ساندوتش سكر


أكيد يا شباب
ان كل واحد فينا له عادات لا يشاركه فيها أحد...
يعني مثلاً أعرف ناس بتحب تاخد الجرنال ومج الشاي معاها
وهم داخلين يتمخطروا الى بيت الراحة (الكابانيه) ..!!
اهو منه يتثقف و يتمزج و (.....................)...!!
لأ وفى اغرب من كده..
أعرف ناس بتحب تحط حساء (الملوخية) على الأرز أثناء الأكل (!!)
وواحد مش يحب ياخد دش الا بالكوز
مع انه بيكون مجعوص فى قلب البانيو زي المومياء داخل تابوتها..!!
أعرف ناس لما تزعل تاكل كتييييييييييييييييير...
وناس تانية لما تزعل تنام كتير بردو...
المهم
انا بقا كل ما اروح شقة الحاجة (ماما) حفظها الله...
أول حاجه بعد السلام والبحث عن الجنة تحت قدميها..
أرشق كالسهم عند باب التلاجة وافتحها وأتأملها بلا سبب..
الحاجه (ماما) حفظها الله تتسائل بسخرية مكتومة كل مرة..
هل وجدت ما تبحث عنه؟!!
أشيح بوجهى أن تؤ تؤ تؤ ...
فأنا لا اعرف عن أى شئ أبحث..
ويتكرر المشهد كل مرة!!
ولكن مهلاً
ليس هذا ما كنت سأفضفض بشأنه...
انا أكتشفت فيا عادة جديدة لانج مش كنت واخد بالي منها...
طبعاً كلكم عارفين السكر المطحون...
هو حضراتكم مش كنتم عيال بردو....
انا بقا لما بشوف عندنا سكر مطحون بيكون يوم عيد
احب احتفظ به فى الثلاجة
فبيكون ساقع..
سكر مطحون وساقع كمان..!!
يا حلولى..!!
ندخل في الموضوع بقا....
ركزوا معايا...
نص رغيف عيش طازج...!!
خالى من المسامير
والزلط
والطفش
والدبش...!!
ضع السكر بهدوء شديد وتركيز
يا خبر..!!
بقلك تركيييييييييييييييز..!!
الحمد لله جت سليمة..!!
حاذر ان تسقط حبة عرق منك أثناء إجراء التجربة..!!
أغلق نصف الرغيف بحرص شديد وواحدة واحدة...
حافظ على هدؤك وثبات أعصابك وانت تضعه فى الطبق
الملامين الأبيض المشجر بورد موف من عند طرفه..!!
بحذر شديد قرب الساندويتش نحو فمك
وانت تفتحه رويداً رويداً..!!
أستر يا رب..!!
خد أطمة حذرة...امضغ جيداً..!!
إبلع برفق..
تأكد من إغلاق المرئ
وثبات لسان المزمار في مكانه..!!
تأكد من خلو بؤك من الأطمة اللي فاتت تماماً...
خدلك أطمة كمان أكثر نهماً مما سبق..!!
أغلق عينيك واستمتع..!!
خلصت طيب...
العق أصابعك...!!
نفض إديك...!!
امسح السكر من على بؤك ..!!
إدعيلي !

40 عبرني:

موجة يقول...

اخيرا
يا سلاااام
أخيرا الواحد رجع لعالم التدوين بسلام
الحمد لله
بعد كده مش حأغيب عنه تاني
على فكرة البوست ده جميل جدا قوي خالص

خالص تحياتي
أحمد توفيق

غير معرف يقول...

بص ياسمسم انت والله اللي شكلك في حالة سلاام عادل

من شوية ابو شبت ودلوقت سندوتش سكر

عموما حلوة خلفية الاكل اللي انت شاغل بالك بيها عموما

دا واضح من انك عايش مع الحاجة حفظها الله اليومين دول

أما بالنسبة للملوخية بالرز فانت عارف انا مدمن الموضوع دا

عرفتني انا قلت اكيد كنت بتلأح كلام

ياسيدي اف سلامة من الزهيمر والله نفسي اكتب زيك كدا عن عاداتنا بس انا اكتشفت حاجة

انا عملت المدونة دي عشان كل ما جناح يتكسر اروح اكتب عنه فصعب تلاقي حاجة من مطبخ الحاجة

وانشاء الله نعكل قسم للحلويات ونحط فيه السندوتش بتاعك

عموما ياسمسم ليس الامر بأنا مين أو انت مين

المهم اننا مسلمين

بحب الاخوة دي جدا وبحترمها

بس ياسمسم ليه السكر في التلاجة لما العيش طازة وسخن

انا بهرج

وبعدين انا
مدمن مر يعني سندوتشك بري المنيو بتاعي

تحياتي ليك

ورربنا يشفيني ياعم من الزهيمر اللي انت اتكلمت عنه

انت شكلك اتخلقت من المدونة بتاعتي بس

مشعارف قلت ليه حلوة انا اصلا مخنوق منها بس ما باليد حيلة جوجول سقطها مرتين ((blogger)) بس ياسيدي ولا يهمك

اكيد في حنبقي تمام ونعرف نكتب ونعمل سندوتشات

عموما ابقي جرب الشكلمبوح

دا عبارة عن ملوخية بالبيض

أو السندوتش اللي اخترعوه عيال خواتي

هو تركيبة من
حلاوة طحنية وبيض وفلافل
وبالحنا والشفا
اما لو احتجت الطريقة انا في الخدمة

واحب اقولك اللي ما يعرفك يجهلك


نياهههههها هاهاهاها

يعني ايه ؟؟؟؟؟؟؟؟

تحياتي
ليك

Unknown يقول...

جميل قوى البوست يا اسامة وعلى فكرة انا مبحبش الملوخية بالارز المهم اسف على التاخير فى الزيارة بس ظرف بقى واتشرفت بمعرفتك فى حفل توقيع مدونات مصرية للجيب
وان شاء الله اشوفك تانى ونقعد مع بعض اكتر
سلام

Jana يقول...

مالها الملوخية على الرز !!!؟؟
طب وهى الملوخية ليها طريقة اكل تانية ؟؟
طب ده انا شفت مرة على البحر سيدة فاضلة واولادها كتاكيت خالص ..بعد ما طلعوا من المية هفتانين يا ولداه ..اتنشفوا واترصوا جنب بعض فى ايد كل منهم طبق غويط ميلامين بس بوردة روز الصراحة...ومامتهم وضعت فى كل طبق حفنة من الرز الابيض الجميل
انا ولا همنى لانى كان فى ايدى نصف رغيف حواوشى محترم
المهم ..اخرجت السيدة الفاضلة الترموس من شنطة البحر ..وقلت حتشرب شاى بقى ويمكن تعزم علينا ولا حاجة
لقيتها بتصب سائل اخضر فوق اطباق الرز اللى فى ايد اولادها ..وهاتك يا تقليب ولغوصة اتارى الترموس يحوى ملوخية بدلا من الشاى
انا من يومها تقريبا مش عارفة اكل لا ملوخية ولا حواوشى كمان..

نجرب بقى ساندونش السكر العجيب اختراع حضرتك واحاول اتبع نفس الخطوات فى التهامه
..واكيد حادعيلك ايا كانت النتائج
فى الحالتين حتحتاج الدعاء
ههههههههههههههههههههه

اسكندراني اوي يقول...

ازيدك من الشعر بيت
انا ما باكلش الباميه الا بالعيش وعليها ليمون كتيير
وباكل البلح الاسود بقشره
ها اقولك كمان ولا كفايه
هههه

غير معرف يقول...

هههههههههههه

اولً احب اقولك اني بمووووووووووت في قراية المجلات ولعب السدوكو فالحمام واحيانا باخد معايا الاب توب جوه (ايه انا حره)
ثانياً لما بكون مضايقة بنام ولو عندي يأس باكل كتير ولما بتغاااظ باكل دوفري ولما بكون زهقانة والفراغ هيخنوقني وده قليل بتمشى في الشقة واقعد برضو افتح فالتلاجة بدون ادنى مبررات لحد ما ماما تقولي التلاجه هتسبنا وتمشي ارحميهااااااا ولما ببئى مستعجلة وعيزة اشرب كوباية الشاي السخنة بسرعة بحط ثلجة فيها
(ايييه طقوسي كده)

ثالثاً هعملك انا بئى بوست اجدع من بتاعك اسمو:: ساندوتش مووووز

انا بقا لما بشوف عندنا موز مابرحمهووش
احب احتفظ به فى الثلاجة
فبيكون ساقع..
موز متقشر وساقع كمان..!!
يا حلولى..!!
ندخل في الموضوع بقا....
ركزوا معايا...
رغيف فينو كامل طازج ..!! شفت انا كريمة ازاي
ضع الموزة بهدوء شديد وتركيز
يا خبر..!!
بقلك تركيييييييييييييييز..!!
الحمد لله جت سليمة..!!
حاذر ان تسقط حبة عرق منك أثناء إجراء التجربة..!!
أغلق الرغيف بحرص شديد وواحدة واحدة...
حافظ على هدؤك وثبات أعصابك وانت تضعه فى الطبق
الملامين الأبيض بتاع سيريلاك بتاع مريم اختي وهى صغيرة..!!
بحذر شديد قرب الساندويتش نحو فمك
وانت تفتحه رويداً رويداً..!!
أستر يا رب..!!
خد أطمة حذرة...امضغ جيداً..!!
إبلع برفق..
تأكد من إغلاق المرئ
وثبات لسان المزمار في مكانه..!!
تأكد من خلو بؤك من الأطمة اللي فاتت تماماً...
خدلك أطمة كمان أكثر نهماً مما سبق..!!
أغلق عينيك واستمتع..!!
خلصت طيب...
العق أصابعك...!!
نفض إديك...!!
دخل الطبق المطبخ عشان ماما ماتصرخش ..!!
إدعيلي !

بئولك طقووووووووووووس

عصفور المدينة يقول...

أنا كان لي شوية عادات غريبة برضه

من ضمنها باحب اللحمة ساقعة من الفيرزر بعد ما تستوي يدخلوها لي الفريرز وكنت باحب ساندوتش المحشي
وباحب الشوربة في المج وكنت باحب آكل الحلاوة بالجبنة
وباحب الزيتون جنب الشاي
وباحب أشرب اللبن بالمعلقة الصغيرة لحد دلوقت وباحب المايونيز ع الفول
الخ ذلكم العك

dodda يقول...

:O(
والدايت؟؟؟؟

كان زماااان اكل كسكسى بالسمن والسكر والمكسراااات

الله يسامحك انا جعت!!!!

kochia يقول...

انا بحب الملوخية علي الرز
هو فيه حد مبيحبهاش
وبيكون معاها صلصة كمان ولحمة محمرة
عادي زي الخضار
جربها

حلوة المدونة
تحياتي

غير معرف يقول...

والله يا سمسم رجعتني لايام زمان بس انا بقى كنت بعمل حركة اكثر دسامة متمثلة في عمل سندوتش السمنة وعليه السكر وكنت لئيمة شوية علشان ماما مش تزعق كنت باكله وهي مش موجودة بس برضه كنت بتكشف لان برطمان السمتة بيكون مزلوط طفاسة يا ساتر يارب ودلوقتي بقى الشيكو الي باكله في اوقت وبدون حساب سلامي ليك يا ابو سهيلة

Jana يقول...

يا سمسم ابشر
جربت الوصفة السهلة الهايلة
ولكن لأنى احب دايما الاضافات وضعت ملعقة من القشدة قبل رشة السكر الجريئة
ايه الحلاوة دى !!؟؟
ايه الطعامة دى !!؟؟
ايه السعرات الحرارية اللى تودى فى داهية دى!!؟؟
بلاش حكاية الدعاء دلوقتى واستنى شوية اكون حرقت السعرات عشان ..اقدر ..اعرف ..اجرب..احاول ادعيلك
على فكرة بالمرة بقى
باحب الجبنة البيضا مع البطيخ
وورق العنب بالزبادى
والملوخية على الرز
ولا اشرب الشاى بلبن الا مع ساندوتش حلاوة طحينية او بيض مسلوق او بسكوت لوكس مفتوت فيه"فتة يعنى"
:))
ولاعزاء للدايت
وربنا يسامحك
اروح بقى ادور على بسكوت لوكس

سلوى يقول...

إيه الطقوي دي كلها

عموما أنا سمعت عن ساندوتش السكر مع السمن البلدي

وطبعا جنى الوقت جربته بالقشده

أقولك
هروح أجرب أنا كمان ونبقى نكمل كلام

إن شاء الله

تحياااااااتي

غير معرف يقول...

أنا مثلك فى عشقك للسكر ولكن ساخنا ، فعندما كنا صغارا فى القرية كنا نلتف حول جدتى أطال الله عمرها وهى تخبز لتصنع لكل منا رغيفا ساخنا ممتلئ بالسكر ويسمى "أبورى" .. لا يزال مذاقه على فمى رغم انقضاء الأيام وتغير الزمن .. تحياتى لمدونتك البديعة فى مواضيعها وإخراجها الفنى .

نعكشة يقول...

مجربتهاش بس وصفك ليها مومتشع :D

....

سلامون عليك

غير معرف يقول...

ازيك يا ابو سهيلة
عامل ايه؟..انبسط جدا لما قريت رسالتك انهاردة..ربنا يباركلك ..انت فيك الخير والله وبتسأل عليا وبتدعيلي..وصدقنى بفتكرك بالخير برضه وبدعيلك
اخبارك واخبار طانط وسهيلة واخواتك؟
والشغل واحمد شعبان واحمد التانى وبركات؟
ربنا يسعدكوا :)
انا بخير الحمد لله ماشى الحال الحمد لله وتمام التمام
البوست اللذيذة بتاعتك دي بتفكرنى بسندوتش اليورانيوم الجديد بتاع الشبراوى.. مربى على كستر على قشطة على شوكلاته على مشاكل كتير كده...وله ساندوتش السكالانس بتاع عمو حسنى يييييييييييه يا اسامة... كان ايه لزمته بس الكلام ده
هههههههههه
يله بالهنا والشفا
وربنا يحلى حياتك زي ما حلى بقك
سلامى للجميع وطبعا شوكلاته لسهيلة
اختشك
ام توتة

walaa يقول...

هههههه
انت كنت بتاكل سندوتش لحمه ولا سندوتش سكر
بس حب غريب قوى لسندوتش السكر
على العموم فى حاجات صغيره قوى فى حياتنا بدخل علينا السعاده اكتر من الحاجات الكبيره
تحياتى ولاء

ammola يقول...

ياساتر
:(
نانا دى مش مخليالى اى انفراد
طيب انا كمان باكل السكر بالقشطة وبالزبدة وبالسمنة البلدى السايحة النايحة
وبامووووت فى الزبادى بالعسل الاسود
اما الملوخية حضرتك...فاكيد لايمكن يعنى-يععععع-تتحط ع الرز
بنشربهافى المج كده بشياكة
والرز بأه يتصرف مع اى حيوان تم اهدار دمه لعمل الملوخية..وياسلام لو فلفل حااااامى مقلى
الشاى سيادتك معروف انه ما يتشربش لوحده..دى تقاليد انجليزية عريقة
بيتاخد معاه سندويتش فلافل محشية بايتة فى التلاجة فى ربع رغيف بلدى بايت ومتسخن ومدهون بطبقة رقيقة من الجبنة القديمة اوى..الحكاية مش تهريج يعنى
عندك بأه عصير المنجة بالذات..علشان بيبقى سميك..ده باه بيتشرب بالاصابع
ايوة يعنى تغطس صباعك فى الكباية ثم تقوم بلعقه مرارا وتكرارا حتى انتهاء العصير..بس ده طبعا ما يتعملش فى الاماكن النضيفة
البامية والمسقعة دول لازم يكونوا متلجين..وبالعيش والليمون وبرضة فلفل حاااااامى مولع
البوست ده طلع المستخبى يا سمسم
تحب ندعيلك بأيه؟
:)

Tamer Nabil Moussa يقول...

عندك حق كل واحد فينا ولية عادات وتقالبد خاصة

تحياتى

-_- يقول...

صيف سعيد لك وللجميع

بيتنا القديم يقول...

موجة
....
عودا لذيذاً يا صديقي موجة

أكيد البوست عجبك عشان انت بتحب

السكر يا سكر ...صح؟!!

(:

بيتنا القديم يقول...

afew good men
.............
"عموما حلوة خلفية الاكل اللي انت

شاغل بالك بيها عموما"

.
.
.
وهل يؤكل "ابو شبت" يا رجل..!!

(:

ركز سيادتك يا فندم..!!

بيتنا القديم يقول...

ayman badr
..........
"وعلى فكرة انا مبحبش الملوخية

بالارز "

.
.
.
تعجبني يا ماااااااااااااان

(:

انا اللي اتشرفت بيك يا ايمن انت

والزملاء المحترمين اللي قابلتهم هناك

نتقابل على خير يا حبيبي...

(:

سلام

بيتنا القديم يقول...

Jana
....
"مالها الملوخية على الرز !!!؟؟"
.
.
.
أبداً

بس في ناس بتاكل بعدها

مسقعة بالمكسرات..!!

يعني كمكمل غذائي طبيعي غني

بـ"المعكنات"..!!

(:

بيتنا القديم يقول...

اسكندراني اوي
.............
انا مش شايف أكل البامية مع البلح

ولا قشر البلح منقوع فى عصير الليمون

شئ غريب...!!

بالعكس أعرف واحد اسكندراني اوي

بيعمل كده..!!

(:

شكراً على البيت بتاع الشعر اللي

زودتهوني...الله يعمر بيتك قادر يا كريم

(:

بيتنا القديم يقول...

نوره الخشن
.........
"اولً احب اقولك اني بمووووووووووت في قراية المجلات ولعب السدوكو فالحمام واحيانا باخد معايا الاب توب جوه (ايه انا حره)"
.
.
.
طب عامله وصلة "دي اس ال" جنب مواسير

"المياه" بتاعةالباث روم ولا مقضاياها

من هناك واير لس...؟!!

(:

اهلاً بيك يا فندم "موزه" جديدة فى طبق

فاكهة بيتك القديم..!!

(:

بيتنا القديم يقول...

عصفورى
.......
"وكنت باحب ساندوتش المحشي..."
.
.
.
لأ
يا عصفوري أزعل

أخوك متيم بالموضوع ده

مع المخلل وزلموكة دجاجة فقدت زوجها

في ملحمة الغدا...!!

راجع نفسك يا صديقي..!!

(:

بيتنا القديم يقول...

dodda
......

نو نو دودا

الناس الكومل لا يتنازلوا عن عادتهم

التي لا يشاركهم فيها احد..!!

(:

لسه جعانة...؟!!

بيتنا القديم يقول...

kochia
.......
اممممممممممممممم

ملوخية على الرز

أحيلك الى تعليق جنى

والترموس بتاع الشاى الأخضر

ربما تتراجعى عن قناعاتك الخضراء هذه

(:

والله مرة جربت سيبت الأكل وقمت..!!

بجد حسيت ان معدتي "بتطوح"

إحساس لا يوصف تعقبه حملات توعية بيئية

في بيت الراحة (الكابانيه)

(:

تصدق كلمة كابانية قريبة من كلمة

كباريه...!!

اهو كله مكان لقضاء الحاجة والسلام..!

(:

نعوذ بالله من الخبث والخبائث..!!

بيتنا القديم يقول...

بيبووووووووووووو
................

وانا اقول ليه الحاجة حفظها الله مامتك عملت باسوورد للنملية وكهربة بطرمان
السمنة وحطت كاميرا زي بتاعة المترو على باب التلاجة...!!
آه منك
تجنني بلد
(:

بيتنا القديم يقول...

Jana
....
لااااااااااااااااااا

قشدة لاااااااااااااااااا

استر ياااااااااااااااارب

طب وانتى عامله اييييييه دلؤتي

كويسة يعني...؟!!

طب بصي مش تفكري فى حاجه خالص

حاولى ترددي حاجه بتحبيها في بالك

مش تخافي انتي كويسة البرد اللي انت

حاسه بيه ده عادي...واطرافك المتلجة

بردو عادي...وانهمار العرق من جبينك

شئ عادي خالص...وانعدام الرؤية شئ

مش مقلق...بس الكحة اللي قلقاني عليك

انا هنده الدكتور خشبة وارجعلك بسرعة

(:

"على فكرة بالمرة بقى
باحب الجبنة البيضا مع البطيخ
وورق العنب بالزبادى
والملوخية على الرز
ولا اشرب الشاى بلبن الا مع ساندوتش حلاوة طحينية او بيض مسلوق او بسكوت لوكس مفتوت فيه"فتة يعنى"
"
.
.
.
بطيخ بالحبنا مش فيه خطورة...

مكمن الخطورة ان يكون أطمة البطيخ

أكبر من الجبنا...فتنفجر الشحنة في بؤك

(:

يالا الله يرحمك

ويحسن اليك..!!

والله يا كنت طيبة

هروح ابلغ عصفور المدينة

ونحضر للعزا

إهئ إهئ إهئ

عااااااااااااااااااااااااااء

بيتنا القديم يقول...

Salwa
.......
"طقوى"
إحم إحم إحم
طيب بما اني بعتبر نفسي خليفة سيبوية
فسأصلح هذوها الخطأ الشائع
تتكتب كده
"تكوى"
وليست "طقوي"..!!
(:

"سمعت عن ساندوتش السكر مع السمن

البلدي"
.
.
.
إرجعي يا سلوي

مدونتك عاوزاك

ده طريق كله سعرات

الرايح مفقود

والراجع مكبوس

وزنك ثم وزنك ثم وزنك

لاااااااااااااااا

الله يرحمك

كنت كويسة

اييييييييه

محدش واكل

منها حاجه

دنيا

"سيلافي"

(:

بيتنا القديم يقول...

إيهاب رضوان
...........
"رغيفا ساخنا ممتلئ بالسكر

ويسمى "أبورى"

.
.
.
أجعتني ورب الكعبة

وتاقت نفسي الى زيارة جدتك

أطال الله في عمرها..!!

(:

مرحباً بك في بيتك القديم

ارجو ان تنال راحتك

لا تقلق من اصوات الأقدام ليلاً

بيتنا يسبح الله في جوف الليل

(:

بيتنا القديم يقول...

نعكشة
.....
طب جربيها كده..!!

بس في غرفة خفيفة الإضاءة..!!

وفي صمت لا تسمعى معه الا اصوات اضراسك

المستكة في سيمفونية طحونية ممتعة..!!

(:

طيب موافق يا ستي السلمون علينا

والليمون عليك والبصل كمان..!!

(:

بيتنا القديم يقول...

ام توتة
.......

اممممممممممممممم

والله وحشتينا

ربنا ييسر لك الأحوال

ويسعد اوقاتك

(:

بيتنا القديم يقول...

walaa
.....
وما اكثر المنمات الصغيرة الجميلة في

حياتنا الماديات تقتل البراءة

فى قلوبنا

وتحولنا الى آلات بالريموت

(:

بيتنا القديم يقول...

ammola
......
"الشاى سيادتك معروف انه ما يتشربش لوحده..
دى تقاليد انجليزية عريقة
بيتاخد معاه سندويتش فلافل محشية بايتة فى التلاجة فى ربع رغيف بلدى بايت ومتسخن ومدهون بطبقة رقيقة من الجبنة القديمة اوى..
الحكاية مش تهريج يعنى"
.
.
.
بارك الله في علمك

ايتها القديسة

امولة

فعلاً

"من ذاق عرف"..!!

(:

بيتنا القديم يقول...

Tamer Nabil
...........
طيب انت بتبخل علينا بمعرفة احداها

عندك لييييييييييييييه..!!

(:

بيتنا القديم يقول...

Sharm
.....
صيف احلى ليك انت

يا دكتور

مبروك للآنسة أختك

عقبالك

ان شاء الله

(:

L.G. يقول...

مالها الملوخية على الرز واضح ان جنى معايا على الخط

أنا شفت ناس تفصص السمك وبعدين تقوم تغسل ايدها وبعدين تاكل
وناس بتعمل سندويتش موز

طب فول بالبيض ازاي ؟؟

عارف انت بتفتح التلاجة عند ماماتك ليه بتدور عاملة حاجة حلوة تاكل منها ولا لأ
واضح انك بتحب الأكل وبتفكر كويس قدام التلاجة والدتي زهقت من وقوفي قدام التلاجة بلا سبب
تحياتي

بيتنا القديم يقول...

ال جي
.....
يااااااااااااااااااااااااااه

اخيرأ جينا في بالك يا فندم

ازيك اخبارك ايه؟!!

(:

انا لا انتقد العادات الغريبة

لأنها ليست بغريبة عند اصحابها

ومنها الرز على الملوخية..!!

(:

انا بحب الطيبات من الرزق وبحب التفنن

في الاكل وبحب اسهر واتعشى بره مع صحابي

الى ان اتزوج ساعتها هاكل مع مراتي..!

(: