دوأني شكراً..!


منذ الليلة التى قرأ فيها عليَّ المأذون حقوقي القانونية ونصحني بمحامي قبل أن أبصم...
وهمس في أذني إن أي كلام يا عزيزي حيتاخد ضدك في محضر كتب الكتاب ...
ومع اصرار المعازيم على إنهاء المراسم عشان كل واحد يشوف مصلحته...
منذ تلك الليلة عاهدت نفسي -من جوايا يعني- الا أنتقد طبيخ مراتي مطلقاً...
ولقد صارحتني بأنها لا تعرف من الطبخ سوى ما تسمعه في عربة سيدات المترو...
لكنها بالعزيمة وسبق الاصرار والترصد شقت طريقها نحو معدتي عبر المطبخ...
ولا ننسى ذكر المرجع التاريخي العتيق " الأنتيخ في فن التبيخ" طبعة دار "دوأني شكراً" ...
وفي البداية خيل لي أنها على وشك تحضير برنيطة الإخفا زي فيلم الست أم عصفور ...
ومع كل ضربة مغرفة أضع يدي علي معدتي وأتخيل أنها نهاية بطل رواية "طاسة الإنتقام"...
لكنها كانت تتقدم بالفعل مثل القائد "رومل" في حربه العالمية الثانية على أمعاء الحلفاء...
توقعت نجاحها منذ خطواتها الأولي المتعثرة في المطبخ وقد كان ما توقعت...
ليس هذا فحسب بل وبأقل خسائر معوية علقت في قعر الذاكرة...
واليوم...
نعم اليوم...
صنعت زوجتي أرز مفلفل لم أذق أطيب منه من قبل...
وطاجن كوسة في الفرن يا وعدي على الطعم والشكل والريحة...
وطبعاً الدجاج المتبل جيداً كان يسبح في جنبات الطاجن...
ومع المخللات الحريفة والخبز شبه المحمص..
تمازجت ألوان لوحتها التشكيلية المتقنة...
والتى استغرق طهيها في أتليه مطبخها حوالي ساعتين تقريباً...
تمتمت بإعجاب وأنا ألعق أصابعي متعة بما أبدعت ...
سلمت أناملك التى نقشت هذا البورتريه الغني بالفتامين...

8 عبرني:

قلب ينبض بالحب يقول...

" الانتيخ في فن الطبيخ" اممم ده النسخة المنقحة والزيدة من كتاب طنط ظريفة ولاايه ده ياولاد طيب منكن نسخة منه ولا الطبعة نفذت هههههههه

الف هنا وشفا والبركة بقى في وصفات عربية شبكة الاعلام العربية بمترو جمهورية مصر العربية ومطرح ما يسرح يمرح يامعلمي

ايامنا الحلوة يقول...

تسلم الايادي .... مرمر الطباخة الماهرة ياريت تقوليلي على مقادير الطبخة دي يمكن لما اتجوز أفلح واعملها وجوزي يفرح بيا بس اوعي ياسمسم اكل مرمر يخليك تلجأ بعد كده للرجيم القاسي ابو خيار ده عارفه انت عارف الكرش أخرته وحشة

تحياتي

أميرة يقول...

ألف هنا وشفا
بس بلاش الثقة الجامدة دي
احنا لسه في معمل التجارب
مرة تصيب ومرة تخيب

اننننننننن
يا سياف ..
الطبخة اللي بعدها

بيتنا القديم يقول...

بيبو
....
امممممممممممممم
والله يا بيبو يا اختي البنت تخطت العالمية في عمايل اديها وتستحق جايزة "نوفل" عن جدارة واستحقاق..!
(:

بيتنا القديم يقول...

ايامنا الحلوة
............
ان شاء الله حتفلحي بس بعد المرور في امعاء جوزك وتغيير ما يلزم...!
(:
قال الحكماء: الكرش اذعان بالنعمة في الوش"...!

بيتنا القديم يقول...

مرمر
.....
ههههههههههه
تخيب ولا تصيب لا تفرق طالما انها من اعز حبيب..!
(:

يا مراكبي يقول...

ألف مبروك والله فرحتلك قوي .. عموما الواحد مننا لازم ياكل كويس عشان يكبر .. هما قالولنا كده من زمان

:-)

أخبار نشر الغسيل ايه؟ شغال تمام من غير فضايح قدام الجيران؟ مافيش اي حتة هدوم وقعت منك في الشارع؟

:-)

بيتنا القديم يقول...

يا مراكبي
........
حبيب قلبي يابشمهندس جيت في ميعادك بالظبط...
انا حاسس فعلاً اني بكبر ليس حجما فحسب بل ومضموناً ايضاً "اللهم اجعلني في عيني صغيرا وفي عين العالمين كبيرا"..!
دي واحدة...
اما التانية فنشر الغسيل لزوجتك اللي نايمة متعة كبيرة خصوصاً لما ينتهي "الفُم" على خير بدون خسائر في المشابك ولا مفودين في الحتت..علاوة الا يراك أحد من الجيران فيحبط عملك..!
فتأمل عزيزي الزوج...!!
بالحق اخبار تصليح مواسير الحوض ايه والتانجو يا جميل..!
يارب تكون بخير..!
(:
تحياتي