موثة..!


جائتني طفلتي سهيلة ذات الأربعة ربيعاً وهي في حالة غضب...

وقالت محتدة:

- بابا في ولد قالي في الحضانة يا موثة(*)..!

التفت لها مندهش وجعلتها تعيد قصتها فجاءت نفس الكلمات...

ولما سألتها هل أخبرت الأبلة – الـميس- أومأت بنعم وقالت:

- أيوة وهي زعئتله وشخطت فيه..!

نظرت لي وقالت بكل براءة:

- هو مش موثة دي عيب وربنا حيوديه النار...؟!

تأملتها ثواني ثم أخبرتها أنها بالطبع عيب وربنا "حيزعل" منه بس موضوع النار ده ربنا بس هو اللي يتكلم فيه...

اقتنعت طفلتي سهيلة وانصرفت للعب مع اختها جومانة وكأن شيئاً لم يكن...

في الصباح ذهبت أمها إلى الحضانة وتفهمت مع مديرتها على حتمية توعية الأطفال كلما حانت فرصة بعيب بعض الألفاظ الشائعة في محيط مجتمعنا...

في المساء قال لي احدهم:

- بذمتك يا أخي حتقدر تقف قدام طوفان الألفاظ دي اللي داخلة لك من الشباك ومن تحت الباب وفي الميكروباص ومن الراديو والدش و......و.......و.......

في طريق العودة للمنزل مرت سيارة بجواري وسمعت منها كلمات قصيدة تقول مطلعها:

- سيد يا سيد سيد يا سيد..أيظن إن حلعب به..ابقي تعالي بالليل......!!

ـــــــــــــــــــــــــــــــــــــــــ

(*) موثة = مزة..وهي كلمة محدثة غير مدرجة في المعجم قبيحة المعني مصدرها شارع الهرم.

16 عبرني:

كلمات من نور يقول...

مرحبا بك في نادي : الأباء المصدومين يا أبو سهيلة .....ابني لبصغير (8 سنوات ) عملها فيا واحنا قاعدين على ترابيزة السفرة بس سأل عن معنى كلمة خلى الطعام يلصق في حلقي لا عارفه ابلعه ولا عارفه أرد و زوجي و أبنائي جالهم صدمة ...رحت بسرعه تمالكت نفسي وسألته : مين قالهالك؟ قالي ولد معايا في التمرين ...أنا قلت واحد كبير شتمه بيها بس متخيلتش تطلع من فم طفل في نفس عمره ...قلتله ساعات فيه اولاد مش متربيه بتقول كلام عيب والرسول صلى الله عليه وسلم قال لنا عن اللسان و أفة اللسان ووووووو

والحمدلله مرت بسلام بس حقيقي كان نفسي الأرض تنشق وتبلعني

حضرتك حتشوف من داه مع سواق اتوبيس البنات حتلاقيه بيشغل كل ما هو بذيء من الأغاني ولو تشتكي المدرسة يقولوا نعمل ليهم ايه؟ دي حرية ....

تلوث أخلاقي في كتير وربي يعافينا

الاولاد ببراءة بتسأل دلوقتي ولما يكبروا ميقدروش يسألوا و احنا علينا نبتدي نفهم مرة بكلام ومرة بحدوتة

ربي يصلح حالهم ويهديهم بنين وبنات


على فكرة أنا عازمه سهيله عندي ...خليها تدخل هنا :

http://atfalmennour.blogspot.com

تحياتي

ايامنا الحلوة يقول...

امممممممممممم بصراحة ياسهيلة الله اكبر عليكي قمراية خالص بلاش موثة عشان التلوث السمعي ههههههههههه

للاسف الالفاظ دي بتتسرب للاطفال وهما ببراءة بيسالوا عن المعنى دور البيت والاسرة مهم اوي لازمن ياخدو بالهم وربنا يسترها واللي يغيظك ان الكبار الناضجين دلوقتي بيقولها لبعض على سبيل الهزار

كويس اوي ان ماماتها لفتت ادارة الحضانة لتوعية الاطفال في الجزئية دي

تحياتي

الفقيرة إلى الله أم البنات يقول...

ابو سهيله ...توقع هتيجى تشتكى ان زميلتها بتقول على ولد انه موث
اصلهم خلوها مذكر كمان
زمان كان قمر جميل لطيف لذيذ
دلوقت مزه
حتى الاشياء الجميله اكتست بكلمات قبيحه
ده فظيع
بشع..مريع
كل مرة اسأل يعنى وحش ولا ايه
يترد فظيع من جماله
زمان كان معنى فظيع
يعنى إجرى يا محسن

بيتنا القديم يقول...

كلمات
......
متشكر يا فندم على الثقة والعضوية والترحيب..!
(:
بالحديث عن التلوث الأخلاقي أعتقد انه تحصيل لأنواع كثيرة لتلوث تغاضينا عنها ولم نقف لمنعها كل واحد بحسب استطاعته..حتى ولو من باب العذر امام ربنا...!
موضوع التوعية بالحكاية والمسابقة والحدوتة ده مدخل جميل جدا ونتائجه مضمونة مع الأطفال..ياريت لا نستهين به لأن دي أفضل لغة يحبها الأطفال..
ولو تفتكري ازاي كلنا كنا بنستني أبلة فضيلة في غنوة وحدوته وكنا بنحاول منكررش أخطاء وردت على لسان أبطال حواديتها..!
(:
دمت بخير انت وأولادك وخلي شفشق الميا قريب من متناول ايدك عشان في زماننا ده الأكل حيلصق كتير في الحلق وحيتنح عند مدخل البلعوم...!
واعتبري سهيلة وجومانة اعضاء في اطفال من نور..!

بيتنا القديم يقول...

أيامنا
.......
بصى كان عندنا خمس بيضات فقسوا زي ما انت عارفة خمس كتاكيت كتكوت منهم غلباوي بيقولك كبري في سرك يا حاجة وصلي عالنبي..!
(:
كبار...!
ناضجين...!
أشككككككككككككككككككككككككك...!
يا حضرتك دول كبار أجساد ودون فطرة الأطفال في الإدراك والعقل..!
هو كل من عرف يشد السيفون بعد "البي بي" -لامؤخذة- بقا كبير وملو هدومه...؟!
للأسف الجيل اللي قبلنا تم تسطيحه وتجهيله وهو ساهم في جريمة ضياع جيلنا والجيل اللي ضايع حينتج ايه يعني..بلح وجوافة...؟!
لأ طبعاً انما حينتج كده حاجات مايعة وملغبطة لا هي طرشي ولا هي أم علي..!
(:
والله يا شرين الأمانة في رقبتكم انتم الآنسات اللي اوشكتكم تدخلوا دنيا وتكونوا ماماهات..انتوا مصانع الرجال..يا اما تنتجوا رجالة ينصروا الأخلاق والقيم ودين الله..يا اما تنتجوا شربات ومناديل ورق..!
(:
دمت بخير

بيتنا القديم يقول...

الفقيرة
......
والله يا حضرتك محسن اشتكت رجليه من الجري...!
(:
بصي يا ستي..
النبي صلي الله عليه وسلم اخبرنا انه سيأتي على الناس زمان يسمون فيه الباطل بغير اسمه..يعني تحصل انقلاب في المسميات للتغطية على الخطأ والعيب والحرام بأسماء لا تعطي الاحساس بعمق الخطأ المرتكب..يعني البنت اللي مش ولابد تبقا اتيكيت ومتحضرة ومتفتحة ومش معقدة..والعكس من ذلك البنت المؤدبة المحجبة الملتزمة بدينها..ويتفرع عن ذلك الفاظ مثل تهييس وشهيصة وطبعا الأغاني الهابطة لها نصيب الأسد في تدويل هذه المصطلحات الباكبورتية زي مثلاً:
حبيبي زيئي ميئي

في قلبي وف مريئي

لو جيت أخاصمه حبة

ينشف هو ريئي

حبيبي حبيبي حبيبي

حبيبي زيئي ميئي

*وخدي عندك كمان دي عشان تكمل الصورة:

ما باحبش الكسكسي

علشان بيوجع بطني

الكسكسي ده أصله عجيب

بيخلي مزاجي عنب وزبيب

*وبالمرة دي عشان تعرفي حجم المأساة:
عليا الحرام من ديني

انتي اللي بتحبيني

لما اعصب وأكون متنرفذ

مفيش غيرك ده بيهديني

*وختاما بقا بدي عشان تعرفي وصلنا لحد فييييييييين:

العفشة آفشة سيبك منها

خليك أدارجي وحننها

لا تدور تلف شمال ويمين

يا هؤة داحنا المهنكرين وإييييييييييييييه

................
ودمت بخير..!

الفقيرة إلى الله أم البنات يقول...

هههههههههههههههههههه
سمسم مش قادره اللى فيى البيت هيقولوا انى اتهبلت
إيه الاغانى الرهيبه دى بالله عليك اوعى سهيله تسمعها ولا جومانه
مش قادره إلا بتاعة مريئى دى
ههههههههه

فتــافيت (رحاب الخضري) يقول...

موثة... ههههههههههههههههههه
ضحكتني بجد أوي.. أطفال

مهو المشكلة إن حتى لو حضرتك منعت أولاد من إنهم يقولوا كده.. فده مش معناه إنهم مش هايتعلموا كده

مهارات اللغة فيها استماع.. وهم ليل ونهار هايسمعوا الكلام ده.. من التليفزيون.. المدرسة .. الشارع .. الجيران.. والنااااااااس

بصراحة الله يكون في عونك

بيتنا القديم يقول...

الفقيرة
......
((((((((((((:
يا ستي ولا يهمك اضحكي براحتك وأهو زي ما بيقولوا ان شر المصائب هو ما يثير الضحك...!
(:
والله مائدرش أمنع الأولاد انهم يسمعوا الملوثات دي لأنها منتشرة في كل مجتمعنا بس أقدر أديهم العلاج:

1-أول وأهم حاجه منع الأطفال من التعرض للمزيد من الملوثات السمعية المسببة فى حدوث خدوش في الفطرة والتهابات في الذوق وضمور في عصب الشعور بالعيب.
2- طبعا ممكن نلجأ إلى الغسيل العقلي بالطرفة والحدودتة والهدية المشجعة وبعض المضادات القرأنية أو الانتى دوت antidote ومعناها الترياق,كما يكمن أعطاءهم بعض المبادئ التى تزيد من مناعتهم الذاتية
من الاخر أى حاجه تزود أخراج التلوث من العقل..!
3-تانى حاجه ودى فى حالات التلوث الشديده وهى نقل العزال وندور على منطقة تانية يكون التلوث فيها منعدم أو قليل ونسكن فيها..!
4-أعطاء الأطفال بعض الفيتامينات والكلمات المساعده فى أعاده بناء الذوق والانضباط اللفظي وحلو الكلام..!

ودمت بخير.!

بيتنا القديم يقول...

فتافيت
......
خطوة عزيزة حضرتك يا فندم في بيتك القديم..!
(:
بالكلام عن المشكلة نجد اننا في سباق مع ما يسمى بـ"الرقابة على المصنفات" التى ربما أصبح من مهامها ثلويث المجتمع لإشاعة جو من الفوضى يساعد على خروج جيل مشوه لا يعرف صح ولا يشوف غلط..!
وده المطلوب لاستمرار العملية الديموقرطاسية في مصرنا المحروسة وضمان غيبوبة متصلة ودائمة وأبدية للشباب الذين كانوا يوما أطفالا في الحضانة لهم فطرة سليمة وبراءة يحسدون عليها..الا ان احدهم أصابته العدوي وقال لإبنتي : (يا موثة)..!
فهل نتفرج ولا نعطيه الدواء...؟!
(:
دمت بخير

noora يقول...

هههههههههه الله يسعدها طلعت جدعه وماحدش بيقدر عليها ماشاء الله بس والله اعجبتني موثه ^__^
انا اكافح طوفان من الكلمات كل يوم من المدارس ورياض الأطفال والله يستر

بيتنا القديم يقول...

Norah
.....
خطوة عزيزة يا حضرتك في بيتك القديم..!
(:
بالنسبة لسهيلة هي بالفعل لا ينقصها الشجاعة لمواجهة مثل هذه السخافات..ولكن سلحناها بكل ما تحتاجه من عقيدة وحكمة وموعظة واسنان وقواطع وأنياب وأظافر..!
أعانك الله على ما تجدينه من بذئ الألفاظ ومهمتك الكبيرة هى ترشيد الأطفال وتوعيتهم و...تسليحهم..!
(:
دمت بخير

غير معرف يقول...

اهلاً للواقع الاليم انت بقى عندك نشأ طالع بتشوفه كل يوم فى الشارع اطفال تحت العشر سنين بيقلدوا الكبار ليثبتوا للى اكبر منهم انهم كبار زى ما كانوا بيقوا عن السجاير وبقيت تسمع منهم كل شئ وبقوا كمان بيعاكسوا البنات الكبيرة اللى ماشية فى الشارع
حتى انا شفت طلبة مدارس فى المترو قاعدين كل شغلتهم يعاكسوا فى البنات والناس وبيقولوا كلام قبيح جداً
معتش عارف تعمل ايه علشان تحمى اطفالك ماهو مش معقول هتاخدهم فى جزيرة مهجورة وفى نفس الوقت مش هتعرف تغير الناس
وللاسف الاسفاف فى الافلام والكلام الخارج مازال مستمر وبينتشر اكتر واكتر لانه بالنسبة لهم سبوبة بتجيب فلوس من اللى عايز يسمعه طب والباقى
هترسى على ايه اننا نعمل شعار زة شعار لا تؤذنى بدخانك ويبقى لا تؤذنى بالفاظك واخرتها مجرد شعر او ملصق وليس هناك جديد ان لم يتدخل كل من يدرك الامر ويمنعه او يعترض على شخص يقوم بذلك ولا ينذوى جانباً ان يرفض مشاهدة فيلم كهذا ان يجعل من حوله يتضامنون معه والا يسكت عنها عندما يرى غيره يقولها وان كانت لغيره

وبجد اللى انت والمدام عملتوه كان احسن رد بس ياريت تتابعوا مع الحضانة وياؤيت الحضانة تعمل فترة يومياً للتواصل مع الاطفال وما يلاحظونه ويسمعونه ويبينوا لهم فين الصح والغلط لان ده طفل صغير لما يكبر هيكون ايه الوضع

Unknown يقول...

الواد فى الحضانة ؟

على أيامنا فى الحضانة كان أخرنا نلعب استغماية

يعنى الواد عنده (أربع مرات)* بس فى الدنيا و بيعاكس ؟؟؟


ـــــــــــــــــ
(*) تعريف ابن أوختشى للسنه إللى تمر من عمره على إنها مرة .. هو عنده تلات مرات

بيتنا القديم يقول...

hend...hanady
.............
الموضوع فعلا كبيييييييييييييير ..
بس ادينا بنحاول نلملم شتات الخرق الذى اتسع على الراتق..!
(:
تحياتي

بيتنا القديم يقول...

М€ŝЋМΣŞĦ
........
مشمش يا صديقي...
الدنيا بقت معكوسة يعني توقع من الاجيال القادمة أن تفعل ما لم تكن سيادتك تفعله وانت في الجامعة...!
الحكاية ان التلوث كبرهم "مراااات"..!
(:
وحشتني يا عمنا..!