البنت دي بنتي..!


بعد ان وصلنا كعادتنا متأخرين في هذوها الليلة المُفترجة ..
وذلك بعد ان لف بنا سواق التاكسي 7 لفات..
منهم 6 لفات عدى فيهم قدام النادي وطنش ولا هداشي..
المهم سهيلة وجومانة ومامتهم كانوا آخر شياكة ..
دخلنا القاعة وأول ما شفت العروسة همست لزوجتي:
- يا فرحتي البنت بدرية اتجوزت يا حاجة..!!!
تنفست زوجتي بعمق وارتياح شديدين وقالت:
- أيوة خلاص في الواقع البنت اتجوزت يا حاااج..
- أيون و في الواقع إنها حتبتدى تتعرف على حياة جديدة..
- شايف شريك حياتها منور جنبها ماشاء الله زي اللمبة الموفرة..!!
- شايف يا حاجة شايف ماشاء الله..
بس يا تري هتحاول تكون معاه جميلة ورومانسية ..
- ما تشلش هَم فترة (شهر العسل) دى ان شاء الله تكون حلوة ومباركة يا خويا..
- طمنتيني يا حاجة..
وياتري حتفهم يعني ايه مرحلة ما بعد الزواج ..!
- وبعدهالك يا حاااج..
ما خلاص بقى في الواقع أنا حفوتلك المطرح ..
و استخبى في الزريبة وعييييييييييييييييييييط ..!!
- أمسكِ نفسك يا حاجة..
ده دي..
أوعاك تعيطي عاد أحسن الـDj بيصور..
وهو يعني كل البنات آخرتهم ايه في الواقع غير كده..!
- أيون أيون ..
بس يا تري العمر حيطول بينا يا حاااج لحد ما نشوف..
نرمين ..
وسهيلة..
وشرين ..
وجومانة ..
سحبنهم سحبة بتوع المظاهرات على الكوشة..؟!
- اهه..
إحنا نعمل اللي علينا يا حاجة ..
والباقي علي ربنا ..
وفي الواقع وزي ما انت خابرة وشايفة وعارفة ان مصر فوق الجميع...!
ــــــــــــــــــــــــــــــــــــــــــــــــــــــــــــــــــــــــــــــ
تحديث: الف مبروك يا بدرية وعقبال اللي في باللي..!!
(((((:

22 عبرني:

كلمات من نور يقول...

مبروك مبروك وعقال حمدية وفوزية وشكرية وسعدية....

كان ادام مدرستنا بياع لب ودوم أبو عربية داه كان دايما ينادي على اللب والدوم ويوقول يلا يا حمدية وسعدية وفوزية وشكرية

Noha Saleh يقول...

مبروك وعقبال اخواتها
هى المشكلة فعلا مش فى ان البنات تتجوز
انما فى المسئولية اللى بعد كده
فعلا مسئولية كبيرة

غير معرف يقول...

سهيلة
جومانة
شيرين
نرمين

يا عيني يا نرمين يا غلبانة ، الله يسامحك يا اسامة انا كدة هتجوز على سنة 2030 ، يعني هبقى عندي 49 او 50 سنة لما استني سهيلة وجومانة يتجوزوا واحتمال ساعتها اكتب كتابي في عمر مكرم أو الحمدية الشاذلية .. اقول اية حرام عليكم

نرمين صبري

شيرين يقول...

لولووووووووووي طبعا ما اقولكش احساس ام العروسة عالي عندي موووووووت انا كمان عندي احساس اني اطمنت خلاص على بنتي الطويلة عقبالي يااااااااارب

وعقبال كل البنانيت

تحياتي

أميرة يقول...

ااااااااه .. مش عارفة أفرح ولا اعيط يا ابو العيال
زينة طوال الحتة ، وفرخة "محيط" البدارة، وعامود الصداقة الصدوقة خلاص .. دخلت القفص ..

اييييييييييه .. وداعا ايام العزوبية يا بيو وعقبال الغالية نرمو والعزيزة شيري .. والآنسات الصغيرات سوسو وجوجو ويجعله عامر

Ramy يقول...

مبرووك (:

ربنا يفرح قلبك

(:

بيتنا القديم يقول...

كلمات
.....
يااااااااااااااااااه..
تفتكري ممكن اشوف حمدية وفوزية وشكرية وسعدية..في كلبشات العدل...!
(:
يالا عقبال كل حبايبك وبنات المسلمين..
بمووووت في الدوم ثمرة وعصير..!
(:

بيتنا القديم يقول...

Noha
.....
والله يا نهي كلنا بنتخيل المسئولية زي الحصان ما بيشوف الموانع اللي بيقفز من عليها...
طول ما هي بعيد بتكون صعبة واحيانا مستحيلة..
بس اول ما يحصل اختبار بنجتازها وبنعديها..
ولو يوم وقعنا بنقوم ونقول الحمد لله ان اتخبطنا بس مش اتكسرنا..!
(:
عقبالك لو مكنتيش...!
نزل شرباااات عندك يا واد يا فوزدق للآنسة نهي ومدام كلمات..!

بيتنا القديم يقول...

نرمين
.....
وفيما العجلة ودورك جاي جاي بإذن الله...!
(:
والله اللي يشوف مدي لماضة منطقكم وانتم بترسموا البحر طحينة قبل الارتباط..مش يشوف دموعكم ساعة الغسيل والمطبخ وجومانة لما تصحي من النووووووووووم تعيط جعانة...!
يووووووووووه هو انا افشيت سر لأحد ما...؟!
((((:
عقبالك.

بيتنا القديم يقول...

شيرين
.....
هي من ناحية انها طويلة فدي بصراحة كان فيها جينات البجع..وسمعت والله أعلم انها من كفر البجعاوي..حاكم الناس هناك كولاتهم فرعين وبيقطوفوا البلح من على النخلة زي عنقود العنب بالظبط...
(:
نهايتو...
أدينا جوزناها وخلصنا منها...
عقبال اللي اقصر منها...
(:

بيتنا القديم يقول...

أميرة
....
"عامود الصداقة"...!
ههههههههههههههههه..كحكحكح..كح..هه..!
(:
سيبك انت العماويد كتير يارب كل عمود من دول يجي الونش ويزيحه في احتفال مهيب يحضره المأزون والسادة الشهود...!
(:
على فكرة احنا لا اكلنا جاتوه ولا شربنا عصير قصب...!

بيتنا القديم يقول...

Ramy
.....
عقبالك ويفرحك انت كمان..ولا مش ناويها دلؤتي...؟!
(:
أوعي تكون مش ناويها....!!

قلب ينبض بالحب يقول...

ايه ده فين تعليقي عااااااااااا

بيتنا القديم يقول...

العروسة
........
صبااااااااااااااااح الخيييييييييييييير يا حضرتك..!
(((((((((((((:
هو الجواز بيضيع الذاكرة ويصيب بالهلوسة والتهيؤات...؟!
ملحوظة: من فضلك اعد كتابة تعليقك لأنك معلقتش اصلا..هذه رسالة مسجلة..شكرا لاستخدامكم سلالم بيتنا القديم..تووووووووووووت...!

محمد يقول...

بارك الله لهما وبارك عليهما وجمع بينهما فى خير...

مش عارف اتصل بيك خليك انت اكرم كالعادة وخلينى اشوفك..

ينوبك ثواب

أحمد هندي يقول...

ألف مبروك


وعقبالي أنا كمان يارب

أحمد هندي

يا مراكبي يقول...

تغَمَّض عين وتقَتَح عين هتلاقي الأيام بتجري هَوَا وتلاقي البنات كبروا وفي الكوشة .. بكره تقول المراكبي قال

:-)

Tarkieb يقول...

بكرة ترجع بجوزها لجوء سياسي اكل شارب نايم ههههههههههه

بيتنا القديم يقول...

محمد
...
ربنا يكرمك يا حمادة ...!
(:
الكرم يفرغ الرصيد وتحتاج الى شحتني شكراً..!
تحياتي..

بيتنا القديم يقول...

أحمد هندي
........
الف مبروك يا حمادة الخطوبة وعقبال الجواز بإذن الله بس يكون في القاهرة مش في الزقازيق..!
(:
تحياتي

بيتنا القديم يقول...

يا مراكبي
............
وبكره ليه انا حاس بده من دلؤتي ...!
(:
كل شئ يكبر من حولنا يا صديقي ولكن الأيام تواصل خداعنا...!
(:
تحياتي

بيتنا القديم يقول...

Tarkieb
.......
اممممممم
تصور ماخدناش بالنا من هذوها الموضوع...
على كولن كل وقت وله آذان..!
(:
تحياتي