وقفة مصرية..!


مبارك يتصل بالسفير الصهيوني ويوبخه بشدة: اللي حصل ده تهريج يا يتسحاق يا ليفانون..
انتو عاوزين شعبي يقول علي ايه؟!
متواطئ معاكوه؟!
غزه وحاصرناها ومستحملين الشتايم من اللي يسوا واللي ما يسواش..
الشعب وبيعناه هدومه وشحتناه على الارصفة وماشي بيكلم نفسه..
معارضة وسحلناها وسففناها تراب طره وابو زعبل..
ايه تاني عاوزني اعملهولكم..
اخلع بلبوص وادور في الحواري زي المهابيل اطبل على صفيحة فاضية..
بلغ نتنياهو احتجاجي الرسمي على قتل المدنيين الغلابة بتوع الاسطول..
وقوله ان الله يحب اذا عمل احدكم عملا ان يتقنه..
واني بعتب عليه عتاب شديد اوي انه مفجرش الاسطول باللي فيه..
وده عشان يكونوا عبره لبتوع حقوق الانسان وياكولهم السمك..
وبلغه كمان انه لو كان خايف من غضبة الشعب العربي فيحط في كرشه بطيخه صيفي..
انا مظبط شعبي امتى يصحا وامتى ينام وامتى يغضب وامتى يمشى تحت الحيط..
دول 30 سنة حكم يا عم الحاج مش ديمقراطية خايبة ولعب عيال..
المهم..
قوله متزعلش من الفضائيات انا حكرشهم عشانك من على النايل سات..
وللأسف انا سرحت الولاد بتوع الضفادع البشرية اللي غرقوا المدمرة ايلات..
وطلعت كل الضفادع معاش مبكر ومنعت عيالهم وعيال عيالهم من دخول الجهادية..
ماهو لو كان عندنا ضفدعين تلاتة كنا ودناهم مع عزت العلايلي ومادلين يساعدوكم..
ده لأن هذا الأسطول الغرض منه انا عارفه كويس وهو احراجي أنا بصفة شخصية..
لأن انا موقفي ثابت ومتمسمر مع مبادئ اتفاقيات السلام الشامل والعادل وناصع البياض..
ثم وهو مال اردوغان بتاع تركية بغزة واللي بيحصل فيها هو مش جحا اولي بلحم اخواته..
اللي غايظني وفاقع مرارتي يا يتسحاق يا خويا ان اردوغان ده ما يعرفش ينطق عربي صح..
الخلاصة احنا عاوزين نعمل فيلم يظهر براعة ابطالنا الصهاينة اللي خرجوا في الفجرية يغرقوا اسطول الحرية..
فيلم كده أكشن كله تضحيات زي بتاع المدمرة ايلات ونخلي عزت يطلع المره دي ظابط صهيوني حليوه..
وياريت نغير كلمة السر بتاعة غنوة العزبي "بين شطين وميا " ونخليها بتاعة اعلان فيري "عازراعية يارب اقابل اسطولي"..
نهايتو بقا الرصيد قرب يخلص ولسه مستلف 6 جنيه وكمان مستعجل على الحمام ..
بوسلي نتنياهو من بقه وقوله يا كخة اتصل بعمو عشان وحشتني يا واطي يا زبالة يا ابن الكلب...!

4 عبرني:

Ramy يقول...

بيتنا القديم

طبعاالحوار اللى انت كتبة
زى الحقيقى
او نقدر نقول حقيقى
احنا شعب من كتر الهم اتلم
مش عارف ليصرخ ولا يتكلم

عندة حق 30 سنة مش لعب عيال
دةعيب علية حتى

بالتوفيق

كلمات من نور يقول...

لا تعليق وربي لا تعليق ...لي أخت في الله لا أعلم إن كانت ذهبت معهم أم لا و لا أستطيع الوصول إليها وقلبي يرتجف مما يحدث هناك ولا يوجد لسان ينطق سوى بالشجب والإدانه والإستنكار ..داه آخرنا يا أمة محمد؟؟؟؟؟؟؟؟؟؟؟

بيتنا القديم يقول...

سامي
....
شوفت يا عم سامي الزمن خلا المصري بين العالم شكله ازاي..!
لأ ولسه بكره حنشوف أكتر..!

بيتنا القديم يقول...

كلمات
.....
لأ ده مش أخرنا..خلي إيد الأقدار تصفعنا عشان نفوق ونصحا من الغيبوبة..!
دي غيبوبة سنين يا استاذة كلمات..