هالة سرحان...أبوغريب المصرية



اهلاً يا شباب




حد فاكر الفيلم بتاع أحمد زكي




اللي كان أسمه الهروب




فاكرين إن الفيلم كان عبارة عن قصتين في بعض




الأولي بتاعة مظاهرات في الجامعة




الثانية بتاعة واحد اسمه منتصر-اللي هو احمد زكي- عاوز يغسل عاره ويسافر الي تركيا ليقتل زوجته المخطئة




طب وإيه العلاقة مابنهم




طبعاً...سيناريو الفيلم بيقول عشان الحكومة تداري خيبتها في الأولي هربت منتصر-اللي هو احمد زكي- من سجنه




وأخذت تطارده كما يطارد القط فأراً مع قدرته الأكيدة في الإمساك به




حتي إن في المطاردة تم توريط ضابط ذو رتبة عادية علشان المسألة تولع شويتين




والجرايد خدت اوردر انها تكتب وتتوسع في الخبر...وتصور منتصر-اللي هو أحمد زكي- انه إرهابي خطير ومجرم لا يشق له غبار




وفعلاً غطي الخبر المفبرك علي الخبر الأول لصالح تغطية سياسية وخيبة مدارية




ودي عادة الحرامي لما يحب يهرب لازم يفرقع حاجة وراه عشان الناس تتلهي بيها وتنشغل عنه




أما قوات الإحتلال الأمريكية في العراق فأظن إنها شافت الفيلم بتاع منتصر- اللي هو احمد زكي- لما المقاومة حققت إنتصارات




وإحتاجت إنها تغطي علي موضوع سرقة ثالث أكبر إحتياطي للنفط في العالم




فراحت مسربة صور وسديهات بتاعة التعذيب في ابو غريب...وليس صحيحاً انها نزعة ضمير من الجنود الحنينين بتوعها




بدليل ان محدش إتجازي ولا اضر من اللي ثبت قيامهم بالتعذيب والقتل البطىء للعراقيين




وهذا اظنه ما حدث في حلقة هالة سرحان




يعني بالبلدي حتي لو إفترضنا ان البنات مظاليم وان الحاجة المادية والرغبة في النجومية اللي وعدتهم بيها الست هالة هي اللي دفعتهم لكدة




بجد وبشوية عقلانية وموضوعية ومنطقية ومهلبية...ايه اللي هيضر لما اهليهم هيعرفوا اللي حصلهم...ويعني هم كانوا رايحين يسجلوا دون علم اهليهم




لأ واللي يغيظ ويفرس ان واحدة خطيبها عرفها من البلوفر بتاعها




يا سلام...يا سلام يا سلام يا سلام




علي رأي علاء ولي الدين الله يرحمه




هو مفيش في البلد غير البلوفر اللي الباشمهندس جايبوة للغندورة




وعشان سبك الموضوع وتكمل القصة...لازم المسألة يطلع فيها صعيدة وشرف وتار ونار...وهنادي...ومتناديش عشان الناس نايمة




وواحدة امها راحت تستنجد في دار القضاء العالي...لما عرفت إن محافظة قنا كانت بتتفرج علي البرنامج...وإن رجالة المحافظة خدوا أجازة من وظايفهم
وأشغالهم



عشان جايين يخلصوا علي بنتهم اللي صورتها الحاجة هالة بنت سرحان خرشم الله وجهها




ياسلام...ياسلام ياسلام ياسلام




علي رأي علاء ولي الدين الله يرحمه




إشمعني بقا دار القضاء العالي وليه مش قسم بولاق




وطبعاً وزير العدل حلف بشرف أمه أنه لن يغمض له جفن حتي القضاء علي هالة سرحان وإنهاء حركتها المسلحة في إقليم دارفور




ودقي يا مزيكا...وانا وانتم...واللي مش فاهمين




وسلام مربع لهالة...والناس الحلوة...اللي مش هتقدر تغمض عنيها




6 عبرني:

عين ضيقة يقول...

تصدق؟؟
هههههههه

البلوج بتاعك كويس جدا بس ايه حكاية اهلا ياشباب دى؟
دى لازمة ليك وللا ايه؟

تحياتى ياباشا

بيتنا القديم يقول...

عين ضيقة
*******
قبل اي حاجة انا عاوز اعرف هو انت من اسيا...عشان كده عنيك ضيقة ولا دي خلئة ربنا
انا بهزر فقط...ههههههههه
علي العموم...اهلاً يا شباب...دي لازمة...زي ما بعدي علي عم مصطفي بتاع السمين واسلم عليه...يروح يقولي اتفضل ياباشا
ماشي ياباشا
وخطوة عزيزة...وخليك بالك من السلمة المكسورة بتاعة بيتنا القديم
سلام يا عسل

أميرة البلطجية يقول...

مبقاش فيه حاجة تحزن خلاص يا سمسم
ربنا يهديهم ..او يخلصنا منهم كلهم
على فكرة..انا جاوبت ع التاج بتاعك

بيتنا القديم يقول...

اميرة البلطجية
*************
كده اتباعك في المملكة لو حسوا بنبرة الحزن دي عندك هييئسوا هم كمان...وممكن يعملوه إنقلاب علي سموك...وينصبوا واحدة تانية بلطجية بس عندها امل

وبعدين انت مملؤة بالأمل والتأمل معاً

مش كده ولا ايه؟

بخصوص التاج

انا رحت مملكتك وشفتوه عظمتك...وشخصنا الضعيف بيشكر...سموك العالي...علي الإجابات

سلام بقا عشان سايب الواد علي النار والكل بيلعب في البلكونة

Zika يقول...

الله ....جميل....عظيم.....يا سلام
هو ده الكلام
مش عارف يا اخي انت بتقول كلام منطقي اوي
زياده عن اللزوم يعني
بس انا مقتنع اوي وكله في الكليتش جدا

بيتنا القديم يقول...

العربي
......
ربنا يباركل لي فيك يا حبيبي

انت انسان محترم ومش سطحي

وانا بدوري بعز الناس اللي زيك

واحطهم فوووووووووق راسي

كمل تجوالك يا جميل في احشاء المدونة

وكل مشاريبك علي حسابي

ولعة للبيه ياض يا دؤ دؤ