بطلوده واسمعوده


آعد في أمان الله ولا على بالي وبألب كده يا واش يا واش في كزرولة الانترنت فط ونط خبر يا شباب خلاني فطست – مجازاً – من الضحك ..تصوروا إن في هولندا واحدة آنسة عندها 19 سنة ولا مؤخذة وصل بها التهييس لحد فين..
المودمزيل عملت جوازه فوللي عزمت فيها الاقارب والاحباب واشي محاشي واشي ديوك رومي وجاتوهات وفرقت على المعازيم شربات .. يعني مراسم زفاف كاملة بالتمام والكمال بما فيها فستان الزفاف وشهادة الزواج الرسمية الموثقة على ايد اتنين شهود وفي الشهر العقاري يعني مش عرفي ..
تصوروا بقا العريس يطلع ميييييييييييييييييييييييييييين؟!!!!.
لأ لأ لأ يا شباب لا كلب ولا قرد ولا حتى سواق الهانم ..
العريس بالصلاة عالحبيب يبقا "هي"..!!.
أيون ورب الكعبة البت اتلطشت في نافوخها واتجوزت نفسها..
طب قبل ما نحكم عليها نسمع خطبة الجواز قالت فيها إيه :" لقد اردت اشراك الاخرين في فرحتي بالزواج من نفسي والانفراد بها الى الابد حتى لا يطمع طامع في منافستي على نفسي التي اغار عليها حتى من نفسي'..
صلاة النبي وايه كمان يا عاقلة يا كومل يا زينة شبات هولندا..
:" لقد استطعت مؤخرا توحيد النواحي المتأخرة من شخصيتي (!!) بعدما اكتشفت ان الزواج من نفسي هو افضل وانسب وسيلة منطقية للمحافظة على تماسك تلك الاجزاء المتصارعة'..
بصراحة صعب افهم علاقة الأجزاء " المتصارعة " بالجوازة المهببة دي..
وأضافت حضرتها أنها تعتبر هذا الزفاف مكافأة للسنوات التي قضتها في صراع بين الجوانب العاطفية والاجتماعية والعملية من شخصيتها..!
الغريب والعجيب بقا إن حاكم المدينة بجلالة قدره بصم بصوابعه العشرين ووافق على تمثيل دور المأذون ..ورسم ضحكة عبيطة على وشه جابت من ودنه دي لحد ودنه التانية..!.
السؤال بقا لما الهانم تحب تتطلق أو تعمل قضية خلع من نفسها حتعملها ازاي..؟!.

0 عبرني: