تاج أحلام اليقظة


اييييييييييييييييييييييييه...!!
ودارت الإيام...ومرت الإيام...!!
المهم قد عادت الينا السلطانية من جديد..!
أتأمل قليلاً...
فأجد شوارع التدوين زحمة..
وازقته ضيقة..
وحواريه جد متعبة..!!
يداهمك توك توك الأفكار ويباغتك بالقول:
توصيلة يا حضرة..فوكيره يا محترم..!!
تترك هذا وذاك وتتحسس طريقك بين افكارهم..
وافكارهن..
وافكار أخرى مبعثرة على رصيف التدوين..!!
وبينما انت مهموم ماذا تكتب ولمن تقرأ؟!!
لا تتنبه انك قد اقتربت كثيراً من شرفة بلكونة مدونة احدهم...!!
وطششششششششششششششششششششششش..!!
وتنتبه على هول المفاجأة...
ضاعت بدلتلك يا حلو وابقا حلني..
لو الأسطى محروق المكوجي قبلها منك ورجعلك شبشبك اللى واخده منك رهن..!!
هذا الطش بإختصار اترمى من بلكونة الأستاذة (جنى)..
وزي ما انتوا شايفين لابد من رد الطش طشين
والإجابة على تساؤلات التاج المتكحرت من عندها..
الله المستعان..!!
محافظة شمال بيتنا التعليمية
الإدارة التدوينية
مدونة جني التجريبية
دبلومة أحلام اليقظة
أجب عن الأسئلة الأتية أحسن لك.!
بالتوفيق ياااااااااااااااااااااااااااااااااااااااض..!
1- أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
-كنت باحلم اكون طيار..وقد كان وانحشر طائر الوهم في محركات احلامي وسقطت طائرتي في اليم..!!
-كنت بحلم اخوض حرب ضد الإحتلال الإسرائيلى..واقف بالعلم فوق المسجد الأقصى..وءأسر واحدة زي لويزا أميرة الهوسبتاليين اللى كتب عليها عيسي الغطاس بتاع فيلم الناصر جمال عبد الناصر..!!
-كنت بحلم ببيت هادئ بمبي واطفال في بهجة التفاح ورائحة الزهر..اممممممممم..يعني مالا يدرك كله لا يترك كله..!!
-كنت بحلم بترتيب عائلي أفضل..وبتغيير في انماط وسلوكيات عائلية بردو أفضل..!!
-كنت باحلم بجد بجد بجد والله العظيم..انى كل ليلة اقف على باب أحدهم اترك له سلة بها الآلاف الجنيهات..للعلاج..للعمل..للزواج..لكفالة..لفك كربة..لإزالة هم..ثم للدعاء لي بظهر الغيب دون ان يعرفني..!!
2- أذكر خمس أحلام على الاقل ..تخص مستقبلك .
ج- بحلم ببكره يكون اقل شراسة من النهارده
-بحلم اني في كابوس واكيد حد هيصحيني منه كمان شوية
-بحلم اني اصبح غني بالعبيط ومرفه قوي ومبحبحه معايا عالآخر
-بحلم اضيف شئ للحياة من حوليا غير الرخامة اللي هينقشوا عليها "هنا يرقد سمسم يا رجاله"!!
-بحلم اكون اب صالح لسهيلة واصلح أوضاع هي مالهاش فيها ذنب..!!
3- أذكر شخصين على الأقل متواجدين فى حياتك حاليا ..كنت تود وجودهم قبل الآن بزمن
ج- الشخص الأولاني هو شخصه على فكرة إمرأة يعني غيرت معالم وتركت بصمات قدميها
على سجاد بيتي القديم..يعني لسه هغسل وانضف واهوي السجاد فوق السطوح..!!
الشخص التاني (خبرتي) اللي اتاخرت قوي وكان نفسي تكون موجوده ساعة قرارتي اللوزعية..!!
4- أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا
طيب بعيداً كده عن (اليوتوبيا) ومقولة كان نفسي الصحابة -رضوان الله عليهم- كلهم يكونوا في حياتي وصلاح الدين و...و.....و........مع ان ده حلم كل مدون فينا يعني...!!
-العفريت العبيط التخين اللي كان في مصباح علاء الدين السحري...بس بشوية نصاحة هخليه يتورط في قرض بنكي او قسط شقة بتاعة شباب العفاريت..وهخليه يمضي اصالات امانة في حب مصر..ومن ثم اطلق العنان لرغباتى دون التقيد بثلاثة فقط..!!
-جدي - عليه رحمة الله - والد بابا عشان يعيد النظر في جوازة الحاج والحاجه..يعني يديهم فرصة يفكروا يستخيروا يستشيروا..وبعدين وبالرغم من كل شئ..يفشل الجوازة ويريحنا احنا احفاده...!!

8 عبرني:

Jana يقول...

الدبلومة دى سنتين ..يعنى انت لسه مشرفنا شوية كمان .اعمل حسابك بقى والبس بدلة ضد التش والمية والنار والحشرة والفار
نتيجة الفحص
تناسيت اجابة السؤال الرابع
وعندك سؤال اجابته فيها تورية مشفية ..يمشى يعنى على كل لون يا باتتسا :)
وبالرغم من هذوها وكذالوك ..حنعديك السنة دى ..بمرتبة الشرف لوحدها عشان ترجع تكمل احلام بقى وانت نايم
حقا يا سمسم
احلامك كلها جميلة
وكله لسه فى ايديك
والبيت البمبى ورائحة التفاح ..وستعاود طائرتك طيرانها ..وقد تترك للبعض ما هو افضل من الاف الجنيهات .وتنال بفضل الرحمن الدعاء بظهر الغيب
سهيلة ..هى ان شاء الله اغلى ما ستتركه كبصمة بعد عمر طويل
ولكنى لا اضمنلك موضوع الغنى بالعبيط ده هههههههههههه
دعاء من القلب .. ربنا يحققلك كل احلامك بما فيه الخير لك والرضا
فى النهاية شكر مرتين
الاول على اجابة التاج ..بأحلى ما يمكن اجابته
الثانى
على اغنية "يا طيبة" ..اروع ما اخترت فى بيتنا القديم
:)

بيتنا القديم يقول...

اممممممممممم

طيب الأول اروح احط وداني في الايس بوكس

عشان تبطل توهج واحمرار من هذوها

الطراء يا فندم...

(:

ثانياً اروح بردو اشوف ايه حكاية السؤال الرابع ده ..مع ان الواد اللى قاعد جنبي كان فاتح الورقة على البحرى..يالا اظاهر محتاج كشف نضارة جديد..!!

(:

ثالثاً جزاكم الله خيراً على المرتبة بتاعة الشرف يارب يارب تكرميني ببقية العفش وأكمل فرش الشقة..ويعدلك يا فندم في عافيتك يارب..!

(:

سهيلة بتحييك وبقولك ثانك يو على دعائك لوالدى العزيز يا طنط..!!

(:

إجابة التاج لها شكر واحد فقط ان يرد لصاحبة الفضل التي اتاحت لي ولغيري من المدونيين التواصل عبر عالمنا الافتراضي الرائع..!

يا طيبة

للناس الطيبة

استمتعوا بمدونتكم

في بيتكم

القديم

(:

تحياتي لكم جميعاً..!

sa'7so'7te يقول...

هممممممممم
انا برضه حسه ان الدنيا زحمة مش تدوين بس .. دى زحمة فى كل حاجة
مذاكرة و محاوله طبيخ و محاوله بنوته على محاوله قرب من ربنا على تدوين على السؤال على ناس بقالها كتيييير مش معبرانا

يلا الدنيا مشاغل

اما عن التاج..ف همممممممم
ربنا يحققلك احلامك و يصححلك احوالك
بس اسعى يا عبد و انا اسعى معاك

Jana يقول...

يعنى الناس تقول عليا دلوقتى ليا فى الكوسة ..ورجعتلك ورقة الامتحان بعد ما غششتك ؟؟؟؟..وانا اصلا مبحبش الكوسة بس نمشيها بالبشاميل

طيب ..بخصوص جد حضرتك ..احنا كمان كنا نتمنى وجوده عشان نشكره على انه كان سبب فى وجودك فى عالمنا ...حقيقى يعنى ..مش مجاملة

العفريت ..طلعلى بليل فى الضلمة وقاللى تنجحى سمسم أحسنلك ..وتديله المخدة مع المرتبة عشان الشخير مصدعنى وانا عفريت عندى صداع وصاحب عيا وصاحب عيال وصاحب صاحبه وصاحب بعد نظر وصاحب العو ذات نفسه بصفة شخصية
قوم انا حضرت على طول صينية القرع ..اقصد الكوسة عشان منجرحش حضرتك

لذلك ...مبببررروووك مش من تحت الضرس ولا حاجة
نجحت فى درجةالماجستير وعقبال الدكتوراة ..ساعتها العفريت النص كم بتاعك يكون اتكل ..عشان نتوصى بيك صح
D:

بيتنا القديم يقول...

سخسوختي
.......
والله يا ضكتورة عمال اقول يا ارض انشقي وبلبعيني..!!
بس حتى الارض زعلانة من تقصيري في زيارة عيادتكم اللي على المركب الورق..!!
طيب اعاقب نفسي ازاي..؟!!
اوك انا موافق على كل التعزيرات والفرمانات اللي ممكن تخطر في بال سيادتك يا فندم..!!
بما فيها الحقن وخلافه..!!
(:
سأسعي يا فندم وسأعمل بنصيحتك يا ضكتورة..بس بالحق كيف حال السبعة الباقيين؟!!
هل لا زلتم تمارسون هواية مطاردة الضفادع من فوق صهوات جيادكم الفورمالينية..؟!!

بيتنا القديم يقول...

جنى
....
ربنا يباركلك يا فندم..!
حقيقة الأمر انك لست اول من يعيد الورقة لطالب في لجنة الامتحان..!!
فالبعض يبيع الامتحان بسيارة فارهة من اجنس والد الطالب..والبعض ينجح وهو مستقر في قعر قصر والده ويلعب التنس مع السيد الوزير..!!
(:

"..احنا كمان كنا نتمنى وجوده عشان نشكره على انه كان سبب فى وجودك فى عالمنا..."

طششششششششششششششششششششششششش

لأ

ده مش صوت بطاطس فارم فيرتس وقعت في الزيت..ده صوت شوية ميه رشتهم على وداني المحمرة..!!

(:

جزاك الله خيراً..وربنا يخليك ويخلي معرض "تاكى" بتاع المراتب التابع لمدونتكم الاسفنجية..!!

الستة بتوع صيدلة يقول...

يتشرف جروب السته بتوع صيدله
بدعوه حضرتكم على حفل افتتاح بلوجهم الكريم :)

بيتنا القديم يقول...

الستة بتوع صيدلة
................
هههههههههههه

مبروك المستوصف الجديد يارب عقبال

مستشفى الستة الدولي ...آمين!!

(: