شلاطة والبيان رقم 32...!




لحد إمتى حيكتفي المجلس العسكري بالإدانة والطبطبة من بعيد...
لحد امتى ثورتنا كل يوم يترمي عليها إزازة وطوبة من بلطجية النظام...
مرة في كنيسة...
ومرة في جامع...
والنهاردة في الاستاد...
تخطيط مجرم قاعد متأمن في فيلته...
هحكيلكم حكاية الولا شلاطة بتاع تلاجة البيبسي...
الواد شلاطة المسكين على الله ومش بلطجي..
شلاطة شهرته واسمه الحقيقي في الشهادة مرسي..
كان نازل يشتري مطوة عشان يحطها جنب تلاجة البيبسي لزوم التأمين...
لأنه سامع لوك لوك هنا وهناك بيقولوا إن الثورة قضت على الأمن وكل واحد وشطارته يحمي نفسه...
شلاطة اتقفش في ميدان العتبة اما الشرطة العسكرية ظبطته بيساوم بياع في سعر المطاوي...
الواد حب يبرر..حب يقول..يبرر مين يا عم ويقول لمين..انت بتتكلم مع الجيش...
تاني يوم شلاطة اتسحب من قفاه واتحجز وبعدها اتسك خمس سنين سجن بتهمة حمل سلاح ابيض وترويع المواطنيين...
حلو أوووووووووي...
طب وهو المواطنيين مش قدام القضاء سواء عسكري أو حتى قعدة عرب مش سواء..؟!
الدفاع: شلاطة ضحية الاشاعات المضادة وكان محتاج يدافع عن نفسه..
ممكن..
الجيش: شلاطة كان ممكن يعور مواطن برئ ..
جايز..
المحكمة: أمرت المحكمة بسك شلاطة خمس سنين عشان يحرم ويكون رادع وعبرة لغيرة..
قضاء وقدر..
السؤال: طب ليه بقا يتساب البلطجية الحقيقيين اللي هم كوووووووووول اعضاء الحزب الوطني وعملائهم ووكلائهم...؟!
في البداية كانت موقعة الجمل...
ثم موقعة قرية صول في اطفيح...
ثم موقعة منشية ناصر...
ثم موقعة حرق الأضرحة...
ثم موقعة الحرب على السلفية والإخوان...
وأخيرا وليس آخرا موقعة الجلبية بتاعة ماتش الزمالك وتونس...
إما أن يتحرك المجلس العسكري ومعه الدكتور شرف واللواء منصور العيسوي...
وإما كلنا شلاطة وحننزل نحمي ثورتنا وبلادنا بس مش بمطواة وشومة ..لأ..
احنا المرة دي لا مفر من الذهاب الى شرم الشيخ...
اما ان نقضى على رأس الثعبان...
أو أن يخنقنا بديله...
قد تبدو الفكرة مستحيلة...
زي ما كان من المستحيل ان تقوم في مصر ثورة...
ويبدوا اننا في حاجة ملحة ان نستعيد تلك العبارة السحرية مرة ثانية...
الشعب يريد محاكمة النظام...
إذن فلنذهب الى رأسه...
هناك...
في شرم الشيخ...

0 عبرني: