راجل و3 ستات..!


وأخيراً زست..!
لأ وأخيراً جوووووووووووووووومانة..
طب وليه جومانة..لأنها على وزن مُرجانة -وكمان على وزن جبنة ملكانا اللي بالخير مليانة- بصراحة اسم مرجانة كان عجبني اوي خصوصا ان الناس نسيت على بابا وخدماته الجليلة اللي قدمها لمصر لما اكتشف الزلعة اللي استخبي فيها الاربعين حرامي مع اموال الشعب..وساعتها اتحاكم على بابا بموجب قانون الطوارئ وبتهمة البلاغ الكاذب وازعاج السلطات وتعريض الامن الاجتماعي للخطر وترويج اشاعات مغرضة بهدف النيل من شخصيات عامة والتخابر مع هونج كونج، وكل ذلك لأن الاربعين حرامي طلعوا من بخته الاسود رجال اعمال مهمين أوي واعضاء في لجنة السياسات فضلاً عن اشتراكهم في منتخب مركز شباب الحبانية القومي..!
والتاريخ لن ينسي الست مرجانة زوجة على بابا الرابعة بعد ما طلق التلاتة الاولنيين..حينما نظمت قصيدة مطولة يوم الجلسة على باب المحكمة في رثاء على بابا والتى ذيلتها بحكمتها الخالدة "ان جالك الطوفان ماتلحسهوش كله"..
المهم مش ده موضوعنا..
الموضوع من طأطأ لسلامو عليكو هو ان يوم 24 /4 /2010 رزقني الله بإبنتي (جومانة) بعد معاناة كبيرة عايشتها مامتها اللي هي مراتي..وبصراحة كان الله في عون المامهات يا ولاد واحضنوا اديكوا وبوسوها وش وضهر ان احنا رجالة بشنبات..بجد والله ما نستحمل واحد على مليون من المعاناة دي..بجد اهون تشتغل اعمال شاقة وتنزح البحر الأحمر بمعلقة الشوربة وتنقل جبل عتاقة على ضهر توك توك أو تخلع برج ايفيل بفتاحة الكازوزة عن انك تكون ماما وتدخل غرفة الولادة..!
سهيلة بنتي الاولي فرحانة جداً وحالفة حلفان عيالي ان اللي شيطانه يوزه ويلعب في عداد عمره ويهوب من سرير جومانة هتخرب بيته وحيضطر انه يركب صوابع صناعية بعد ما تاكل صوابع أطرافه الأربعة..!
نوبات الحراسة المشددة حوالين ناموسية جومانة أخذتها سهيلة كلها..وسمحت فقط لمامتها بفترات رضاعة لظروف انسانية بحتة..ولكن بعد التحقيق من الهوية الماموية وكلمة السر الكوبانية وبالطبع رشوة بسكويت غير مثبتة في الاوراق الرسمية..!
جومانة جميلة بجد..مش لأن أنا ابوها ولا لأن مراتي مامتها..لأ لأ..ده لأنها فعلا جميلة..بس فيها عيب صوغنون أوي...
مقاس رجليها 44 ..وعشان كده اتولدت بالعافية قيصري....!!
وده طبعا مع المشي والاصرار والعزيمة وكمان الرضاعة الطبيعية وحماسها وهمتها في مطاردة وسائل النقل العامة سيتلاشى تدريجياً ..المهم الصبر الجميييييييييييييييييل.. والأمل في ربنا كبير..!
احنا النهاردة لابسناها الحلق الذهبي في ودنها ..وده اللي مامتها اشترته من عند الجواهرجي بيه..
شكلها بالحلق تحفة..يجنن..
سهيلة كانت بتابع عملية تلبيس الحلق بدهشة كبيرة وشاركت الجواهرجي في مسك ايد جومانة..ولسان حالها يقول :"يختي عليها ويختي عليها..ماجت رجليها ماجت رجليها"..!
في طريق عودتنا إلى البيت سألت سهيلة وانا أحمل جومانة في شنطة البيبي: تيجي نبدل جومانة بباكو بسكويت يا سوسو..
تلقيت وابل ضربات محترفة من سهيلة تعبيرا عن الامتعاض قبل الرفض المطلق ..فرفعت سقف المساومة الى كيمو كونو فارتفع سقف التلطيش من جانبها واغلقت الموضوع بـ"لأااااااااااااااااااااااااااااااااااااااااا"..!
.......................................................
تحديث: دلؤتي وانا بكتب التدوينة دي الـ3 ستات في سابع نومة..وقد الحت على ذهني بسمة طفلتي الراحلة سلمي..
تراها تمرح في الجنة الأن ..ام تراها تراقبني وتمنحني بسمة اشعرها ولا أراها..وهي تهمس : أبي احضن جومانة بكل ما تملكه من حب فسوف تراني في عينيها وهي تبتسم لك وتحتويك براءتها في حضنك.

19 عبرني:

الفقيرة إلى الله أم البنات يقول...

ربنا يبارك فيها وفى أختها
ويجعلهما قرة عين لك
واهى الحبيبه سلمى سبقت على الجنه
ربنا يسعدك يا أسامة انت واسرتك

بيتنا القديم يقول...

الفقيرة
......
اختي ام البنات ميرسي جدا وبارك الله فيك ..وباسم سهيلة وجمانة ادعوك واسرتك كلها وجيرانك على حفل العقيقة الجمعة اللي جاية الذى يتخلله اكواب "الموغات" الرهيب بتاع الحاج رجب العطار..!
(:
تك كير..!

أميرة يقول...

نسيت تقول أن جومانة وطنية وخرجت إلى النور ليلة عيد تحرير سيناء.. ومصر اليوم في عيد

ربنا يقويك ويعينك على حفظ أمانتهن ويبارك لك

بيتنا القديم يقول...

أم جومانة
.......
ميرسي سيادتك يا فندم جزيلاً أوي جداً..!
(:
تك كير ..!

Unknown يقول...

حمد الله على سلامة أم جومانة .. وربنا يبارك فى جومانة وفي سهيلة

أسلوب حضرتك فى السرد بجد جميل جداً .. ربنا يرحم سلمى .. مش بعيد تكون بتلعب مع إبني فى الجنة .. مين عارف؟

:)))

بيتنا القديم يقول...

انسانة
.......
ربنا يعوضك خير ..
بالتأكيد هم هناك في أجمل مكان مش ممكن يخطر على بالك..ربنا يجعلهم فرط لنا على الحوض..آمين..
(:
أم سهيلة و جومانة بتمسي عليك..!

يا مراكبي يقول...

ألف ألف مبروك ولو إني كنت أفضل إسم حبيبة

:-)

مبروك على حصولك على لقب رابع أهم شخصية في البيت .. ترتيب متقدم جدا

:-)

أيامنا الحلوة يقول...

ربنا يخلي سهيلة واختها جومانة يتربوا في عزك انت ومرمر ويجعلهم ذرية صالحة وتشوفهم عرايس قدامك بالفستان الابيض وساعتها يابابا اسامة هتلاقي قلبك بينتفض لما تلاقي حد تاني بياخدهم منك بجد بجد البنت بتبقى قريبة اووووووي لابوها البنت حبيبة ابوها فعلا ربنا يخليهم ليك ويخليك ليهم

تحياتي

Ramy يقول...

الف مبروك

وحمدا للة على سلامتهم هما الأتنين

جومانا ومامت جومانا

هى متأخرة معلش

بيتنا القديم يقول...

يا مراكبي
........
والله يا بشمهندي ولا لك عليا حلفان..ان اسم حبيبة كان يروق لي سوماتش..ولكن وكما تعلم أن المكتوب في اللوح المحفوظ لازم تشوفه العين..يعني نحن مسيرين فيما نختار ولن نختار الا ما أراده الخالق أزلاً..أوعدك بإذن الله البنتوتة الجاية نفكر نسميها حبيبة..!
(:
اممممممممممممممم..
والله بفكر اجري انتخابات حرة ونزيهة عشان اشوف هحصل على الـ99% ولا فعلاً حكون رابع أهم شخصية بعد المدام والقطتين..!

تك كير يا عزيزي..!

بيتنا القديم يقول...

شرين هانم
........
وحد يقدر ولا يستجري يهوب ولا يفكر يخطف قطة منهم..!
ده انا أقطعوا..أمصمصوا بسناني..أفشفشوا بعقلة صوباعي الصوغير..انت اصلك متعرفنيش..أسئلي عني المعلمين بتوع المنطئة والحتة..!
نهايتو..هو يعني لو جه من الباب ومعاه ابوه ولا عمو وطبعا المأذون والمهر كان عربية وفيلا وحوض سمك..ممكن يعني اغير رأيي ونتفاهم..!
إنما وديني أكملهم الميا..هم لغاية دلؤتي 99 جريح وكسيح ومفقود..واللي يلعب في عداد عمره هو الجاني على خالتو..!
(:
تحياتي

بيتنا القديم يقول...

samy
....
استاذ سامي منور يا فندم ..
ومتأخرة ليه لسه العقيقة شغالة..كل اللي بيجي يبارك بينول من الحب جانب..هو انت مش جاي ولا إبه..؟!
(:
الله يبارك فيك وعقبال أما نشوفلك توابع بإذن الله تعالي..!
نورت بيتك..

كلمات من نور يقول...

الحمدلله على السلامة يا سيدي ...لامة جومانة ووالدة جومانه ....خسارة فاتني السبوع بس معلش ملحوقة ..........أما سلمى فهي تلهو هناك في الجنة وتشعر بها في روحك دائما طفلة صغيرة تنتظركم بشوق بعد عمر طويل بأمر الله تعالى ...تحياتي

بيتنا القديم يقول...

كلمات
.....
الله يبارك فيك..والله لسه مشروع فتة العقيقة شغال..وقد زار بيتنا وفد عائلة مامت جومانة ونالوا حصتهم المقررة من مشروع فتة العقيقة..ثم زارتنا صويحبات مامت جومانة ونلن حصتهن المقررة من تلكم العقيقة..ثم أخيرا نالت عائلة بابا جومانة حصتها من المشروع القومي للعقيقة..ورغم ذلك العقيقة ممتدة والفريزر مملوء عن آخره بمفرادتها وطقوسها ينتظر الأحباب ليتصدقوا علينا بالزيارة وينالوا حصتهم..فهل أنت مستعدة..؟!!
(:
ربنا يبارك فيك وعقبال بناتك باذن الله تعالي..!
بخصوص سلمي..لا تقلقي لقد حفرت مكانا في قلبي..وغرفتها في عمق الروح صاخبة بضحكها وبكائها..وغدا نلقى الأحبة..!
(:
نورت بيتك القديم..!

كلمات من نور يقول...

بيتنا القديم

ربي يبارك فيك ..تصدق بطبق الفتة بتاعي أصلي مش باكل لحم الخراف ....أما بقى لبناتي فأنا عندي 4 من بنين ويلا حاجي اخطب عروستين حلوتين لابنائي الصغار ...علشان الكبار كبار على بناتك الحلوات .....ربي يخليك لهم ويخليهم ليك

كلمات من نور يقول...

ملحوظة

شكرا عالعزومة و كأني أكلت وشبعت وسفرة دايمه (:

بيتنا القديم يقول...

كلمات
.....
ده احنا نجهزهم البنتين يا فندم سهيلة وجومانة ونزينهم ونبعتهم دلفري مع المأذون بإذن الله ..!
(:
الف الف هنا وشفا والمرة الجاية تكون العقيقة بتلو او كندوز طالما مش ليكي في الضاني..الحمام على يمينك لو عاوزة تغسلي ايدك..!
(:
نورتي بيتك القديم

Jana يقول...

حمدالله على سلامة أميرة ..بلغها سلامى وتعاطفى معاها بعد ما عرفت يعنى ايه سهر ووأوة طول الليل :)
ربنا يباركلك فى جمانة وفى سهيلة ويُنبتهم نباتا حسنا ..وتشوفهم عرايس زى القمر ان شاء الله
جمبل اسم جمانة ..لؤلؤتنا الجميلة ..ربنا يحميها
:)

بيتنا القديم يقول...

جانا
.....
أم جومانة تقرؤك السلام وتقول لك ميرسي بشكل فظيع وان وجع ساعة ولا كل 9 شهور وان الموغات عالنار وفتة العقيقة في الفرن وأنت ايش حالك مع الأولاد..(هذه رسالة مسجلة)..!
(:
نورتي بيتك القديم