غزل بنات..!

والله يا جماعة قلبي "انشرح" النهاردة..
حلوة "انشرح" دى كمان..
دي من أيام "أنت أعز صديئ يا توفيئ"..
المهم..

الاسبوع ده شفت اتنين شباب متشربين تفاؤل..
قصتهم كده لما احكيهالك تحس ان نسايم هوا لطشت وشك..
واتسربت إلى ضلوعك فأثلجتها والى قلبك فمنحته النعنشه..
الأول شاب بسيط جداً عرفته من المسجد أيام ماكان في الجامعة..
سأكتفي بالرمز إليه بالحرف "ت. أ" التاء تفاؤل والألف أمل..
الخلاصة كانت حالته المادية أقل من المعدمة وفوق المتدهورة بشرطة..
كان والده بيبيع "ترمس" على عربة يجرها باليد طوال النهار..
ووالدته تعمل فراشة في مدرسة ابتدائي..
كانوا جميعا يسكنون جحراً في قعر منزل يوشك أن يغمن عليه..
هذا الشاب كان في كلية الهندسة جامعة القاهرة..
وكان يبيع حلاوة "غزل بنات" في نفس الوقت عشان المصاريف..
رأيته يوما يحمل عصاه على كتفه تتدلي منها أكياس الحلاوة وفي يده "زمارة"..
حاولت ألا يراني وتعجلت خطواتي لكنه ناداني وحياني مبتسماً..
أكبرته كثيرا في نفسي وشعرت أن هذا الكفاح على موعد مع الأمل قريباً..
ومنذ اسابيع طلب مني صديق أن أوجد له مشتري لشقته بمبلغ 150 ألف جنيه..
وأخبرت بعض الأصدقاء بهذا العرض ونسيت الموضوع بعدها لتلاهي الحياة..
واليوم اتصل بي "ت.أ" بعد إنقطاع سنوات عمل فيها مهندساً في إمارة نفطية..
أخبرني أنه حضر إلى القاهرة ليشترى شقة صغنونة ومحدنئة ..
وأهل الخير دلوه إن انا تحت إيدي شقة للبيع..
أخبرته بالمبلغ المطلوب..
فأخبرني أن المبلغ موجود..
غمرت قلبي السعادة وتذكرت معاناة "ت.أ" زمان..
رددت في نفسي إن مع العسر يسرا..
الحكاية التانية بقا بتاعة شاب عادي بس مش عادي ومش حد كان يعرف انه مش عادي..
أخبرني بنبرة عادية جداً إن شركة أمريكية عرضت عليه العمل والإقامة والدكتوراة..!
ولهذه قصة أخرى نحكيها في حينها..!
........................
مهداة إلى المدونة "L.G"

17 عبرني:

Unknown يقول...

أنا حاسس إنى منعنش بالأمل بعد ما قريت القصة دى

يعنى لسه فى شقة ب 150 ألف؟

أنا مش مصدق نفسى

تحياتى

كلمات من نور يقول...

سبحان الله لكل مجتهد نصيب ....كبر نفسه بنفسه فجزاه الله خير الجزاء .ياريت دي تكون تجربة لشباب كتير من شبابنا وميقولش مافيش فايده مش انا اللي حاصلح الكون ومش انا ومش انا.......في انتظار القصة الثانية

بيتنا القديم يقول...

М€ŝЋМΣŞĦ
........
مشمش بك والله زمان..
(:
تعليقك ده ينطبق عليه قول الشاعر "أي حاجه تيجي من ريحة الحبايب"..!
(:
يا سيدي وفي كمان بـ149 بس أنت أشر وقول اتحفني يا اسامة..!
(:
نورت شقتك..آ..أصدي بيتك القديم يا أفندي..!

بيتنا القديم يقول...

М€ŝЋМΣŞĦ
........
بالمناسبة يا سيدي الكلام خدني ونسيت اقولك انك أعز صديئ يا مشمش يا صاحبي..!
(:

بيتنا القديم يقول...

كلمات
.....
والله يا استاذة كلمات لو كنت حاضرة القصة بالمشاهدة كان اخدك العجب من جميل صنع الله وان نعمه لا يسعها عقل وليس مع الله كيف واشمعني ومش ممكن..انه اله مدبر وحكيم..وفوق هذا وذاك رحيم..!
(:
القصة التانية بتستوى أنا موطي عليها عشان تتسبك في دماغي..!
(:
نورتي بيتك يا فندم..!

Unknown يقول...

بص بقى يا أخ سمسم , أنا بقالى كتير بعيد عن الكلام الحلو ده .. بالراحة عليا شوية

باى ذا واى .. إنت برضة أعز صدييء يا سمسم يا خويا

سنيف سنيف

كدة برضه؟ أهى الدمعة الحيلة فرت

بيتنا القديم يقول...

М€ŝЋМΣŞĦ
........
طب سد سد أحسن ماليش في مشهد لحظة النهاية بتاع يوسف بيه وهبي..وكمان باين عيني اطرفت ولا ده برد وزو..زو..زوكاااااا..اااا..ااااام تشووووووووووووووه..!
(:
الحمد لله..!
نورت.!

قلب ينبض بالحب يقول...

والله يابني ما عارفة ااقولك ايه ..شعرت بعد قريتي ليه كاني اكلت لوحين تلج كده اثلجوا صدري والله واتملا بالتفائل يالا يسعد صباحك يارب يارب

الفقيرة إلى الله أم البنات يقول...

الله يسعد ايامك واسرتك يا سمسم
الواحد اتخنق من الاحباط
قصه تلطف الجو شويه
بس على فكرة ت أ شخصيه
واضحه ومستقيمه
ولا نزكى على الله أحد
ربنا يكرمه ويكرمك

بيتنا القديم يقول...

بيبو
.....
هيا يا أطفال..بيبو..
ماذا نقول..بيبو..
بيبو الصغيرة..بيبو..
أحوالها مثيرة..بيبو..
أجمل حكاية..بيبو..
نوادر وحكايا..بيبو..
(:
نورتي بيتك القديم

بيتنا القديم يقول...

الفقيرة
......
ربنا يسعد قلبك بما يحبه الله ويرضاه..
هو فعلا شخصية زي ما انت وصفتيه بالضبط..
(:
ربنا يعزك ويحفظك ونورتي بيتك القديم.!

hend anwar يقول...

مدونتك رائعة بالتوفيق

Unknown يقول...

جددت الأمل في نفوسنا .

بيتنا القديم يقول...

أم الخلود
........
نورتي المدونة

بيتنا القديم يقول...

tagskie
......
هاف أنيس داي بإذن الله..!
(:

بيتنا القديم يقول...

sun of free dom
...............
ده بس من أخلاقك..!
(:
نورتني

بيتنا القديم يقول...

الإربدي
......
الأمل مثل أشعة الشمس لا تستطيع الغيوم أن تخفيه طويلاً..!
(: