماشي لزوم الدقة وتوضيب الطبق..وفي هذا البيان وضح كيف يمكن لأي شخص ينتمي الى المنهج الكشروي او المدرسة الدئاوية أو حتى حاصل على دبلوم صلصة..

إنه يجيب اللي يجي على نفسه من وقائع كتب التاريخ ويفسرها بعد ما يقشرها ويضربها في الخلاط أو يدئها في الهون ويسيبها تاخد غلوة وتستوي وبعدين يقدمها للناس بعدما يضيف اليها الحبشتكانات التى تميزه عن غيره..

ولا بأس ان يقول بعدها إنه لا يحتكر الكشري ولكن طبقه صواب لا يحتمل الخطأ وطبق غيره خطأ لأنه مش معاه شهادة صحية من حكومة نظيف أيام مبارك…!!

ودلؤتي نشوف عم الشيخ حودا ازاي بيحلل ويحرم ويخلط كله على بعضه زي ما كان بيعمل في عربية الكشري:

بيتنا القديم: ليه أنعمت على حسني بلقب أمير المؤمنين…؟!

الشيخ حودا: أمير المؤمنين لقبٌ يُطلق على الحاكم المسلم المتغلب وإن كان فاجراً ومذهبي في ذلك الإمام أحمد في أصول السنّة وعلي بن المديني شيخ البخاري كما أشارت بذلك النصوص..!!

بيتنا القديم: متخلنيش أقولك كلمة عيب..طب سبنا من اللي فاتت دي وقولي ليه قلت ان جمال من حقه يورث المحروسة برجلاتها ونسونها وعيالها وبهايمها.. واللي يفتح بقه يكون عاصي ومخالف للشرع..؟!

الشيخ حودا: أنا على مذهب عبد الله بن عمر شيخ الصحابة في زمن يزيد بن معاوية وعلى مذهب مشايخي في نجد والحجاز منذ محمد بن عبد الوهاب وحتى الآن حيث إن الحكم في المملكة السعودية حكماً متوارثاً ولا نكير لعلمائنا في ذلك..!!

بيتنا القديم: يا حنييين يا عم حودا..طب إزاي بقا أنت شيخ وعمال تقول السعودية السعودية ومشايخي بن باز وبن عيثيمين وبعدين تطلع مع منى الشاذلي وغيرها وعينك تدب فيها رصاصة منزلتش من عليهم، وكان ممكن تشارك باتصال تليفوني أو تطلع مع مذيعين رجالة، او تعمل زي الشيخ حافظ سلامة وتشارك من غرفة الضيوف في الاستوديو…؟!

الشيخ حودا: الدعوة من خلال التلفاز والترخص في وجود أحياناً بعض النسوة المتبرجات فمذهبي في ذلك هدي الأنبياء لمن فقه هديهم (!!) ، وارتكاب أخف الأضرار لدفع الضرر الأكبر من قواعد الأصول السلفية التي ثبتت يقيناً بالكتاب والسنّة..!!

بيتنا القديم: شيخ حودا لا يسعنا في نهاية هذا اللقاء غير القول يا صباح الكشري يا مولانا…ده طبعا بدل ما نقولك كلمة عيب وأبيحة..!

0 عبرني: