حكايات السابقين




بصراحة كده وبدون مقدمات .. الجواز حلو .. على الأقل لغاية دلوقتي ..
بدأت القصة أني تعرفت بزوجتي في إحدى المناسبات الأسرية أثناء ما كنت في الغربة .. باعتبار أن زوجتي كانت مقيمه هناك برضو ..
تعارفنا وحصل ارتياح وفاتحتها في مسألة الزواج .. وكان ردها أنها مرتاحة للموضوع برضو لكن طلبت أننا نتمهل في اتخاذ القرار ونستخير ربنا الأول قبل ما ناخد أي خطوة
وفعلا ..
استخرنا ربنا سبحانه وتعالى وحسينا بارتياح اكتر وطلبتها من أهلها .. صدقوني لو قلت إني عمري ما شفت ناس بالأخلاق دي أبدا .. مش علشان أهل مراتي .. لكنها شهادة حق .. حمايا راجل طيب ومحترم جدا .. من وقت مادخلت بيتهم حسيت كأني في بيتي وبين أهلي ودي نقطة مهمة يا جماعه لأي واحد يدخل بيت ناس بغرض الزواج ..
المهم .. اتكلمنا في التفاصيل واللي كنت عامل حسابها .. الشبكة يا عمي ؟ رد وقال هديتك لعروستك وأنت حر تجيب اللي أنت عاوزه .. قلت له طيب الشقة في المكان الفلاني وبالنسبة للفرش ..... قال براحتك أنت وهي تفرشوا زى ما انتم عاو زين ... الخ ...... وكان الراجل متعاون والحمد لله في باقي الاتفاق من قايمه ومهر وخلافه
بصراحة حسيت كأنه أبويا وبيجوزني .. كان خايف عليا ومقدرني وبيعاملني زى ابنه بالضبط .. رجل محترم مش كده ؟!!
أما حماتي .. ست طيبه بمعنى الكلمة .. وبدون تفاصيل هقول إنها زى أمي بالضبط
زوجتي .. حبيبتي .. والله العظيم بحمد ربنا وبشكر فضله انه رزقني بيها ... أخلاق وتربيه وبنت أصل بجد .. وإحنا بنشتري أثاث البيت كانت عاملة زى البخيل لما بيصرف فلوس .. مع أن أنا اللي بصرف لكنها كانت عاوزه توفر عليا لدرجة إني كنت بتحايل عليها ساعات علشان أجيب حاجه قيمة .. تخيلوا إنها كانت عاوزة إني أجيب أثاث مستعمل ونجدده علشان مصرفش كنير !! وحتى في الشبكة حاولت إنها تقنعني إني أجيب حاجه بسيطة ...
أخر حاجه فاجأتني بيها إنها طلبت وأصرت إننا منعملش فرح .. وبدل الفلوس ما تنصرف على حفلة فارغة وناس تتنطط عالفاضي ( على حسب تعبيرها ) رحنا اشترينا 3 خرفان .. واحد عملنا عليه عزومة عشا للأقارب في البيت ولبست فستان الفرح وكانت ( قعده ) عائلية جميلة والله والخروفين التانيين اندبحوا واتوزعوا لوجه الله .. لما سألتها ليه كان ردها : ( ابتغاء مرضاة الله وعشان ربنا تبارك وتعالى يبارك لنا ) بصراحة معزتها وقيمتها كبرت أوي في قلبي
عجبني فيها إننا وإحنا بنوضب بيتنا كانت مهتمة إنها تعمل ركن في البيت علشان نصلي فيه .. الركن ده مجهز بسجادتين صلاة ومصحفين وكتب للتفسير والأدعية
كل اللي فات كان قبل الزواج .. أما الآن وبعد مرور أسبوع من الزواج .. مش عارف أوصف إيه !! بصراحة أنا فرحان ومبسوط بجد .. معاملتها راقيه .. طيبه جدا .. هادية .. باختصار ( رائعة )
واحده مقتنعة إن الرجال قوامون عن النساء .. بتحاول ترضيني بكل الطرق .. لو كحيت بس يبقى طوارئ في البيت .. تجبلي عسل على لمون علشان صدر سيادتنا ( مع إني مبحبش العسل ولا الليمون ) بس هي مقتنعة إن العسل بالليمون شفاء من كل داء !! وطبعا بعد الدوا ده تدعيلي وتديني شوية نصايح ولو الكحة أتكررت ممكن ألاقيها بتعيط والله ..
باختصار .. ربنا كرمني بزوجه صالحه .. كنت زمان بقول لها نفسي ربنا يكرمني وأسعدك بس دلوقتي لما بقول كده بكون فعلا عاوز أسعدها
كنت بسمع زمان حديث الرسول عليه الصلاة والسلام : اظفر بذات الدين تربت يداك .. دلوقتي فهمت وعرفت واستوعبت معنى الحديث بجد .. النبي الكريم قال : ( اظفر ) ولم يقل مثلا انكح أو تزوج ذات الدين .... ( أظفر ) بمعنى ( فوز بيها ) لأن فعلا لما الواحد يتزوج ذات الدين بيكون فاز بحاجه كبيرة أوي .. صدقت يا رسول الله
يا شباب .. اختاروا ذات الدين .. صدقوني هي اللي هتعاملكم كويس وتحافظ عليكم وتخاف عليكم .. هي اللي هتقدر تربي أولادكم تربية صالحه .. هي اللي تعرف يعني إيه حب ويعني إيه زواج وبيت ومسئولية
ويا بنات .. لما ربنا يكرمكم وتتجوزا حافظوا على رجالتكم وعاملوهم بما يرضي الله هتلاقوا إنهم هيسعدوكم على قد ما يقدروا
الحمد لله رب العالمين انك رزقتني بالزوجة اللي كنت بتمناها .. ويارب بارك لنا وارحمنا واغفر لنا وتقبل منا وديم علينا السعادة ومتحرمناش من بعض وارزقنا بالذرية الصالحة .. اللهم آمين
عقبالكم !!

......................

القصة فضفضة حقيقية بصحبة مج شاي ..!

14 عبرني:

فراشة البساتين يقول...

حقيقى ربنا يخليهالك

زوجة فعلا واضح من كلامك عنها

انها نعم الزوجة الصالحة

ربنا يسعدكوا يارب

ويخليكوا لبعض

غير معرف يقول...

ربنا يسعد هذا الزوج وزوجته ويلهم كل زوجين السير على خطاهما

جميلة جدا فكرة تخصيص ركن للصلاة بالبيت

مسلم من مصر - محمد على عطية يقول...

السلام عليكم و رحمة الله
أخى,ربنا يبارك لكم و يديم عليكم هذه النعمة,و يرزقكم بالذرية الصالحة.
ربنا يعينك على شكر هذه النعمة و يديم الحب و السعادة فى بيوتكم و بيوت المسلمين.

يا مراكبي يقول...

جميلة جدا

مين بقى فنجان الشاي ده اللي كنت بتفضفض معاه؟

غير معرف يقول...

ألف ألف مبروك أخى العزيز ربنا يسعدكم يا رب .. و الله فرحت خااالص
الطيبون للطيبات ..
أعجبنى حديثك عن أفراد أسرتك الجديدة
بارك الله لك فيهم .. أنت تستحق كل خير
جيت أقول لك كل سنة و انت طيب رمضان كريم ..
ناديه

مهرة سالم يقول...

بارك الله لك وعليك وجمع بينكما بخير .

kochia يقول...

يعني ايه العنوان " حكايات السابقين"؟؟
يعني دي حكايتك انت ولا ايه ؟

علي العموم هي شئ جميل يدعو للتفاؤل
مبروك لصاحب القصة
ايا كان

وياريت ان شاء الله يدوم الحال

تحياتي

بيتنا القديم يقول...

fire bird
.........

عزيزيتي...

أنا لازلت على قائمة الإنتظار ..

خاطب فقط والزواج عما قريب ان شاء الله

والقصة قصة شاب آخر أوردتها للإفادة

عقبالك ان شاء الله..!

(:

رمضان كريم

تك كير

بيتنا القديم يقول...

معروفة
.......
اللهم آمين..!!

ياستي انا بشجعك من دلؤتي على ركن

للصلاة فى البيت ..!!

وعاوزين كمان ركن لكظم الغيظ فى حالة

التنشنة ..!!

أما الركن الثالث والأخير فاجعليه ركن

المصالحة الوطنية ..!!

(:

رمضان كريم

بيتنا القديم يقول...

مسلم من مصر
...........

الله يكرمك وربنا يرزقك مثله ويوفقك

الى ما يحبه ويرضاه ويعجل لك الخير كله

رمضان كريم

(:

بيتنا القديم يقول...

يا مراكبي
.........

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ده فنجان معسل زيك يا بشمهندس يا

برنس .. والله منورني وكسفني بكرم

مرورك وتعليقك ..ربنا يخليك

جدير بالذكر..

أنت أخباراتك ايه..صايم ولا زي كل

سنة..بردو صايم..؟!

(:

رمضان كريم

بيتنا القديم يقول...

ناديه طه
........
أوت يا نادية ..!!

بصي يا ستي الموضوع مش كان عليا مع

اني عايش زيه دلؤتي بالظبط مع فارق

كبير اني عمر ما شفت اطيب ولا ارق ولا

اجمل من خطيبتي ربنا يخليهالي..!!

(:

انت اخبارك ايه؟!!

رمضان كريم

وكل سنة وانت طيبة ومتألقة..!!

تك كير

بيتنا القديم يقول...

إم ك
....

اللهم امين..!!

ولك باذن الله بمثله..!!

(:

رمضان كريم

بيتنا القديم يقول...

kochia
......
يعجبني اوي انك ذكية ولماحة..!!

فعلاً القصة مش تخصني ..!!

مع اني عايش احلى واجمل منها ..!

(:

ان شاء الله الحال حيدوم ما دام

التفاهم موجود والحب كمان..!

(:

رمضان كريم